4.30.2012

lamano ug pakpak


Lamano: Duha ka kamot sa duha ka tawo
Nga usag-usa may duha ka kamot, tuo ug wala;
Kon ang nanagpig-itay tuo o wala ba---
Kini dili mao ang kabililhon; ang angayng
Sukdon mao ang kainit sa duha ka palad
Nga buot mokumkom sa lima ka tudlo sa usag-usa ---
Kon ang mga dagaang nga nagkadaitolay
Nagagikan ba sa mga lanot sa kasingkasing
Nga wagas, tiunay ug hamili; dili sa gium-om
Ug giigang nga mga singot diha sa nagkalidades
Ug nagkayamukat nga mga badlis sa palad
Nga nagpakaaron-ingnon... nagpakaaron-ingnon...

Pakpak: Duha ka kamot sa usa ka tawo
Nga may usa ka tuong kamot ug usa ka walang kamot
Nga nanagpingkiay, nanagtambolay sa usag-usa ---
Samtang ang Mananaog sa Kabantog nagsaka
Sa entablado sa pagpasidungog--- Dinhi, ang labing
Mahinungdanon dili mao ang kalanog o kasipa sa mga
Dalugdog, kondili ang kamatinud-anon sa paghayon
Sa mga abaga aron mahakgom ug maugom sa duha ka
Palad ang mga hinagtok sa duha ka sapatos

Didto sa plataporma... sa plataporma...
Lamano ug Pakpak: Duha ka kamot sa duha ka tawo,
Duha ka kamot sa usa ka tawo--- Ang tuo modawat
Sa tuo, ang wala sa wala; Ang tuo mountol
Sa wala, ang wala sa tuo: Apan, kini sila mao
Lamay mga lamas ug pahumot sa taob ug hunas
Nga dula sa kinabuhi; kansang dikabakikaw
Sa nanagsingki nga mga tudlo dili masundog sa
Sugamak ug hinayak sa duha ka tiil sa nagdagan
Nga Dumuduong Panahon...!


-MELQUIADITO MAAMBONG ALLEGO, MD
Putat, Tuburan, Sugbo, Pilipinas

4.28.2012

pahimangno


ikaw kansang nanag-iyag daghang dagom
ug dunay didal sa tudlo,
ang imong kasingkasing
almahadon.

-CD BORDEN
Dakbayan sa Sugbo

4.26.2012

eskina


Nawani
ang Buwan
sa sulirat
sa mga suga
sa dagkong
motel
tindahan
ug kalsada
diin hagawhaw
ang katawa
sa mga batang
gabato-lata


-noel p. tuazon
bingag, dauis, bohol

4.24.2012

bulawang anibersaryo


Kalim-an ka tuig...
Hain na ba ang trahe de boda?
Guniti ang namugnaw kong mga kamot
Sahi niadtong usa ka halandumong buntag
Samtang nagsubay kita sa alpombra:
Ah, pasagdi ang atong mga apo Jack ug Maxie
Nga nahitukiking nagkanayon---si Lolo ug Lola baya!
Hain na ba ang singsing?
Buhi pa ba kaha si Padre Jose Montecillo?
O, mga tuig, mga tuig!
Ikaw mao lamay alang kanako...
Ang handumanan sa panaghiusa sa atong mga dalan
Giawit sa mga lingganay sa kampanaryo sa Bantayan
Ikaw ug ako nagpabiling USA nga maunongon
Bisan pa sa pagpanguban sa mga dahon
Ug pagpangataya sa puthawng kabaskog ug kalagsik
Oh, igo na ba lamang kita sa pagpanghupaw
Ug pagpangindahay human sa kalim-an ka tuig
Nga pagtagayay sa alak sa luha ug katawa:
Tin-edyer kong Kapikas?


-MELQUIADITO MAAMBONG ALLEGO, MD
Putat, Tuburan, Sugbo, Pilipinas

4.22.2012

si veronica nga way panyo


ang gikapoyng kristo mopahid sa iyang singot ug luha sa hubong lawas ni veronica. wagtangon ni veronica ang kauhaw sa paghalok sa ngabil ni kristo ug ang iyang lipstick motapon ngadto sa baba ni kristo unya molama kini sa nagkalain-laing bahin sa lawas ni veronica.

inig biya na ni kristo aron mopadayon sa iyang panaw, trapohan na lang ni veronica ang iyang mga luha sa iyang puwang panty ug bra nga puniton niya ubos sa katre. isul-ob niya kinig balik ug mag-atang na sad siyag laing gikapoyng kristo nga nagkinahanglan og buhing panyo nga mopahid sa iyang kakapoy.


-PIERO ALDAYA
Carcar, Sugbo

4.21.2012

BALAKISAW: Kalit Pagkapulak ni Icon Dick Clark


Sa edad 82 kalit naminhod ug napusgay ang kasingkasing
sa kinatigulangang tin-edyer Mga saksi ang mga sayawit
nilang Elvis Presley Buddy Holly Chubby Checker Madonna
ubp. Nalingaw kita sa 1960 Rock n'Roll era ingon man
sa New Year's Rocking Eve sa Times Square Sentimental
ang atong gibati karon apan adunay konsolasyon: Ang host
sa American Bandstand adunay bag-ong Heaven Bandstand
Nobyembre 30, 1929-Abril 18, 2012


-MELQUIADITO MAAMBONG ALLEGO, MD
Palm Harbor, Florida, USA

4.18.2012

haya


andam nang bilaran ug sugdan ang siyam ka gabiing pangadye sa akong patayng kasingkasing. kinahanglang dili ukbon ang itom nga kuwadradong lungon diin sulod niini ang nagkadugong kasingkasing nga gipatong sa unlan. gi-murder ang akong kasingkasing sa di-na-takos-ngalan nga linalang. ang tanang mamilar kinahanglang magsadya ug way kataposan ang kalipay. dili na kini misahan, idiretso na lang sa menteryo. ibundak ang lungon sa gikawot nga lima ka dupa. takoban og yuta. biyaan. ug kalimtan.

inig ka gabii sa lubong, lahos sa balay sa di-na-takos-ngalan nga linalang. gihaya na ang patayng lawas niini. didto, ang tanang mamilar kinahanglang magsadya ug way kataposan ang kalipay.

-PIERO ALDAYA
Carcar, Sugbo

4.16.2012

di na ko kaagwanta


porbida ining imong panaad nga magpuasa hangtod sa kwarenta diyas
mahilaguso ta niini: sa unang lugar wa ka mananghid o mokonsulta
kanako nga diha ra sa imong tupad nagluhod nangiliyupo nga unta kita
magmahimsog ug tugahan sa tumang kabaskog sarang ikasugakod
sa mga kombate ning kinabuhi
nalimot ka ba pinangga nga ang pakighilawas maoy usa ka balaanong
higayon kanus-a ang tipik sa langit gaagos ngadto sa nagnganga nga yuta?
paita ini uy di ko katulog di ko mahimutang nag-alindasay ako sa kahidlaw
maayo pang maghikog sa punoan sa sibuyas
o di ba mangluod molupad ngadto sa Pinas
sa di pa ang banagbanag maghukas


-MELQUIADITO MAAMBONG ALLEGO, MD
Palm Harbor, Florida, USA

4.14.2012

BALAKISAW: *Hapit Mabiktima sa Racial Discrimination


ANG LABING NINDOT NGA MAG-AAWIT
WAD-ON TUNGOD SA BULOK SA PANIT?

*Giluwas si JESSICA SANCHEZ (Pilipina-Mehikana) nilang Randy Jackson,
Jennifer Lopez ug Steven Tyler, mga tarong maghuhukom
sa American Idol.


-MELQUIADITO MAAMBONG ALLEGO, MD
Palm Harbor, Florida, USA

Pagmonghe


kang Glenn Tek-ing MuƱez

Naughan nag biga ang imong tinta
Sa pagkiyod sa metapora
Ug di na ka gustong mohapyod
Sa lawas sa papel kay buot na nimo
Nga mahanaw ang imong anino.
Pagmonghe nalang sa kangitngit
Ug kahilom, amigo.


-KEVIN LAGUNDA
Pagsabungan, Mandaue

4.12.2012

HULYO 8, 2011: Siyentipikong Paghandom sa Kataposang Lupad Sa Atlantis


Pataas sa kawanangan nagabulhot
Galiyubaw upat ka mga astronot
Nagkayabkayab sa kapunawpunawan
Kanus-a mamalhin atong katumanan?

-MELQUIADITO MAAMBONG ALLEGO, MD
Palm Harbor, Florida, USA

4.10.2012

BALAKISAW: HUDAS 3:16


Tawo-tawo sa kahumayan
ang ilang gilansang sa krus.


-CD BORDEN
Dakbayan sa Sugbo

4.09.2012

BALAKISAW: kataposang panihapon


kaniadtong bata pa ko, mag-ilog mi nilang manoy, ate ug kuya sa duha ka buok isda inig humag prito ni manoy didto sa among abohan. kasab-an dayon ming papa ug ingnan mi nga dili mag-away. ug tungaon na ni mama ang minantekaan ug ibutang sa tagsa-tagsa namo ka plato. hukaran ko ni ate og bugas-mais. ug usa sugdan among panihapon, mag-ampo magpasalamat mi sa grasya nga among nadawat. ug inig human og kaon, hiposon dayon na ni kuya ang among mga plato ug si ate ang manghugas sa banggera.

karon, ang among lamesa napuno na sa daghang klaseng pagkaon. may paborito nakong humba, sabaw sa linat-ang sobra namo pagpaniudto, mangga ug humay na usab ang among kan-on. apan kaming tulo na lang ni papa nga nag-antiyohos na ug ni mama nga puti na ang tanang buhok ang mangaon. tua na sa abroad si manoy ug ate samtang nagtungha na sa kolehiyo sa dakbayan si kuya. inig human namog pangaon, ako na ang manghipos sa among kinan-an ug manghugas sa among lababo nga de-tiles na. unya, i-double-check nako kon naimpake na ba sa maleta ang tanang gamit nga akong kinahanglan. ugma sa buntag, moabot si kuya ug kuhaon ko niya kay adto nako moistar sa iyang apartment kay mag-nurse na ko.


-PIERO ALDAYA
Carcar, Sugbo