11.30.2011

nganong mas mabati nuon tikag wa ka diri



namilit sakong panit
ang salin sa imong pahumot.
mitapad nako
ang imong pagkawala.
migakos.
migunit sakong kamot.
sama kahugot
satong paggunitanay
kanang manabok tag karsada.

ga, nangalisbo na biya
ang nabilin nimong labhonon.


--GRATIAN PAUL TIDOR
Dakbayan sa Dipolog

11.28.2011

karsada


Karsada--
Sementadong agianan
Niining Siyudad.

Daghang mag-agi-agi
Padulong ngadto, paingon diri
May molabang, mourong
Mopaubay, mopaatbang.

Samtang ako
Ania sa Eskina
Namasin nga moagi
Ang buotang Propeta.

Karsada
Sementadong dalan
Niining Siyudad.


--ALAN K. CAÑA
Ward 4, Poblacion Minglanilla, Cebu

11.25.2011

AUBADE: HARANA SA KAADLAWON


(Hubad sa Aubade ni Philip Larkin) 

Ako gabuhat sa tibuok adlaw
sa gabii nahimong katungang hubog
Napagmata sa alas kuwarto punto
sa waytimik kadulom ako nagtutok
Unya sa inanay ang mga sidsid
sa kurtina nanamkon og kahayag


-MELQUIADITO MAAMBONG ALLEGO, MD
Palm Harbor, Florida, USA

11.22.2011

Pag-awit sa Akong Kasingkasing


11.19.2011

Mangga


Lisod dil-an
ang ginadili,
labi nang hubag
nga mangga nga naa
sa punoan ni Inday Eba. Nabuyod
akong panan-aw sa tumang kalunhaw
anang bambang bunga. Gidughit nako
ang mangga ug gisalo nako, aron di madaot
ang iyang kadasok. Gihinay gyod nakog panit
aron tibuok lang gihapon ang unod, ug gihiwa sa
kutsilyo gikan sa ibabaw padalus-os sa ubos, dayon
gidildil nako sa asin ug tuyo nga akong nakiriw sa su'd
sa iyang kusina. Gidimdim gyod nako ang lasa, ug
gasagol ang kaaslom ug kaparat sa akong dila.
Kada pisa nga hiniwa gikibkib ko ug gisupsup
puyra ang lubas kay pait. Kay morag bitin
kining makadiyot nga pista, mipiyong ko
aron tipigan ang kalami ning kalapasan.


--OTENCIO B. MAUTGANAN JR.
Apovel Subdivision, Cagayan de Oro City

11.16.2011

Ikaw ug Ako


Ang danghag makaipsot
 sa dughang way kamot.

-- Dr. Melvin Cortez,"Singsing: Bagting ug Kaliring"


I. Sa Kahayag

una miabot ang gugma sa way pagduha-duha
misunod pagdagan ang lubas tang katuyoan
bisan pa ang kalibotan wala ko gikauban
pagpangga ug amuma ikaw akong gisaloma

mga agiw nga napalid sa adlaw mihawid
ang kahayag nga ilad giukit ta sa palad
ug bitik sa saad ang mga titik sa panaad
kapalarang di masuhid sa hanging sinapid

padayon nga gipaligid tibugol kong pagsugid
saksi ang pagmanggad sa sinemana kong halad
ibabaw sa hilawng pagpasagad kita nangasamad
ug way sala ang paniid kay padayong gibag-id

ang hait nga katawa nga mipahit sa pangagda
sa kainit sa atong bugan nagmugnag balayan
ubos sa hinog nga bulan mipahiyom ang duyan
didto kitang duha naginukdanay sa ginhawa


II. Sa Kangitngit

human sa talikdanay dali kong gisubay
ang agiw ug talithi sa pikas nga kinabuhi
dali kong gilingi gilili sa saming liki
liboan ka dagway sa pikas nga kalipay

ang kahilom namaak sa kahilom nagsabak
ang kagahapong ngilo sa higdaanang bildo
way bili ang pagtuo sa kahingpitan kay luyo
sa hungaw nga bahakhak way dughang giagak

sa ngulngol nga lawak sa lumoy nga balak
sa mga panid sa libro sa tumoy sa akto
sa pahiyom sa kuwadro sa ungol sa kwarto
naminaw sa hilak usa ka magul-anong buwak

human sa talidhay gihipos ko sa inanay
padayong gipakli ang hinapos nga pagbati
nga di na mabakwi nga di ko na mauli
anino sa imong dagway hugot nga kalaay


--MARCELITO NARVASA

Aloquinsan, Cebu
2009

11.13.2011

Pabukal


Hagoka ang akong garay,
Huyang ang pagkahan-ay.
Naaghat ka sa pangindahay,
Kaugalingong balak ikaw magpanday.

Natandog ka sa akong balak,
Gikuptan Ikaw ug giagak.
Mibarog ka ug nangandak,
Mas maayo kang magbabalak.

Di ko igsapayan nga sawayon,
Mga pagdayeg dili mahinungdanon.
Sa paggaray ako mopadayon,
Tinukmod ning kalag kong mamugnaon.

Mga balak kanunay kong bitbit,
Kalipay ko ang pagpaambit.
Pangandoy ko nga kabugnaw mo malaknit,
Kamamugnaon mo mobukal, moinit.

Duol kamong mga malipayon ug magul-anon,
Mga gilaayan ug mga madasigon
Ipabuhagay tinagoang mga pagbati,
kalipay, kaguol , kahigwaos, kalami.

Kaamgohan atong ablihan,
Kalag atong buhian.
Ihurot tang kusog sa atong galamhan,
Tibuok kalibotan atong balakan.


--ALAN K. CAÑA
Ward 4, Poblacion Minglanilla, Cebu

11.10.2011

Ikaw Ang Rebolusyon


Walay hunong ang wali sa dalan
Sa mga walhon nga daw nagyawyaw.
Bisan gipagaw na ang tutunlan
Mao lang gihapon ang gisangyaw.

O kini ba gayod ang solusyon
Sa nagkadaiya nga gumonhap?
Usa ka mini nga rebolusyon
Sa mga bayani nga inihap?

Di kaha kini usa ka dula
Sa mga tawo nga hakob og gahom,
Nga gigamit lang ang Itom-Pula
Tungod sa kahangol nga gihilom?

Atong buhaton karon ang ugma.
Atong kanunayon ang sulagma.


--KOMANDER ROBOT
Jolo, Sulu

11.07.2011

Adunay Ubang Bulak nga Lisod Kutloon


Susama sa mga bituon
nga gipanglatag sa langit
nga dili gayod nato makab-ot

igo ra kita mosud-ong
mopangagho ug modayeg

niining mga manulonda
nga nagkidlap-kidlap

hain ubos
ikaw naghangad
ug hilom nga nangandoy.

*

"Daghan pa og isda sa dagat,"

matod niya
sa dihang gitanyag ko
ang akong gugma.

Apan, inday, nasayod ba ikaw
nga ang gugma dili isda
nga kon nanginahanglan
modalikyat lang dayon kita
sa halapad nga taob
aron mamingwit,
mamasol o manginhas?

Ang gugma
morag bulak
nga lisod kutloon.

Molawos ug mamatay lang kini
kon wala na ang pagbati
sa binuhat
kansa gipitik
sa kasingkasing
nga intawon naghulat.

*

Sanglit karon
moabot ra ang panahon
nga imo akong hikalimtan.

Una,
ang akong panagway.
Ikaduha,
ang akong ngalan.

Apan tuod man
dili ako angayan
maghinuktok sulod
sa lawak sa paghandom

kay usa ka adlaw
sa imong katigulangon
moduaw lang unya ako
sa imong panumdoman
ug basin— pamasin lang— 
makahatag ko og pahiyom
sa gum-os mong mga ngabil.


-DR. MELVIN CORTEZ
Sunny Hills, Talamban, Dakbayan sa Sugbo

11.04.2011

Triple A: 3 KA MANANAMBALAK


(Allego Almagro Amper)

Mananambal ug Magbabalak
Propesyon ug Parnasongbisyo
Katungdanan ug Kalingawan
Kapikas ug Ikaduhang Bathala

Doble ang kabalaka kahigwaos kahiwasa
Doble ang katagbaw kalipay kahimuot
Doble ang bantayog
Doble ang lapida

Duhay kalibotan usay handomanan dadangatan


Nota Bene: Natagik kini sa wa pa motaliwan
si Dr. Rene Estella Amper sa Enero 24, 2007
(mayor pa siya sa Boljoon kaniadto).



-MELQUIADITO MAAMBONG ALLEGO, MD
Palm Harbor, Florida, USA

11.01.2011

Hudyaka


Ang tikbalang nanaghoy samtang nagbras sa iyang sapatos. Ang agta midagkot na pod og lain nga tabako. Ang duwende nangharana sa silingan nga uhong. Wala pa mibangon ang bampira nga nahinanok sa lungon. Ang santelmo miiwag sa kangitngit mao akong nakit-an ang katunga nga lawas ni misis sa nataran. Ang among masuso mihatag kanako og lantip nga pahiyom gikan sa iyang duyan. Ug ako, akong gipangbuhian ang mga sigbin sa ilang hawla aron makapanguling.

--CD BORDEN
Mabolo, Dakbayan sa Sugbo