3.31.2012

Mga Tuki sa Tan-awan


Sa asang paraiso man ang inyong kagikan?
Sa asang gasang man ang inyong gidak-an?
Sa inyong pagtunga ubay ubay kaming nangalipay
Sa inyong pagtunga ubay-ubay ang among nakaila
Unta adinhi nalang mo magpakalipang
Unta adinhi nalang mo magpakatigulang.

Sa among kakabos nakita ang dakong paglaom
sa kapunawpunawan daw nagkahayag nga kaugmaon
Kamo ba ang instrumentong gipaabot sa kahitas-an
Kamo ba ang makapabag-o sa among kahimtang
Andam kaming mosiksik sa imong gikinahanglan
ug andam mopanalipod sa imong kalikupan

Takulahaw lang miuswag ang among baryo
Ubay ubay ang gibubo nga mga proyekto
Mapasalamaton kami sa imong kaayo
Mapasalamaton kami sa katingalahan mo
Bisan Kahadlukan ang imong gidak-on
Kalipay namong mga adbentyuristang magpaduol

Sa kanhianyg panahon pa ang inyong pagpakita
Sa ngadto ngadto giisip kamong higala
Kalipay man namo ang pag-atiman ninyong tanan
Ug ang pagpangita sa inyong panginahanglan
Molungtad ba'g Katuigan ang atong pagkauban
O dawaton ang kalit unya ninyong pagkahanaw


-AURELIO ELISEO
Cobong, Oslob 6025, Cebu

3.28.2012

Pedophilia


Dimapugngang kaibog sa mga lapyo. Kahibudngang kompulsyon
pantasya alang sa mga inosente birhen hambon angheles presko
bag-ong haon. Bigaong pagpaniplat sa mga biyoos binhi putot
kuyabog. May nipis linyang utlanan sa moral legal nga tulubagon
obligasyon. Adunay nakigtipontipon nga mga sicko yabag weirdo
uban kanatong gakumpiyansa lang nagmatag buntag wamagdahom.


-MELQUIADITO MAAMBONG ALLEGO, MD
Palm Harbor, Florida, USA

3.25.2012

panid #11


Adunay langaw nga mitugdon sa atngal sa usa ka babaye. Yuna ra! Wala man diay kini mitugpa lang kondili misupsop kini sa gatas sa atngal. Ang langaw mao diay ang iyang bugtong anak nga lalaki. Dihang nabusog na, milupad kini paingon sa iyang amahan kansa nangibot og ngipong-hingo gamit ang puting hilo.


-CD BORDEN
Dakbayan sa Sugbo

3.23.2012

BALAKISAW: ROSHON FEGAN: KATUNGA PINOY SA SEASON 14 SA DANCING WITH THE STARS


Ang-ang tisoy Pilipino
Mubog ilong hip-hop dancer
Pardner ni Chelsea Hightower
Hoy dude cool numero uno


-MEL MAAMBONG ALLEGO, MD
Palm Harbor, Florida, USA

3.21.2012

Linog


Karong taknaa nangalumpag
ang lawak sa iyang hunahuna
kay giagihan kini og linog
gikan sa iyang dughan.

Gahapla ra siya sa kama
samtang nangahugno ang tanan
niyang nangakit-an, ug igo ra siya
nagkab-it sa bukton nga iyang

giabiabi ining mubo nga higayon.
Wala siyay mabuhat kondili mag-agwanta
taman sa kataposan nga takna
nga inig kalma sa kino

puniton niya ang mga tinumpag,
susama sa iyang bistida ug bugkos
nga gihalad sa mga minahal
nga maoy makahamong

kining matang sa katalagman.

-OTENCIO B. MAUTGANAN JR.
Cagayan de Oro

3.20.2012

BALAKISAW: Lenten Season: Ministro sa mga Tawo


(Alang sa akong humagbos, Lay Minister JACK ABANO sa St. Peter's Church
Bantayan, Sugbo)


Alagad sa Diyos, halili sa pari
Sulundong linalang, tadhang disipulo
Gasunod sa tunob sa gamhanang Hari
Gipanglukdo ang mga tunok sa ulo

Kinabuhi natugob sa sakripisyo
Gasubay sa dalan-dalan sa katarong
Way sapayan gitas-on sa edipisyo
Basta lunlon sa balaanong kaambong

Init ug ulan imohang gisagubang
Pagpangita sa langit dinhi sa yuta
Sa Labawng Maghuhukom unya atubang
Kasingkasing ug kalag migilak mutya

Padayon sa imong pagkahigugmaon
Taliwala sa nasaag isigkatawo
Lalang tahom damgo ug damang langitnon
Sa alampoanan ikaw ginabayaw!


-MELQUIADITO MAAMBONG ALLEGO, MD
Palm Harbor, Florida, USA

3.19.2012

mga snowbird


Karong buntag ang mga sandalyas sa Manhattan ug Atlantic City
nanuroy na sa aseras nga polbos lapyahan
Si Paul Anka ug Justin Bieber nagduweto og mga konsiyertong
Montreal o Toronto sa Ruth Eckerd Hall ug St. Pete Times Forum
Ang mga buffalo sa Wyoming ug Montana gakayak
sa De Soto Park ug Sebastian Inlet

Naghugyon nahibalik nagkapakapa na upod ang mga snowbird
katap sa sabakan sa dalangpang Florida
hain ang tinipigang pako sa tinakpang kondo?


-MELQUIADITO MAAMBONG ALLEGO, MD
Palm Harbor, Florida, USA

3.17.2012

gugma


-BALAK ni Kevin Lagunda
-DESINYO ni Piero Aldaya

3.15.2012

Chance Encounter sa Library


Nagpasumangil ka sa pagpakli-pakli
sa mga dahon sa imong libro.
Kining naglingkod sa imong atubangan
pasagdi nga nagpaulipon sa imong
mga pasiklap.
Ug ang kahilom nagahulat... nagahulat...

Ug ang mga rosas nga mikatap
sa talad gisab-it ko sa mga plorera
nga nangumbitay sa imong
mga pilok.

(Tabi, mahimo bang isulat ko ang akong
ngalan sa imong palad, Gining?)

Ug ang kahilom dili na amang nga mga
Rosas. Gilaksi mo ang mga gihay
ug gipalupad taliwala kanato.
Inanay natagak ang pahiyom mo ning
dughan.

(Unya, gitunol mo ang lumoyng palad
lakip ang imong mga kandiis
nga nahagkan sa giukoban tang mga gutlo.)


-MELQUIADITO MAAMBONG ALLEGO, MD
Palm Harbor, Florida, USA

3.13.2012

Lukay


Sa kainit sa higayon, benditahan na nila ang lukay nga gipormag krus nga inig abot sa balay isuksok sa pultahan aron moabog sa mga maligno, wakwak, di- ingon-nato ug liti. Igkahuman, walay laing maukay kon dili ang mga hulagway sa kaban nga gilumotan samtang ang binignit ug biko sa kaha gitilaptilapan sa iring sungkaban ug ang mga tulumanon sa kiblat nga kahaponon nga gibituonan ni Nora Aunor aron mopasibya nga "Walang Himala!" ug posible sad nga makataghap og live show sa dalan diin si Kristo Bargayo mohunad na sad sa samad sa palad aron magpalansang alang sa tanang kalapasang giwagtang sa Mesiyas ug aron matuman na ang giatang-atangan sa tanan diin ang pagmuro sa Biyernes Santo makapaitom sa hilom nga Sabado. Inig ka ugma, kon di ka makakita sa imong itlog, kuhaa lang ang lukay nga imong gisuksok ug sa kainit sa pagkabanhaw mao kini ang idabdab ni Hudas nga sa makausa pa, nabuntagan sa dalan nagpaabot nga madakdakan sa tanang tampalasang nabug-atan sa kasal-anan.


-MARQUIS DE KINTOLIMBO
Moryomoryo, Sebu

3.11.2012

BALAKISAW: JESSICA SANCHEZ: UNANG PILIPINANG KAMPIYON SA AMERICAN IDOL?



karong buntaga
himamata
pamatia
namukawng siloy
kunsad sunanoy
maria clara


-MEL MAAMBONG ALLEGO, MD
Palm Harbor, Florida, USA

3.09.2012

Pilosopiya de Rebolusyon


Sa talawan ug isog,
Hain ka modapig?

Ako, sa talawan.

Ngano?

Kay kon mahurot na
Ang iyang talaw

Ang kaisog maoy magpabilin
Ug mopatigbabaw!


KOMANDER ROBOT
Jolo, Sulu

3.07.2012

Tahod sa ulo, diha sa Buwangan ngadto sa Sug-angan



O! dyesti! dyesti!
dungog ni Tiyo sa layo
abi niyag namisti
ang pusta sa kontra
ning papel nga kwarta
di halos mokatawa
kay si Tiyo maoy
nagbitbit sa bihag
ni Manoyng taka lag hamag.

Ug sa balay,
nagpanilap god ang baga
sa kalderong nagtik-ing sa pag-alsa
sa iyang lawas, nga gitaklobag
mga lamas ug sarsa
aron madali malata
gidat-ogan ang dughan sa bihag
ug ice tupad sa nagsinapawayng
binukal nga buwa ug gata.

Apan luyo sa balay
diay nagsiling mata
ug tahod sa ulo haskang taasa
daw kalabukon sila nga nagtan-aw
nilang Tiyo nga nangaon ning gabhiona
sa wa ka hibaw-i, gilaytan sila
ug sa hait nga atsa
mura silag mga nagkatag nga kutsara.

Misuway pa unta ko
sa pag-uli sa gigamit kong plato
apan sama lang ako sa ice
ibabaw sa nagbukal nga buwa
ning balayng gihagwa.


-RALPH OCANA
Dakbayan sa Sugbo

3.05.2012

Yelosayaw


(kang michelle kwan)

nagkintokinto dailos sa yelo
nagkapakapa a la kabakaba
sayawpares tugahala
tahoming arte mibuylo


-mel maambong allego, md
palm harbor, florida, usa

3.04.2012

BALAKISAW: fuck you


(1)

Si Jesse Jackson III nakadawat og welfare food stamps
unya nag-drive og pulang mustang padulong sa Walmart
Publix flea market ug Salvation Army

(2)

Si Al Sharpton IV nagbakasyon hapit upat na ka tuig
kay gipadad-an sa federal gobyerno og monthly unemployment
benefits. Wa mangitag trabaho. Tua nagbaraha o nagmadyong

(3)

Ang mga Wall Street CEO sa Fannie Mae/Freddie Mac
(gi-bailout sa kagamhanan) gadawat og minilyong bonus
naglulinghayaw sa Bahamas. Mga homeless nangligdas sa aseras


-MELQUIADITO MAAMBONG ALLEGO, M.D.
Palm Harbor, Florida, USA

3.03.2012

Nagpahiping Baso


Sama sa nagsingot nga panit
sa basong imong gigamit
paninaw nako ingon ato sad ko
nagpaabot nimo, apan bugnaw kaayo
sa akong gilagmon
ikaw ang akong handomon
unta ganahan ka.

Apan kon motulo na
ning natigom kong singot
usaron ko kini
ug unta suwayan ko nimog yarok
kay basin diayg tambal ko
imong sid-ok.


-RALH OCANA
Dakbayan sa Sugbo

3.01.2012

NOBYEMBRE 25, 1968: KANIMO, GINOO PUTING DAGANG


Kitang mga tiil naglakat ning lasang
Sa Ulan, sa Ulan.
Ang mga diwa nga magkaluha ang panaw
Sa kainit sa Alak Magdadasig
Maoy kopita kanatong mga Bathala:
Unsaon ta pagtagay ang mga luha
Ning Gabii?

Magpadayon kita pagpahilayo, pahilayo
Ning Kasingkasing sa Kangitngit
Samtang nahinanok ang kaalindanga
Sa mga Ngabil
Ug nanagpanayaw ang mga lamok ning
Atong Dakbayan:
Unsa ba unya ang kahulogan sa Ulan
Taliwala sa kahayag?

Wala Ric, wala Ricardo
Walay Balak nga mopasilong ning atong
Mga lakang nga nasangit sa Bahalina
Kon dili ta taakon ang tumog
Nga Dalan padulong sa mga Dagitab:
Kay ang atong Musa nasayod
Nga king kadulom ning Gabii ibanlas da
Ning Ulan,
Ibanlas da, Lotong...


-MELQUIADITO MAAMBONG ALLEGO, MD
Palm Harbor, Florida, USA