7.23.2012

mga taluto


Mga mananap nga abohon lamang
Nga mokamang-molusad sa ang-ang
Sa nanagtikyop nga kangitngit
Aron paghalok sa yuta sa langit

Usa ba ka ritwal pamatasan
Kon usa ba ka pangaliyupo?
Unsay anaa sa yuta nga wala sa
Langit? Usa ba kini ka pagtimbaya
Sa nahalangit ngadto sa nahayuta?

Kita nga ania na sa itaas
Makahunahuna pa ba sa gigikanang
Silong? Ug nahinulong kita
Sa pasunding sa mga ikogang
Mananap nga nanaghalog sa mga abog

Samtang ang mga lingganay sa orasyon
Mialingawngaw tadlas sa tigmi
Nga dughan sa lamparilyang kahaponon:
Ang mga mananap ang mga mananap
Sa kisame nanag-iyahay pagkanaog

Usa ba ka pagduko sa habog nga garbo
Kon usa ba ka matang sa pag-ampo?
Kayha usa lang ka pahinumdom nga:
Sa kagikang abog kita balik pauli


-MELQUIADES MAAMBONG ALLEGO, JR., MD
Palm Harbor, Florida, USA

7.21.2012

BIOPSY


Ginong Pasyente Meldito,

        Kami malipayong nagtaho
        nga ang pulang bulok galiyok
        sa kinatawo mo dili kanser
        Ay lipstik lamang diay kini
        Poreso gikasubo namo
        ang pagputol sa imong ulok.


-NICK LOPEZ, MD
Kissimmee, Florida, USA

7.20.2012

NAGPADAYON ANG 74 KA TUIG NGA HULAW SA WIMBLEDON*


(HAIKUPANGAGHO)

SI ANDY MURRAY
BUGTONG GARBO SA ENGLAND
LIGAS GIPILDE

*Si Bunny Austin maoy kataposang British nga midaog sa Wimbledon sa 1938


-MELQUIADITO MAAMBONG ALLEGO, MD
Palm Harbor, Florida, USA

7.19.2012

LUHA



(l
u
 h
   a
m
 i
d
a
  g
y
d
   a
    y)

gikan sa mata
paingon sa aping
didto sa ngabil

-MELVIN CORTES
Dakbayan sa Sugbo

7.18.2012

Kabahin sa akong damgo


Nahibulong ko
nganong sige ra kog damgog barko
diin usa ko sa mga pasahero.
Di ko katugkad sa buot ipasabot niini.
Ang barko, usahay, modagan
sa kamad-an. Wa kini malunod.
Balik-balik lang kini sa pagbiyahe
gikan ug paingon sa akong gigikanan.
Ang mga pasahero puros way nawong,
way tingog, ug wa ko kaila sa ilang ngalan.
Igo ra sila mosakay ug mokanaog.
Dili masupilon ang dagat
apan masul-obon ang mga balod.
Ug ang dagway sa langit
way kalainan sa lawod.
Wa ko masayod unsay buot
ipasabot sa akong damgo.
Apan kada mata nako
tungatunga sa kaadlawon,
mangurog ko sa kahadlok.
Ug di nako malikayan
nga maghunahuna
sa mortalidad sa tawo—
nga way kailanan ang pagkatawo
ug kamatayon,
maingon nga usa ra ang gigikanan
ug gipadulngan sa barko sa akong damgo.
Nga ang kamatayon
nahisama adtong wa pa kita matawo
diin ang tanang butang
way dagway ug way ngalan.


-GRATIAN PAUL TIDOR
Dakbayan sa Dipolog

7.17.2012

DI MO HANDOMON DI TA PALAD NGA MAGKADAYON: UNSA KAHA NO?


Unta tamnan mog mga bulak ang akong mga tunob
kay tungod kanimo
nagpagabii ako sa mga kandilang kagabhion
nagpakatipik sa mga matang nagpirok-pirok:
Kay ako may Magdadasig

Ang mga titik nga gipatik mo sa akong ngabil
wa ko gayod kalimti
sa dihang nakab-ot ko nang gipakamithing tingusbawan
Ngani nagpaulipon man ako sa gitipigan
kong larawan mo
Bugtong kong katedral gitagana kanimo

Kagahapon nagpalubong ako sa mga puting bunbon
sa gimahal tang baybayon
Tua pa ang mga bilyakong balod nga nibanlas
sa mga pangako nga gigambalay ta:
Unta di mo handomon ang Kapalarang nagluib kanato......

-MELQUIADITO MAAMBONG ALLEGO, JR., MD
Palm Harbor, Florida, USA

7.13.2012

N-H-I-A-B-K-N-U-I


          usa (ka ma)suso 

dayon:

           batang bulingit

           k-n-h-i-a-i-b-u

ulitawo ug dalaga

k-i-h-a-i-b-u-n

                     naminyomanowala; 

           k-i-n-h-a-u-b-i

pobre/dato,tapolan,way grado

           k-i-n-a-u-i-h-b

naghikogkaydilikahuwatmamatay

           k-i-n-a-b-h-i-u

tiguwan(G)asungkod

           k-i-n-a-b-u-h-i

gihiposan (sa sam-)ang

kinabuhi

-MELVIN CORTES
Dakbayan sa Sugbo

7.11.2012

hoy, ikaw nga nagbasa


duna koy pipila ka pangutana
mahitungod sa imong kaugalingon

mahitungod sa imong kinabuhi
mahitungod sa imong paghigugma

ug aron sab makiangayon
pangutan-on ko sab akong kaugalingon

sa susamang mga pangutana
unya pangutan-on dayon tika

nganong nalambigit man ta
labi na kon buot hunahunaon

natong duha
ako ra may nag-estorya?

(sigon sa '"on the wall" ni Craig Hill)


-RICARDO PALMA
Sta. Rosa, Lapu-lapu, Cebu

7.09.2012

ha?


unibersal nga pulong nga pangutana
nga kahikurat nga kalit kahingangha


-melquiadito maambong allego, jr.,md
palm harbor, florida, usa

7.07.2012

SULATGUGMA


gihay sa gihay
punoan sa punoan 
akong gisabot 
ang ahog 
sa iyang gugma.

-MELVIN CORTES
Dakbayan sa Sugbo

7.05.2012

TABANOG


Gitugpo ikaw sakay ang kinatibuk-an
Sa akong mga pangandoy:
Bisag dili ko tuyo pagkab-ot sa langit
Tinguha kong mohalok sa mga panganod---
Kay unsa bay mawala sa pagsulay?

Ug ning imong paghirighirig
Ug pagkindangkindang sa kahitas-an
Kay lagi nakadaitol ka na man sa aping
Sa hataas nga katilingban: Nahimuot ako---
Bisan pag ako nasayod sa dadangatan

Ug gipadahunog ug gipahadyong ko ikaw
Tadlas sa lawod sa bughaw nga kalangitan:
Ako nga naggunit sa imong tugot
Mihigda sa dughan sa berdeng laguna
Nga nagpangamay sa imong pagbalik

Takulahaw lang gigisi sa Upat ka Hangin
Ang hubog mong bayhon: Ug ikaw mitiurok---
Gipaabot ko ang nagusbat mong kalawasan
Dinhi ning balilihan: piniyong king mga mata
Kay buot kong hawiran ang mga luha...

Ugma puhon magpalupad na upod akog
Laing tabanog:
Kay ang pagtugpo og daghang mga tabanog
Mao may sukdanan sa akong kalig-on
Atubangan sa katalagman kasakit ug kapakyasan!


-MELQUIADITO MAAMBONG ALLEGO, MD
Putat, Tuburan, Sugbo, Pilipinas

7.01.2012

Karong gainusara kong nakigkombate sa hilanat


misantop nako
nga ang gugma
ingon pod diay katam-is
sa 8 oz. nga Royal
nga maoy pirmeng ipainom
ni mama kanako
kada hilantan ko
kaniadto.


-GRATIAN PAUL TIDOR
Dakbayan sa Dipolog