9.18.2011

padigo-padunot*

mahinumdom ko niadto.

maghilak kong mopauli
mohangyo sa akong Lolo
nga buhatan na sab kog kasing
kay ang bag-o niyang
ginama tua, nagbuy-od samag patayng
sundawo human kunis-
kunisa sa mas dakong kasing ni
Naldo.

moagik-ik siyag katawa
dayog bulhot sa aso gikan
sa iyang hunsoy.

tulo ka adlaw
usa siya mahuman
ug tulo pod ka adlaw kong mag-apong.
laay ang pagpaabot.

kutihan kaayo siya. dili katingad-an
nganong ako ang dunay kinanindotang
kasing sa amoa. ako pod ang kanunayng
sigurohon ni Naldo. upat lang ka adlaw
ang lahutay sa akong matag kasing.

dili nako mahinumdon kon pila
ka kasing ang nahimo ni Lolo.
apan ning bag-o lang
mibalik nako ang iyang mga pulong
matag higayong ihatag na niya nako
ang bag-ong ginamang kasing.

Wanes, ang pagkulit og kasing
sama rag pagsuwat og balak o kanta
o pagpintal og obra.


apan wala ko adto makasabot.
padayon kong miduwa og
padigo-padunot.

----RICARDO PALMA
Isla sa Olango, Dakbayan sa Lapulapu


*padigo-padunot- duwa sa mga kasing diin ang tumong mao ang pagpulpog sa kaatbang pinaagi sa pagtamba o pagkanil niini hantud mabuak gamit ang hait nga lansang sa imohang kasing. -tagsuwat

9.15.2011

pag-inusara


ang imahe sa usa ka laking gaunay-unayg himas
sa iya samtang gatutok sa duha ka tawong nahiusa
diha sa tumang himaya, panit sa panit, singot sa singot,
kay usa ka imahe sa

pag-inusara.

--GRATIAN PAUL TIDOR
Dakbayan sa Dipolog

9.12.2011

balak sa sista


(sa ikasiyam nga buwan sa balakista)

nag-estambay lang siya
ibabaw sa lantay, naghuwat
kinsay mohiram
sa iyang gikurbadang hawak.

sa higayong may mosampit
sa iyang ngalan,
mosabak sa iyang lawas,
mokuskos sa iyang kuwerdas,
anha pa siya mopaambit
sa iyang gitagong musika.

usahay bugnaw siya sa dunggan
apan may higayong siya alingugngog
kay nag-agad lamang siya
kinsa ang naggunit,
naggamit niya.

ang iyang birtud
mohatag og kahigayonan
sa tanang gustong mopaambit
sa ilang tagsa-tagsang abilidad
pinaagi sa pagkuskos
sa iyang kuwerdas.

wala siyay gahom
nga motagik
sa iyang kaugalingong piyesa.

--PIERO ALDAYA
Carcar, Sugbo

9.09.2011

bulan


wa lang siguro nimo hikit-i, apan ako kadtong hilomon nga bulan nga miambit sa imong pagtikawtikaw, mitimbaya ug mitutok nga masinahon dihang imong hugtanon nga gipadayag ang timgas mong kaanyag sa kalibotan. ako kadtong malamdagong mipabadlis sa kahayag ug mihiwa sa imong pagpangaliya. wa lang ka masayod kay sa imong pagtando diri kanako, sa way pagpamilok, tuy-od mo nang gigasa ang imong himungaya ngadto sa baybayon. sa matag bag-id ug kiay sa takna, masinahon ako nga misaksi sa hinayhinay nga sinukliay sa kabubut-on. ang kada tikang sa tanyag giisip ko na nga kabahin sa imong kinatibuk-an. ug si kinsa man ako nga mokuwestyon sa kamas sa imong kabig? ako nga nagpahipi lamang ug nagpaabot nga gakson sa gahom sa pagdamgo? ug lurat nga naghuwat nga lilion sa lamat sa usa ka linalang? dugay ko nang gidawat ang kaangayan ug nakaamgo na ako sa kaakohan. igo na alang kanako ang higayon nga sa panagsa, lumsan mo ako sa kinawat nga katahom.

--MARCELITO NARVASA
Sibulan, Negros Oriental

9.06.2011

panid #6


Luyo sa among balay adunay dakong kahoy nga mamunga og ulo sa tawo. Kon tinghinog na, inanay ra silang mangatagak sa yuta dayon among pamuniton ug ipangtaod sa among mga liog.

--CD BORDEN
Mabolo, Dakbayan sa Sugbo

9.02.2011

danguyngoy sa giabandonang balay


pila ka tuig na kong
gainusarang gabarog dinhi
sa kangiob ug kahilom.

gimingaw ko
sa kuri-kuri sa kusina,
sa lalis ug labing-labing sa mag-asawa,
sa pag-unot-unot sa magsoon.

kaniadto, saksi ko
sa mga sekretong
gitrangkahan sulod
sa banyo ug mga kwarto.

apan niadtong
naminyo na ang mga anak,
ug gasunod nag pamauli
balik sa yuta
ang mag-asawa,

wa nay laing
gapuyo dinhi
kondi ang kahaw-ang
ug handomanang
giabogan
ug gipuy-ag lawa-lawa.

ug sulod sa katuigan,
hinayhinayng nawala
akong pagka balay.

--GRATIAN PAUL TIDOR
Dakbayan sa Dipolog