4.27.2011

pagkawhat

Luyo sa mga bungtod ug lasang
gihadot sa huyuhoy ang haganas sa imong ginhawa
ang dag-om sa panganod nagpaila sa kilumkilom sa imong mga mata
akong dughan milayat padulong sa langit ug nagmugnag dugdog

apan gilingi ko ang kasadpan,
ang bidlisiw sa adlaw nagdagkot sa paglaom nga ikaw ako pang maabtan

Busa akong gidali ug suong ang lasang ug gibaktas ang bungtod
buot kong bitaron ang kataposang panid sa
kahayag nga unta mopukaw sa gaduka mo nang
kahimatngon

apan ang adlaw sa dayon nang nanghipos
ug sa akong pag-abot

uhawi na ang tanan
ikaw nakigdug na sa kangitngit sa dayon nimong pagkatug

mas milagubo ang dugdog
mas miitom ang dag-om
ug sa akong mga mata mitubod ang ulan

--JESSREL GILBUENA
Sta. Fe, Isla sa Bantayan

4.21.2011

birat ka hain iroy


Diri ak makadto ira ak ginpirit
ha lugar nga diri ak maarang
masirom it ak pagkaturog
labi kon diri ak manigarilyo
tapos hutoyon dayon hit ubo
haim lungon nga ira ginlukdo
umuran hin sinsilyo
ambot hain may da anghel nga nabarian pako
an mga mata nagkita hain kamot nga imgin igbaw
nagkaway ha lumakat nga tuldok hit harayo

--CD BORDEN
Mactan, Dakbayan sa Lapulapu

4.17.2011

Malakanyang


Nagsugod na ang ikatulong hugna
sa kalibotanhong gubat
Imong madungog ang kamingaw
nga kalit nangagusbat

Ang batang gipanggutom
midakong hakob ug hangol
Sa gahom nga gihikaw
daghan hinuon ang nangaangol

Gibaid na og anam-anam
ang mga hinagiban
Naguhayguhay ang gabok nga panaptong
simbolo sa Pilipinas nga gisunggaban

Kining nasod sa mga sinyalan
salbahis ug kawatan
Dili na mabakwi mahait nga pulong
ilahang naluwatan

Usa ka milyong mata nagtan-aw
nagtago sa kangitngit
Usa ka milyong tingog
nagsiyagit apan yungit

Nagtanom kita sa yuta
og binhi sa kaligutgot
Gidaro, giani
ang miturok nga kalagot

Dahong laya,
prutas nga pait
Ibuka ang baba
sa bakak nga gihungit!

Pili lang undong:
Simbahan o Presohan?
Matod nila
"dakong binuang ang sayaw sa kadalanan"

Malipayon pa kaha ang takna
inigsubang sa adlaw?
Unya nganong nag-antos man
ang tigulang nga kabaw?
Kanus-a man gayod
makita ang kahayag?
Unya na ba
kon sunogon na nato ang payag?

--KOMANDER ROBOT
Jolo, Sulu

4.13.2011

balikos



hain si juan?
tua, nanarbaho sa yuta ni ingko sam.

hain si ingko sam?
nakigminyo sa igsoon ni juan.

--PIERO ALDAYA
Lungsod sa Carcar, Sugbo

4.09.2011

Kon Aduna Lang Koy Sportivo


Kon aduna pa lang koy Sportivo
Dili na unta tamak-tamakan
Ang among pagkatawo
Niining among pinilanggang silingan.

Kon aduna pa lang koy Sportivo
Wala na untay mga hubog nga magsayaw-sayaw 
sa among agianan, with matching disco lights pa!
Kay moagi na man
Ang kotse sa adunahan.

Kon aduna pa lang koy Sportivo
Wala na untay payag-payag sa dalan nga matukod
Ug wala nay magpatokar
Og mga tingog nga madunggan sa pikas bungtod.

Kon aduna pa lang koy Sportivo
Dili na gayod ko maulaw
Kon ang mga klasmeyt ko moduaw
Niining among balay aron maglingaw-lingaw.

Kon aduna pa lang koy Sportivo
Wala na gayoy maglaray nga manok
Nga matag buntag motilaok
Ug magsaba-saba namong nahinanok.

Kon aduna pa lang koy Sportivo
Dili na unta ko masubo
Kon makauli na sa lawom nga kagabhion
Kay adunay banda nga mitokar, mibabag sa among agianan.

Apan, unsaon ta man
Wala man gayod koy Sportivo
Hangtod na lang kaha kini sa balak
Kining akong gamay nga damgo?

--ANGIE LEE
Pagsabungan, Dakbayan sa Mandaue

4.05.2011

para niya


grabeha nimong hagok sa akong utok, uy
og tibuok gabii nga wa ko nimo patulga
galiso-liso kos akong gitulgan
aron mahulog ta ka sa kutson
ug gibukot ko ang unlan
sa dunggan nakong gialingugngogan
aron ang hagok mo mawagtang
nga sa hinay-hinay mikuhit na
sa akong dughan,
di ko buot nga ikaw baldahon
sa pagkahinanok, kay gusto
ko nga kitang duha
sa imong gihimong damgo
magkauban, busa mitindog nalang ko
nagkuhag beer ug gihubog ko
akong utok, aron sab ka mahubog
aron di na ka magsamok sa akong utok.

--GEE FAMILGAN
Argao, Sugbo

4.01.2011

Timpasaw


padayong nag-aso ang haling sa panganod
maong naghalang ang mga mata

sa kabituonan. ug sanglit gikonsinti sa
amuos ang sampot sa Buwan, igo lang

sa paglaway ang kabituonan. Sa dili
madugay, magsahog ang nagkadaiyang

pagbatyag sa kawanangan, ug ayaw
kabalaka kay kitang tanan maipisan.

--RAUL FIGUES
Oslob, Cebu