6.27.2011

Himungaan



(para kang Dr. Anthony Tan)

gitiman-an nako tanan nimong gisulti.
ang balakero, matod mo ngari nako,
usa ka himungaan nga galumlom
sa iyang itlog, gapaabot
kon kanus-a kini mahimong pisu.

buot kong hunahunaon
nga kon usa ko ka himungaan,
ikaw ang kanunayng mipatuktok nako,
ikaw ang naghapnig sakong itloganan,
ang nagpanday sakong batoganan.

tungod nimo,
nakakaplag kog igong disiplina
dili sa pagpanguhit sa balak,
kondi sa pagpaabot
kon kanus-a ko kuhiton sa balak;
ug igong pasensya
samtang gilumloman nako ang itlog,
samtang gapaabot ko sa pagkapusa,
sa pagkatawo sa pulong.

--GRATIAN PAUL R. TIDOR
Dakbayan sa Dipolog