12.31.2011

DISYEMBRE 31, 2011: *REQUIEM ALANG NI SONORA


(*Hubad sa "Requiem For Sonora" ni Richard Shelton)

ang bulan nahinanok
ang iyang ulo gasandig sa sampot sa batan-ong bakilid
ug ikaw naghigda atubang kanako
ubos sa bulanong kislap daw ilawom sa tubig
oh akong disyerto
ang katigmi kabugnaw sa nawong mo
apan oh disyerto ko
ang imo rang kamatayon dili ko maantos masagubang


-MELQUIADITO MAAMBONG ALLEGO, MD
BATANLAK NOMADS
BEBODOFILAMIMUVE Poetry Ensemble
BATHALAD 7
ALBICALARIVI Poetry Group
Palm Harbor, Florida, USA

12.30.2011

Domingo


(after Dr. Melvin Cortez)
Gaksa ko karong adlawa
kay gihidlaw kos imong singot.
Kay iya man ang tibuok semana,
gaksa lang ko karong adlawa.
Pasagdi siya nga matingala--
sa inalisbo sa tam-is nga singot.
Gaksa lang ko karong adlawa
kay gimingaw kos imong kahumot!

--MARCELITO NARVASA
Aloguinsan, Cebu

12.27.2011

mga bisayang pelikulabalak


matod pa sa inahan: gloria, akong anak, "pailob lang"
kay dili mahal ang "bugas mais" inig ka human sa imong "tahas"
kadtong banyagang "antingan" nga nabanhaw
pagasilotan gayod sa "kampilan ni dimakaling"

diha sa iyang aping: "ang luha sa kalipay" nahisama sa "balod
sa kapalaran" ug sa "sangang nangabali"
ang usa nahulog sa yuta ug gihuyop sa makusog hanging
"habagat" ug nahipadpad didto sa lapyahan sa "timbo mata"

usa ka langitnong tingog: gikan sa lubnganan ni magellan
ug lapulapu nagaingon "carmela" intawon "magsuon kita"
apan ah! ang tanan ay damgo lamang ni adan ug eba
puwes "hinumdomi si erlinda" nga "dugay na sa manila"


--DICK C. LARUMBE
Hernando Place, Florida, USA

12.26.2011

BALAKISAW: Pasko sa Habagatan


Ang mga bungol, hangol,
tulisan, kawatan,
YAWA--
manghatag na sab og bahin sa ilang mga sala
sa tanang nagluhod ug wala nagkumo ang kamot.


--KOMANDER ROBOT
Jolo, Sulu

12.25.2011

BALAKISAW: Sa Adlawng Natawhan sa Diyos sa Gugma


unta malamdagan Nija ang atong hunahuna
ug makapamalandong kita nga dili lang karon adlawa
angayang mahimong santo ang matag usa kanato.


--SAINT CIRIACO
Handayan, Jetape, Bohol

12.24.2011

Sayal


Matag Dominggo isul-ob niya
ang bistida nga ang palda mubo pa
kon itandi sa kagabhion.

Ang takon sa iyang estileto
daw kahait sa bolpen
nga gamiton niya sa tingklase.

Mga tawo-tawo niya danaw
sa dalang aspalto diin nasamin
ang arko sa bulan nga gakipat-kipat

ibabaw sa motel. Taliwa sa dulom
nikidhat ang mata sa itom nga Altis.
Ug gihipos niya ang kasingkasing

ilawom sa pitaka aron mabakante
ang mga kamot kansang hawid
labaw kahugot sa iyang blusang pula.

Samtang gakaduol ang sakyanan,
gahinam-hinam pod iyang pag-ampo
nga makasul-ob pod unta siya

usa ka adlaw puhon og bistida
nga pang-Dominggo nga dili
sama kanihit sa damgo.


--OTENCIO B. MAUTGANAN JR.
Dakbayan sa Cagayan de Oro

12.21.2011

kadtong pasyenteng nagbalik atol sa hubkas


kadtong pasyenteng nagbalik atol sa hubkas

                                ay nabiyaan
                                resita kong kompasyon
                                bawnon tipigan


--MELQUIADITO MAAMBONG ALLEGO, MD
Palm Harbor, Florida, USA

12.19.2011

BALAKISAW: Sendong


Ang mga humod gipadpad balak nilang Marlo Geocallo
ug Padre Jonecito Saguban giitsa-itsa sa salbahis
naghaguros hangin ulan baha lumpagyuta
Didto sa Iligan ug Cagayan de Oro ang mga inosenteng
nahinanok sa gidamang kaadlawon gilumsan sa ilang
gadanguyngoyng hagok samtang nangligdas
sa huyonghuyong sa katalagman nalubong sa bangungot
malupogong kalapokan Inigpanikaysikay sa buntag
kinahanglang dakpon bitayon o punggotan si mamumunong
Sendong


-MELQUIADITO MAAMBONG ALLEGO, MD
Palm Harbor, Florida, USA

12.18.2011

Ako nagbaklay sa baybayon uban ang Diyos


Ako nagabaklay sa baybayon uban ang Diyos
ug bisan dili nako sija ihigkita o mahimamat man lang
(gawas unya sa akong kamatayon puhon)
nagatuo ako nga anaa sija nagabantay kanunay kanako.

Tungod kini sa balod nga napunay og kawhat sa akong mga tiil
ug sa huyuhoy sa maabugnawng hangin nga arang gajong mihaplos sa akong panagway
ug sa mga yanong butang nga dayag apan lisod mahimatngonan sa kadaghanan...

Malipajon ako uban kanija dinhi sa lagkaw daplin sa dagat

hain akong makita ang daghang langitnong linalang ug ubang mga balaang binuhat.


--SAINT CIRIACO
Handayan, Jetape, Bohol

12.16.2011

alang sa mga nanagan sa oblation run



ang plakard nga inyong gibitbit,
ang rosas nga inyong gigunitan,
ang pulong nga inyong gisiyagit:

hinaot unta kini ang hinungdan
nganong isog ug kusog usab nga nanyagit
ang katawhan sa inyong pagdagan.


--PIERO ALDAYA
Lungsod sa Carcar, Sugbo

12.15.2011

BALAKPANAW: LIYONSIYUDAD SINGAPURA NI *LEBO



Sid-inga sa mapa ang Singapore
Daw usa ka alimango o lambay sa hunasangsilong sa Malaysia
Kuydawo estatuwang isdaliyon gabantay sa marina bahiya
Sa makasaysayanong pantalan
Buayang bapor swimming pool nagtungtong sa nagbuntaog edipisyo
Kinatas-ang tyobibo nag-umbaw sa alimpulo sa dakbayan

Gimanikyur ang detalye sa mga esenang patsadang pagkahanip
Nindot pagkahuping  Malinis  Pustoraw
Makapagba kainit kasikbit sa ekwetor
Managdam-agay ang mga Insek  Malaysian  Indian  ug Eurasyan
Hapit nang ma-Alzheimer si Ministro Mentor Lee Kuan Yew
Sa Bukit Batok nagmando si higaladagang Lebo

*LEBO---LEO  BOB  FLORES


--MELQUIADITO MAAMBONG ALLEGO, MD
ALBICALARIVI Poetry Group
BATHALAD 7
BEBODOFILAMIMUVE Poetry Ensemble
BATANLAK Nomads
Palm Harbor, Florida, USA

12.12.2011

CHIX NI BALDOMERO


(lagmit hinubad sa balak ni James Tate)

Si Day Bayoleta adunay sunoy nga labihan ka bagsik
nga wala nay mobisita hinuon niya. Gihigugma ni
Bayoleta ang sunoy ug ang sunoy nahigugma ni
Bayoleta, sama sa asawa. Diay pangas-a among
gilaag si Day Bayoleta dihang nipatighulog siyas
patag. Amo siyang gihimamat sa Turtle's Nest
ug nagtagay mi tibuok gabii. Ang nga'n kuno
sa sunoy si Baldomero, ug naghisgot siyang
Baldomero tibuok gabii nga kon wa ka masayod,
abi nimog iyang bana si Baldomero. Bisan ganig
kahibaw nako, abi gihapon nakog iyang bana
si Baldomero. "Gamika man tos Baldomero
ganihang buntag." "Sweet kaayo siya gabii. As in."
"Gwapohang Baldomero uy! Mura gyog si John Lloyd,
di ko kahunong og tutok niya." Gwapa gihapon si
Day Bayoleta ug makabuang gihapon ang gugma.
Pagpanguli, nanamilit na mi sa usag-usa, ug sa
kalit akong gituhak sa aping si Bayoleta, pero hinay ra,
kay ako nasayod nga siya naminyo na og sunoy,
ug ako kining girespetaran. Gilipay siya ni
Baldomero sa mga paagi nga dili nako kaya.
Puno sa bitoon ang langit, ang mga silop nanago
sa kasagbotan, Hay, kanindot mabuhi, tingali,
ug nangihi ko sa awto sa ngitngit
sa akong pribadong kangitngit.


--MARQUIS DE KINTOLIMBO
Moryomoryo, Sebu

12.09.2011

Unsaon Pag-ihaw og Baboy


Una,
Ang duha ka pares sa iyang mga tiil, higti.
Kon moiwik man gani, pasagdi.
Ayaw hinumdomi ang nahitabo sa sako
Dihang gibitay ka kaniadto.

Ikaduha,
Iyang liog gulgola.
Ang binaid nga kutsilyo
Sa imong amahan ang gamita.
Tutok lang sa imong buhaton.
Ayaw paghunahuna nga laing tawo
Ang imong dunggabon.

Ikatulo,
Lapwai kini og tubig-init
Sa dili pa kiskisan sa balhibo
Ang iyang panit.
Mora lang god nig kadtong higayon
Nga giupawan ang imong igsoon
Tungod sa iyang pagkabigaon.

Ikaupat,
Hinay-hinaya paghiwa ang iyang tiyan.
Human kuhaa ang iyang tinai
Ug ginhawaan.
Ayawg hilak, batang-himi!
Dili na kini ang baktin sauna nga imong binuhi.
Karon karne na lang kini nga imong tadtaron
Para ibaligya sa merkado unyang udto
Samtang ang uban lutoon sa imong inahan,
Ihaon sa lamesa sa panihapon,
Usa ka sa mokaon.


--CD Borden
Mabolo, Dakbayan sa Sugbo

12.06.2011

mga dagway sa gugma


Gugma
(usa ka trioleto)

"Splendida razon, demonio claro."
- Pablo Neruda

O reyna sa akong dughan,
Ikaw mutya sa katahom!
Yawe sa akong pultahan,
Musa sa akong galamhan,
Akong pares sa simbahan,
Gasa nga wala gidahom!
O reyna sa akong dughan,
Ikaw mutya sa katahom!


Panagbulag
(usa ka soneto)

Ikaw ako ug ang kagahapon.
Sa gabii, ang mga nanglabay
Kanako mobalik lang gihapon
Bisan ako na nga gipanglabay.

Ang mga pulong mong punog tunok
Sa akong kasingkasing mitusok.
Ang kasakit nga akong gilunok
Sa akong dughan kini misuksok.

Luha nga inanayng midagayday,
Matag lugas puno sa paghandom.
O hain na kaha ikaw, Inday?
Nag-inusara kong naghinumdom.

Akong gisampit ang imong ngalan
Ang bugtong saksi mao ang unlan.


Seks
(usa ka coupleto)

Kon ikaw adunay hinigugma,
Hinayhinaya sa pag-amuma.


-DR. MELVIN CORTEZ
Sunny Hills, Talamban, Dakbayan sa Sugbo

12.03.2011

SONETO PATRIYOTISMO


(Pahinumdom kang Presidente Noynoy Aquino)

Mobalik ako sa Pilipinas
Pinakamithing Yutang Natawhan
Namat-ang kahayag namasibas
Namusilak niining galamhan

Alayon sa mga paisano
Ihiklin mga tikas kiriwan
Alagad sa sincerong pamuno
Kab-oton nasodnong kauswagan

Ang mga expat magtimbayayong
Pagsabwag sa grasya ug kaluoy
Yutawhang kahimsog magdayong
Dinasig sa krusada ni P. Noy

Damgong mapuslan angayng magnuod
Mouli ako sa mahal nasod


-MELQUIADITO MAAMBONG ALLEGO, MD
ALBICALARIVI POETRY GROUP
BATHALAD 7
BEBODOFILAMIMUVE POETRY ENSEMBLE
NOMADS BATANLAK
Palm Harbor, Florida, USA

11.30.2011

nganong mas mabati nuon tikag wa ka diri



namilit sakong panit
ang salin sa imong pahumot.
mitapad nako
ang imong pagkawala.
migakos.
migunit sakong kamot.
sama kahugot
satong paggunitanay
kanang manabok tag karsada.

ga, nangalisbo na biya
ang nabilin nimong labhonon.


--GRATIAN PAUL TIDOR
Dakbayan sa Dipolog

11.28.2011

karsada


Karsada--
Sementadong agianan
Niining Siyudad.

Daghang mag-agi-agi
Padulong ngadto, paingon diri
May molabang, mourong
Mopaubay, mopaatbang.

Samtang ako
Ania sa Eskina
Namasin nga moagi
Ang buotang Propeta.

Karsada
Sementadong dalan
Niining Siyudad.


--ALAN K. CAƑA
Ward 4, Poblacion Minglanilla, Cebu

11.25.2011

AUBADE: HARANA SA KAADLAWON


(Hubad sa Aubade ni Philip Larkin) 

Ako gabuhat sa tibuok adlaw
sa gabii nahimong katungang hubog
Napagmata sa alas kuwarto punto
sa waytimik kadulom ako nagtutok
Unya sa inanay ang mga sidsid
sa kurtina nanamkon og kahayag


-MELQUIADITO MAAMBONG ALLEGO, MD
Palm Harbor, Florida, USA

11.22.2011

Pag-awit sa Akong Kasingkasing


11.19.2011

Mangga


Lisod dil-an
ang ginadili,
labi nang hubag
nga mangga nga naa
sa punoan ni Inday Eba. Nabuyod
akong panan-aw sa tumang kalunhaw
anang bambang bunga. Gidughit nako
ang mangga ug gisalo nako, aron di madaot
ang iyang kadasok. Gihinay gyod nakog panit
aron tibuok lang gihapon ang unod, ug gihiwa sa
kutsilyo gikan sa ibabaw padalus-os sa ubos, dayon
gidildil nako sa asin ug tuyo nga akong nakiriw sa su'd
sa iyang kusina. Gidimdim gyod nako ang lasa, ug
gasagol ang kaaslom ug kaparat sa akong dila.
Kada pisa nga hiniwa gikibkib ko ug gisupsup
puyra ang lubas kay pait. Kay morag bitin
kining makadiyot nga pista, mipiyong ko
aron tipigan ang kalami ning kalapasan.


--OTENCIO B. MAUTGANAN JR.
Apovel Subdivision, Cagayan de Oro City

11.16.2011

Ikaw ug Ako


Ang danghag makaipsot
 sa dughang way kamot.

-- Dr. Melvin Cortez,"Singsing: Bagting ug Kaliring"


I. Sa Kahayag

una miabot ang gugma sa way pagduha-duha
misunod pagdagan ang lubas tang katuyoan
bisan pa ang kalibotan wala ko gikauban
pagpangga ug amuma ikaw akong gisaloma

mga agiw nga napalid sa adlaw mihawid
ang kahayag nga ilad giukit ta sa palad
ug bitik sa saad ang mga titik sa panaad
kapalarang di masuhid sa hanging sinapid

padayon nga gipaligid tibugol kong pagsugid
saksi ang pagmanggad sa sinemana kong halad
ibabaw sa hilawng pagpasagad kita nangasamad
ug way sala ang paniid kay padayong gibag-id

ang hait nga katawa nga mipahit sa pangagda
sa kainit sa atong bugan nagmugnag balayan
ubos sa hinog nga bulan mipahiyom ang duyan
didto kitang duha naginukdanay sa ginhawa


II. Sa Kangitngit

human sa talikdanay dali kong gisubay
ang agiw ug talithi sa pikas nga kinabuhi
dali kong gilingi gilili sa saming liki
liboan ka dagway sa pikas nga kalipay

ang kahilom namaak sa kahilom nagsabak
ang kagahapong ngilo sa higdaanang bildo
way bili ang pagtuo sa kahingpitan kay luyo
sa hungaw nga bahakhak way dughang giagak

sa ngulngol nga lawak sa lumoy nga balak
sa mga panid sa libro sa tumoy sa akto
sa pahiyom sa kuwadro sa ungol sa kwarto
naminaw sa hilak usa ka magul-anong buwak

human sa talidhay gihipos ko sa inanay
padayong gipakli ang hinapos nga pagbati
nga di na mabakwi nga di ko na mauli
anino sa imong dagway hugot nga kalaay


--MARCELITO NARVASA

Aloquinsan, Cebu
2009

11.13.2011

Pabukal


Hagoka ang akong garay,
Huyang ang pagkahan-ay.
Naaghat ka sa pangindahay,
Kaugalingong balak ikaw magpanday.

Natandog ka sa akong balak,
Gikuptan Ikaw ug giagak.
Mibarog ka ug nangandak,
Mas maayo kang magbabalak.

Di ko igsapayan nga sawayon,
Mga pagdayeg dili mahinungdanon.
Sa paggaray ako mopadayon,
Tinukmod ning kalag kong mamugnaon.

Mga balak kanunay kong bitbit,
Kalipay ko ang pagpaambit.
Pangandoy ko nga kabugnaw mo malaknit,
Kamamugnaon mo mobukal, moinit.

Duol kamong mga malipayon ug magul-anon,
Mga gilaayan ug mga madasigon
Ipabuhagay tinagoang mga pagbati,
kalipay, kaguol , kahigwaos, kalami.

Kaamgohan atong ablihan,
Kalag atong buhian.
Ihurot tang kusog sa atong galamhan,
Tibuok kalibotan atong balakan.


--ALAN K. CAƑA
Ward 4, Poblacion Minglanilla, Cebu

11.10.2011

Ikaw Ang Rebolusyon


Walay hunong ang wali sa dalan
Sa mga walhon nga daw nagyawyaw.
Bisan gipagaw na ang tutunlan
Mao lang gihapon ang gisangyaw.

O kini ba gayod ang solusyon
Sa nagkadaiya nga gumonhap?
Usa ka mini nga rebolusyon
Sa mga bayani nga inihap?

Di kaha kini usa ka dula
Sa mga tawo nga hakob og gahom,
Nga gigamit lang ang Itom-Pula
Tungod sa kahangol nga gihilom?

Atong buhaton karon ang ugma.
Atong kanunayon ang sulagma.


--KOMANDER ROBOT
Jolo, Sulu

11.07.2011

Adunay Ubang Bulak nga Lisod Kutloon


Susama sa mga bituon
nga gipanglatag sa langit
nga dili gayod nato makab-ot

igo ra kita mosud-ong
mopangagho ug modayeg

niining mga manulonda
nga nagkidlap-kidlap

hain ubos
ikaw naghangad
ug hilom nga nangandoy.

*

"Daghan pa og isda sa dagat,"

matod niya
sa dihang gitanyag ko
ang akong gugma.

Apan, inday, nasayod ba ikaw
nga ang gugma dili isda
nga kon nanginahanglan
modalikyat lang dayon kita
sa halapad nga taob
aron mamingwit,
mamasol o manginhas?

Ang gugma
morag bulak
nga lisod kutloon.

Molawos ug mamatay lang kini
kon wala na ang pagbati
sa binuhat
kansa gipitik
sa kasingkasing
nga intawon naghulat.

*

Sanglit karon
moabot ra ang panahon
nga imo akong hikalimtan.

Una,
ang akong panagway.
Ikaduha,
ang akong ngalan.

Apan tuod man
dili ako angayan
maghinuktok sulod
sa lawak sa paghandom

kay usa ka adlaw
sa imong katigulangon
moduaw lang unya ako
sa imong panumdoman
ug basin— pamasin lang— 
makahatag ko og pahiyom
sa gum-os mong mga ngabil.


-DR. MELVIN CORTEZ
Sunny Hills, Talamban, Dakbayan sa Sugbo

11.04.2011

Triple A: 3 KA MANANAMBALAK


(Allego Almagro Amper)

Mananambal ug Magbabalak
Propesyon ug Parnasongbisyo
Katungdanan ug Kalingawan
Kapikas ug Ikaduhang Bathala

Doble ang kabalaka kahigwaos kahiwasa
Doble ang katagbaw kalipay kahimuot
Doble ang bantayog
Doble ang lapida

Duhay kalibotan usay handomanan dadangatan


Nota Bene: Natagik kini sa wa pa motaliwan
si Dr. Rene Estella Amper sa Enero 24, 2007
(mayor pa siya sa Boljoon kaniadto).



-MELQUIADITO MAAMBONG ALLEGO, MD
Palm Harbor, Florida, USA

11.01.2011

Hudyaka


Ang tikbalang nanaghoy samtang nagbras sa iyang sapatos. Ang agta midagkot na pod og lain nga tabako. Ang duwende nangharana sa silingan nga uhong. Wala pa mibangon ang bampira nga nahinanok sa lungon. Ang santelmo miiwag sa kangitngit mao akong nakit-an ang katunga nga lawas ni misis sa nataran. Ang among masuso mihatag kanako og lantip nga pahiyom gikan sa iyang duyan. Ug ako, akong gipangbuhian ang mga sigbin sa ilang hawla aron makapanguling.

--CD BORDEN
Mabolo, Dakbayan sa Sugbo

10.15.2011

Yamo


Uno

"Know thyself? If I knew myself I'd run away."
- Goethe


Aron mahuman,
Atong sugdan:

Ang suga palonga,
Ang mata piyonga.

Sa damgo hiposa
Ang awop nga musa.

Dakpa ang takulahaw
Sa dili pa kini mahanaw.

Inubanan sa tigmo,
Kinuyogan sa yamo.


Kon ngitngit ang palibot,
Wala pa kita makasabot.

Kon puno sa paghandom,
Ang kahilom modumdom.

Kon dili na mobalik,
Pangutan-a ang pilik-pilik.

Kon atong mabagatan,
Dali ra makalimtan.

Atong sugdan
Aron mahuman.


Tanan nagkalayo,
Tanan nagkaduol.

Usahay hait,
Usahay pod habol.

Karon nangaugdaw,
Taodtaod mag-umido.

Dili puydi puniton,
Apan puydi kuhaon.


Ang tubag anaa sa pangutana,
Ang pangutana anaa sa tubag.

Kon atong balihon
Nag-atubang lang gihapon.

Adunay miagik-ik, adunay naguol,
Adunay nasaag, adunay nakatuod,
Adunay natulog, adunay nagmata,
Adunay nakahibalo
nga silang tanan usa.


Ang kabugason sa kabuntagon
Atong gitayhop aron mapalong,

Sa kilumkilom atong gisulod
Ang mata sa dagom.

Karon nga atong natukob
Ang paon sa yamo:

Unsa atong nadunggan?
Unsa atong napalgan?
Ngano kita
misutoy man og dagan?



Dos

Kay wala lagi takob,
Unsaon man pag-abli?

Kay wala lagi kuptanan,
Unsaon man pagkupot?

Kay wala lagi bentana,
Unsaon man pagdungaw?

Kay wala lagi pultahan,
Unsaon man pagsulod?


Kon atong hinumdoman,
Dili nato mahinumdoman.

Kon atong mahinumdoman,
Dili pod nato mapanganlan.

Sa tumoy sa dila nagkumpayot,
Dili matagak
bisan unsaon pa og labnot.

Ang kahilom, ang kamingaw,
Ang yamo mopatigbabaw.



Tres

alang kang Erik Tuban

Dinhi dapit ang kamatuoran
naghukas. Misilaob sa atong
alimpatakan ug kaunoran
ang mibuthong kalayo sa dakong

daob nga nag-gumikan sa mingaw
ug hawan nga luna sa panumdoman.
Ang yamo nabuslot ug mihungaw
ang gihikaw nga tanghaga. Dayon

Miabot sa mga bituon ang
atong panghunahuna. Gasamog
ang tanan titik nga nangabuang
Ug sila sa atong utok midumog.

Unya ang pulong nahimong balak,
Human ang balak nahimong bulak.


-DR. MELVIN CORTEZ
Sunny Hills, Talamban, Dakbayan sa Sugbo

10.10.2011

yutang tabunon

Marquis dK (feat. P.D.Ma & Indian Lennon) - Yutang Tabonon by M-D-K

indian lennon:

gihalokan ko ang imong mga mata, o yutang tabunon
ug gihapuhap ko ang aping ug hubon sa sayong kabuntagon
gisudlay ko ang dunghay sa kahangtoran mong buhok
ug padayong gisubay ang tiunay sa tinipigan mong bulok
padayon kong gihulma ang matag kurba sa imong lawas
gisabwag ko ang alimyon sa mga prosa mong rosas
ug giromansa ikaw sa kagabhiong ako nag-inusara
ug gipangga ko ikaw daw sama sa usa ka asawa
ikaw nga may kahayag nga milamdag sa ugma-damlag
ikaw nga naghatag og tukmang kaisog ug kaikag
nagbukal nga tubod kay ang sala sa unod, ikaw mobanwas
mohunad sa samad, napakyas nga saad ikaw mohugas
padayon gihapong akong nagpangita sa imong mga kasikas
giduaw ko ang kada sanga, kada suok ug eskina
kay ang siyudad buta, ug ang kamatuorang idlas.

marquis dk:

ang kamatuoran nga gikumkom diha sa kamot
nag-ugom sa katuyoan ug panginlabot
kay kini angayang isibya ug isulti
kay kini kagawasan sa liboan ka kalapati
gipatugpa, gibuhian ngadto sa langit
panyo nga puti diha taliwala sa kangitngit
bisan pag kini nagbaton ug gibug-aton
sa liboan ka kahingawa ug panamilit
gibuka ko ang akong baba sa pamasin
nga mapadayag ang bahandi sa kabilin
kay ang bugtong bulawan diha sa kaban
mga garay, batadila ug diwa sa batang dila
nga misuway ug tila sa panit nga pinulongan
pamatia mga gagmayng tingog nga gipalanog
kay ang kagawasan usa ka tabanog
kay ang kagawasan usa ka tabanog
kay ang kagawasan diay usa ka tabanog

p.d.ma:

siniloy*
sa kahoy:
huyuhoy.
ang awit
misampit
midapit
mitiyabaw
paminaw, paminaw
sa dunggan
sa dughan
sa duyan
ang yuta
tabunon, tabunon
tabunan
ang langyaw
nga langaw
ang dag-om
sa dagom
naghandom
kahilom
kahilom
kahilom
kahilom
kahilom
kahilom

marquis dk:

usa kini ka sugilanon sa paghigugma
sa dalaga nga dugay ko nang giamuma
miduaw sa dagang kining mga letra
sa pinulongan nga matawag kong akoa.
laylay sa mga balak ako siyang giharana

p.d.ma:

dungga ang huni sa mga salampati
dili na mapugngan bul-og sa akong pagbati
siya ang una ug ang kataposan
tipik ug kabahin sa akong salabotan

marquis dk:

ug nangatagak ang buwak sa akong galamhan
ang alom sa yutang pinulongan akong nakit-an
gikumkom ko ang gahom mo o sidlakang saloma
o ikaw ako gihigugma,

matahom nga dalaga.


--MARQUIS DE KINTOLIMBO
Dakbayan sa Sugbo

*siniloy (after diosdado alesna): verse lines consist of three syllable words accented on the second syllable, effecting a characteristic euphony that mesmerizes with its plaintive strain.

10.04.2011

Pamahaw


Namahaw ang managtiayong Kutsara ug Tinidor sa ilang paboritong pagkaon nga mao ang wala sa dihang nabuhian ni Tinidor ang iyang babaye . . .

Askang! maoy sulti ni Tinidor.

Hala, hala! miingon iyang asawa, Murag naa gyod kitay bwesita karon, pangga.

Kutsara pa gyod, nagkanayon iyang bana samtang gipunit ang babaye nga nahulog sa salog . . .


--CD BORDEN
Mabolo, Dakbayan sa Sugbo

9.18.2011

padigo-padunot*

mahinumdom ko niadto.

maghilak kong mopauli
mohangyo sa akong Lolo
nga buhatan na sab kog kasing
kay ang bag-o niyang
ginama tua, nagbuy-od samag patayng
sundawo human kunis-
kunisa sa mas dakong kasing ni
Naldo.

moagik-ik siyag katawa
dayog bulhot sa aso gikan
sa iyang hunsoy.

tulo ka adlaw
usa siya mahuman
ug tulo pod ka adlaw kong mag-apong.
laay ang pagpaabot.

kutihan kaayo siya. dili katingad-an
nganong ako ang dunay kinanindotang
kasing sa amoa. ako pod ang kanunayng
sigurohon ni Naldo. upat lang ka adlaw
ang lahutay sa akong matag kasing.

dili nako mahinumdon kon pila
ka kasing ang nahimo ni Lolo.
apan ning bag-o lang
mibalik nako ang iyang mga pulong
matag higayong ihatag na niya nako
ang bag-ong ginamang kasing.

Wanes, ang pagkulit og kasing
sama rag pagsuwat og balak o kanta
o pagpintal og obra.


apan wala ko adto makasabot.
padayon kong miduwa og
padigo-padunot.

----RICARDO PALMA
Isla sa Olango, Dakbayan sa Lapulapu


*padigo-padunot- duwa sa mga kasing diin ang tumong mao ang pagpulpog sa kaatbang pinaagi sa pagtamba o pagkanil niini hantud mabuak gamit ang hait nga lansang sa imohang kasing. -tagsuwat

9.15.2011

pag-inusara


ang imahe sa usa ka laking gaunay-unayg himas
sa iya samtang gatutok sa duha ka tawong nahiusa
diha sa tumang himaya, panit sa panit, singot sa singot,
kay usa ka imahe sa

pag-inusara.

--GRATIAN PAUL TIDOR
Dakbayan sa Dipolog

9.12.2011

balak sa sista


(sa ikasiyam nga buwan sa balakista)

nag-estambay lang siya
ibabaw sa lantay, naghuwat
kinsay mohiram
sa iyang gikurbadang hawak.

sa higayong may mosampit
sa iyang ngalan,
mosabak sa iyang lawas,
mokuskos sa iyang kuwerdas,
anha pa siya mopaambit
sa iyang gitagong musika.

usahay bugnaw siya sa dunggan
apan may higayong siya alingugngog
kay nag-agad lamang siya
kinsa ang naggunit,
naggamit niya.

ang iyang birtud
mohatag og kahigayonan
sa tanang gustong mopaambit
sa ilang tagsa-tagsang abilidad
pinaagi sa pagkuskos
sa iyang kuwerdas.

wala siyay gahom
nga motagik
sa iyang kaugalingong piyesa.

--PIERO ALDAYA
Carcar, Sugbo

9.09.2011

bulan


wa lang siguro nimo hikit-i, apan ako kadtong hilomon nga bulan nga miambit sa imong pagtikawtikaw, mitimbaya ug mitutok nga masinahon dihang imong hugtanon nga gipadayag ang timgas mong kaanyag sa kalibotan. ako kadtong malamdagong mipabadlis sa kahayag ug mihiwa sa imong pagpangaliya. wa lang ka masayod kay sa imong pagtando diri kanako, sa way pagpamilok, tuy-od mo nang gigasa ang imong himungaya ngadto sa baybayon. sa matag bag-id ug kiay sa takna, masinahon ako nga misaksi sa hinayhinay nga sinukliay sa kabubut-on. ang kada tikang sa tanyag giisip ko na nga kabahin sa imong kinatibuk-an. ug si kinsa man ako nga mokuwestyon sa kamas sa imong kabig? ako nga nagpahipi lamang ug nagpaabot nga gakson sa gahom sa pagdamgo? ug lurat nga naghuwat nga lilion sa lamat sa usa ka linalang? dugay ko nang gidawat ang kaangayan ug nakaamgo na ako sa kaakohan. igo na alang kanako ang higayon nga sa panagsa, lumsan mo ako sa kinawat nga katahom.

--MARCELITO NARVASA
Sibulan, Negros Oriental

9.06.2011

panid #6


Luyo sa among balay adunay dakong kahoy nga mamunga og ulo sa tawo. Kon tinghinog na, inanay ra silang mangatagak sa yuta dayon among pamuniton ug ipangtaod sa among mga liog.

--CD BORDEN
Mabolo, Dakbayan sa Sugbo

9.02.2011

danguyngoy sa giabandonang balay


pila ka tuig na kong
gainusarang gabarog dinhi
sa kangiob ug kahilom.

gimingaw ko
sa kuri-kuri sa kusina,
sa lalis ug labing-labing sa mag-asawa,
sa pag-unot-unot sa magsoon.

kaniadto, saksi ko
sa mga sekretong
gitrangkahan sulod
sa banyo ug mga kwarto.

apan niadtong
naminyo na ang mga anak,
ug gasunod nag pamauli
balik sa yuta
ang mag-asawa,

wa nay laing
gapuyo dinhi
kondi ang kahaw-ang
ug handomanang
giabogan
ug gipuy-ag lawa-lawa.

ug sulod sa katuigan,
hinayhinayng nawala
akong pagka balay.

--GRATIAN PAUL TIDOR
Dakbayan sa Dipolog

8.31.2011

asoy sa unano


(alang sa politiko nakong amigo)

taas unta ning balaka
buot makig-indig sa imong gitas-on
apan pilion kong paduk-on ka
aron imong masabtan
naa sa imong ubos
kami

naghangad nimo.

--PIERO ALDAYA
Carcar, Sugbo

8.08.2011

ang balak di sama sa pamalikas


“Atay, kalami sa sud-an!”
“Shit, milabay akong crush.”
“Piste! Gisapot ko. Piste!”
“Kolera ka, animal
Ayaw nag pakita nako!”
“Yawa! Gibulagan kos akong uyab.”
“Kayata, ka-cute sa balak.”

--GRATIAN PAUL TIDOR
Dakbayan sa Dipolog

8.04.2011

pagkaawas


nakaplagan ko ang binuhat
kansang kalipay hamabaw
kabuthonon ang akong gibati
ug kaniya akong giyagyag
inanay siyang napuno
hinay-hinay ug hapit ng mahipihip
gisukod ko ang iyang pagbati
sa saktong sukdanan
aron di mausik kon masobrahan
apan wa ko mabantayi
sa punay kong sukod-sukod
akong pagbati nahutdan
ug siya naawasan

--GEE FAMILGAN
Argao, Sugbo

8.01.2011

sulayi


Sulayi lang og dagan
Di ba piloon nako imong agianan
Sulayi lang og tago
Di ba hiposon tika sa kahangtoran
Sulayi lang og sukol
Di ba imong kaugalingon ang imong makaaway
Sulayi lang og katulog
Di ba sudlon tika sa imong damgo
Sulayi lang og mata
Kana kon makamata pa ba ka

--CD BORDEN
Mabolo, Dakbayan sa Sugbo

7.05.2011

usa ka gabii


bisan tuod gibanigan og panganod
ang kagabhion, maaninag gihapon
ang luspad nga pahiyom sa bulan

--GRATIAN PAUL TIDOR
Dakbayan sa Dipolog

7.03.2011

ang balak nga gikan sa bobot


ug moingon kag
i love you
ayaw apelyidohig
so much
ayaw pakapinig
forever
wa nay singsing ang bobot ron
ug taympa,
wa na gani bobot sa tindahan.

--ION MAE VILLAR
Dakbayan sa Sugbo

7.01.2011

bitin


taliwala sa kurikuri sa butag bungol nga nag-agi-agi
didto sa carbon kalma nga miplastar sa debateryang ampli
ang alalay sa anawnser, mipahipi mikidhat
sa anawnser nga may giugom nga liboan ka
epeks sa sintisayser

dayon sa hinay miwakli sa minaomaong kardbord nga takoban
nga may drowing ni son goku ug sa namakyu nga san pedro
dayon sa hinay mipahiluna sa dangog nga ikog gikan sa kaban
piyong nga mihangad sa langit nga daw nanglimugmog
o nag-ugom og liturhiya
ang simod sa hangin miumod, nagkibotkibot daw ang simod
nagtigom og enerhiya

mipabuhagay og pipila ka pulong sa pangyamyam

nanawag sa katawhan, nag-awhag sa kulbahinam:

ania! moihap kog katulo, susiha ninyo!
bitin nga gikan pa sa bukirang bahin sa karagala
(nga sa wa pa kini mangluno nakit-an
nga nagtangag og himungaan nga gikan
nanglumlom sa iyang itlog)

ania! moihap kog katulo, ug duol kamo!
tapok-i ayaw kahadloki ang buhing korbata
(kay kining tang-ang halas nga mas mangtas pas ihas
dyutayng syomoy lupig pay sonoy gikamalo)

ania! moihap kog ikatulo, iandam na ang inyong mga lata
sudlanan sa lana nga haplas pampagana sa kama

ala una!
(tooogsh!)
alas dos!
(tooogsh! tooogsh!)
alas tres!
(tooogsh! toogsh! togsh!)

apan sa di pa nato ipagawas ang bitin aduna kami itunol nga sobre
kon mahimo ayaw usa kini susiha sa balay ra abrihi
adunay numero kami nga gilakip, kon motuo mog swerte hala pustai
gamayng hinabang lang kini ang among gipangayo tabang pinansyal
pang-abag sa nindot nga katuyoan ug maayong kabubut-ong pangmedikal
ania pod kami tambal sa hubaghubag ug ang kahibungan tawas tapol
pangwagtang sa ngil-ad nga baho panghinol sa gustong mosyapol

--MARQUIS DE KINTOLIMBO
Moryomoryo, Cebu

6.29.2011

nag-away


Buang! misyagit iyang inahan, Tigulang na ka, ayaw pag-ingon ana!

Apan gusto kong mobalik sa imong tiyan, mipasabot ang lalaki, Ug ang bugtong pamaagi mao ang pagpasok balik sa imong kinatawo.

Yabag! mitiyabaw iyang inahan, Bantay lang gyod ka kon moabot na imong amahan!

Apan wala na akong amahan, mihilak ang lalaki, Mibalik na og sulod sa tagoangkan ni Lola.

--CD Borden
Mabolo, Dakbayan sa Sugbo

6.27.2011

Himungaan



(para kang Dr. Anthony Tan)

gitiman-an nako tanan nimong gisulti.
ang balakero, matod mo ngari nako,
usa ka himungaan nga galumlom
sa iyang itlog, gapaabot
kon kanus-a kini mahimong pisu.

buot kong hunahunaon
nga kon usa ko ka himungaan,
ikaw ang kanunayng mipatuktok nako,
ikaw ang naghapnig sakong itloganan,
ang nagpanday sakong batoganan.

tungod nimo,
nakakaplag kog igong disiplina
dili sa pagpanguhit sa balak,
kondi sa pagpaabot
kon kanus-a ko kuhiton sa balak;
ug igong pasensya
samtang gilumloman nako ang itlog,
samtang gapaabot ko sa pagkapusa,
sa pagkatawo sa pulong.

--GRATIAN PAUL R. TIDOR
Dakbayan sa Dipolog

6.24.2011

tunglo


unta imong dugo mohubas
kon makakita ka kanako
imong dila imong matulon
kon makigtabi ka kanako

unta imong ilong mawagtangag buho
imong mata dili na mobuka
unta imong mga tiil magsalimuang
ang tuo motikang sa wala
ang wala motikang sa tuo

unta tuk-on ka sa imong mga kamot
kambrason ka sa imong mga kuko
paakon ka sa imong mga ngipon

unta imong kasingkasing mohunong sa pagpitik
ang imong ulo mapuno kanako kanako kanako
hangtod ang imong ulo mobuto

--CD BORDEN
Juan Seno, Mabolo, Cebu City

5.22.2011

esena sulod sa iyang lawak

(sa akong higala)

ugomon ko ang kamatuoran
samtang himas-himason ang atong kagahapon
iyawat mabalik kita sa panahon
diin lig-on pa ang atong relasyon
gahi pa ang pundasyon
sa atong rosas nga panaghigala

tagamtamon ko ang katam-is
sa atong kanhing dungang panaw
samtang nagparat, nagkapuol
ang pagpuyo sa karon
diin giluwa na sa kapalaran
ang kahigayonang kita
ang magkadayon sa kataposan.


--CHRIS CASTROL
Dakbayan sa Sugbo

5.18.2011

timaan.sa.atong.kadiyot.nga.panaghinigala


kon.ugaling.mingawon.ka.nako
sud-onga.lamang.kanang.imong.tuong.kamot:

hinumdomi.kadtong.higayon
kadtong.hapon.samtang.dungan.tang.nanglingkod
sa.balas.sa.baybayon
ang.atong.mga.tiil
gihapak.man.gani.kadto.sa.balod
nga.ato.lamang.gipasagdaan

ang.atong.mga.anino
nagsikit.sa.atong.luyo
nga.ato.lamang.sab.gipasagdaan

kay.dungan.natong.gisud-ong
ang.pagkatulog.sa.gidukang.adlaw
sa.kasapdan.nga.sigeg.panghuy-ab

samtang.gigapos.ko.ang.imong.kamot
(ug.gigapos.mo.ang.akong.kamot)
sa.mga.saad.nato.sa.usag-usa
nga.atong.tagsa-tagsang.gikulit
sa.kawhaag.lima.ka.bato.nga.pinunit.sa.baybayon
atong.gituhog.sa.usa.ka.hilo.sa.panaghinigala

inig.uli.nato.sa.atong.tagsa-tagsang.lugar
nga.di.ko.hubaron.sa.akong.kamot
(unta.di.sab.nimo.hubaron.sa.imong.kamot)
bisan.pag.maligo.ko.sa.katam-is
sa.laing.dagat.sa.laing.lugar.sa.laing.panahon

--PIERO ALDAYA
Lungsod sa Carcar, Sugbo

5.12.2011

ang napulo ka sugo sa kagabhion


1. Pangitaa ko sa suok sa bar.
2. Hubogon nato ang kagabhion.
3. Dad-a ko sa imong lawak.
4. Huboon ta atong mga kalag.
5. Ligoon ta atong kahimatngon.
6. Pantasya ipadayon sa kama.
7. Painiton sa mga haplos usag-usa.
8. Mapa himoon sa mga halok.
9. Padungga ko sa katam-is sa dugos.
10. Iyarok kopa sa kinabuhi.

--CHRIS CASTROL
Dakbayan sa Sugbo

5.06.2011

ferris wheel


kadtong gabiing nanuroy ta
ug nahagbu'ng ang mga bituon
sa akong mga mata,
sa dihang misakay ta sa makalipong
nga ferris wheel nga perting kusoga
ang pagtungas ug dulhog,
nagpakaluoy ko aron di ko mosuka
misutoy man hinuon og padagan ang kanahan,
uban sab sa pagsutoy sa imong
mga kamot ngaris akong dughan,
misinggit kos kakuyaw
sa punay ug tuyok
sa tong gilingkoran giduyogan man sab
sa kakuyaw nga mituyok imong kamot.
morag galilo akong panan-aw
uban sa pagsinggit aron malagpot
ang mga kakulba nga kalugwaon na
sud sa akong ginhawaan, inay nga
imo kong alimahan sa akong kahadlok,
(kay lage first time) imo man hinuong
gidungagan ang naghuot nga hangin
nga nagbalod-balod sa akong tiyan.

--GEE FAMILGAN
Argao, Cebu

5.01.2011

salin


ang lab-as nga mga samad
sa bukogong kalag
gilatayan sa mapintas nga mga latos
nagsilbing handurawan
sa adlaw sa semana santa

--GEE FAMILGAN
Argao, Sugbo

4.27.2011

pagkawhat

Luyo sa mga bungtod ug lasang
gihadot sa huyuhoy ang haganas sa imong ginhawa
ang dag-om sa panganod nagpaila sa kilumkilom sa imong mga mata
akong dughan milayat padulong sa langit ug nagmugnag dugdog

apan gilingi ko ang kasadpan,
ang bidlisiw sa adlaw nagdagkot sa paglaom nga ikaw ako pang maabtan

Busa akong gidali ug suong ang lasang ug gibaktas ang bungtod
buot kong bitaron ang kataposang panid sa
kahayag nga unta mopukaw sa gaduka mo nang
kahimatngon

apan ang adlaw sa dayon nang nanghipos
ug sa akong pag-abot

uhawi na ang tanan
ikaw nakigdug na sa kangitngit sa dayon nimong pagkatug

mas milagubo ang dugdog
mas miitom ang dag-om
ug sa akong mga mata mitubod ang ulan

--JESSREL GILBUENA
Sta. Fe, Isla sa Bantayan

4.21.2011

birat ka hain iroy


Diri ak makadto ira ak ginpirit
ha lugar nga diri ak maarang
masirom it ak pagkaturog
labi kon diri ak manigarilyo
tapos hutoyon dayon hit ubo
haim lungon nga ira ginlukdo
umuran hin sinsilyo
ambot hain may da anghel nga nabarian pako
an mga mata nagkita hain kamot nga imgin igbaw
nagkaway ha lumakat nga tuldok hit harayo

--CD BORDEN
Mactan, Dakbayan sa Lapulapu