paminaw sa kadiyot


Gusto kong mobukwas
sa hinayhay sa inyong nataran,
apil na kadtong mga hinayhay 
nga nahulog sa yuta,
imo lang gipasagdan
kay nabulit na sa mansa sa lapok,

Ug kon imong itugot,
pug-an ko na sa akong mga gakos,
simhuton matag sidsid,
memoryahon imong baho,
pil-on kog usab,
hinayon paglatay akong mga kamot
aron dili makum-ot.


-JIN GARCIANO
Dakbayan sa Sugbo

hamok sa kahiladman


(usa ka pagpamalandong)

Masanag ang kahaponon.
Ang mga panganod sa sidlakan
minunot lamang sa hinayng gimok sa hangin.
Ang isla sa Sugbo nagpabiling malinawong
naghandukaw, daw usa ka binuhat
nga nagsud-ong sa madanihong lumba
sa gagmayng balod sa gamhanang Tanyon.

Ug naglingkod ako,
usa ka kalag, kansang mga mata
napunting sa naghuliyawng kabataan,
nanaggukdanay sa ibabaw
sa maigang kabalasan.
Ug diha sa ilang kadasig ug katiunay,
mitukbil kanako ang kahilom--
kahilom nga inanayng mikuyanap
ngadto sa kinahiladman sa akong pagkaako.

Ug nahimugso ang usa ka pangutana,
“Asa man ang ilang padulngan?
Padayon ang ilang pagdaghan
samtang padayon ang pag-antos ug ang kakabos.
May kahulogan pa ba kaha unya
ang ilang katawa ug pagginhawa
dinhi ning mapintas nga katilingban?
Dinhi ning nagkalaksot nga kalibotan?”

Ug king kalag nga gidala sa balaang kahilom
nahigmata gikan sa iyang paghikatulog
ug akong nakita ang usa ka matang sa kinabuhi
nga gisalohan sa tanan.
Sila ug ako nagkahiusa diha sa kabalaanon
sa matag sulod-gawas sa hangin sa kinabuhi.

May kahulogan diay sa ilang yanong katawa
sama sa kahulogan sa lubok sa akong dughan.

Unya niadtong maong kahaponon
mitindog ako ug milakang
sa pagtuman sa maong balaang sugo--
ang paghatag ug kahulogan sa kinabuhi
segun sa mando sa akong kahiladman.

(Marso 20, 2001: Sta. Ana, Cagayan Valley)


-JON SAGUBAN
Dakbayan sa Iligan

walay kataposang utlanan


Hunong sa unahan
Wala nay kapaingnan
Mao na ang kataposan
Hayan wala ka nay paingnan
Kataposan.

Lingi og balik, balik sa agianan
Kay ugaling aduna pay laing kaagian
Wala pa mapupos ang tanan
Padayon sa paglakaw ning sigpit nga dalan.

Apan hunahunaa sa makadiyot
Kon sa unahan aduna bay babag
Kon mao ba hinuon kini ang dalan sa
Kalaotan.

Tan-awa sa pagbalik
Adunay pay paagi
Ug padayon
Kini usa lang ka lansis
Aron ikaw dili magpadayon.

Ang utlanan walay kataposan
Anaa lang kanimo
Kung ikaw magpadayon
Ug dili magpahaylo
Sa mga hagit sa kinabuhi.

Padayon sa bugno sa kinabuhi
Walay kataposan ang utlanan.


-RANULFO VISAYA, JR.
Maguikay, Dakbayan sa Mandaue

balakisaw: simbolismo terorismo


(Septiyembre 11, 2012):
Giguyod gisipitan giakba ang nagkaguhayng lawas
ni Ambassador CHRISTopher Stevens

Sa Benghazi Damascus Istanbul Kabul Yemen
Cairo Karachi ug Bangladesh
ang bandira ni George Washington Abraham Lincoln
John Kennedy ug Ronald Reagan
gilud-an gigisi giyatakyatakan gidaoban
Usa ka panamastamas sa kanhing gamhanang nasod
Usa ka sagpa ug insulto sa huyang nga pamuno

Sa opisina ni JesuCHRISTO Stevens
gakatagkatag ang mga tunokong pahina sa talaadlawan
(Mi Ultimo Adios?):


-MELQUIADITO MAAMBONG ALLEGO, MD
Palm Harbor, Florida, USA

nahubsan nga botelya


Hubo ko sa imong atubangan,
Pakatayi ang akong kalawasan
Sa imong mga halok,
Hangtod maabot nimo ang tumoy
diin imong idapat ang imong mga ngabil
Aron paglad-ok sa akong dugos,

Dali na,
Itagay na ko,
Pangkupot ug maayo,

Ug kon ako makabsan,
Maghilawas unya ta sa kinauyokan
Sa atong kahaw-ang,

Pun-a ko,
Imna ning bugnaw kong kalag,
Ug hugton nako pagsirado ang takop
Aron wala na kay kalutsan.


-JIN GARCIANO
Dakbayan sa Sugbo

panimpalad


Nganong iya mang ibaylo ang kuwatro sentos
nga bugti sa peso nga itaya sa tulo ka numero
sa tres sentos nga segurado?

Dili na unta siya magtagad pa nga maglingkod
magkig-estokada sa bulhot sa aso
gikan sa tinigol nga lumboy,
o ang iyang kalag ug lawas
nakigkarinyo pa sa kainit nga
nagdalit lamang kaniyag hanap nga
kinagilkil sa iyang bolsa.

Apan pila na ba ka bag-ong tuig
ang minglabay?
Patay ang mga dunggan
ug bulhog ang mga kalimutaw
sa mga gituohan niyang maminaw
ug motan-aw. Karon padayon
ang iyang pagsalig sa panimpalad sa
niwang niyang peso.


-JON SAGUBAN
Dakbayan sa Iligan

mga dominggong bulak sa santo rosario


(kang Omar Khalid nga nakahinumdom ning balak siglo kanhi)

( Gihulat ko ikaw, Maria Thelma, gihulat...
Dinhi sa patyo sa simbahan sa Santo Rosario...)

     Puti pula ug dalag nga plordelis
     Lila ug puti nga klabel
     Mahumot nga asusena ug kamya
     Dalag nga merigol puti nga rosal
     Everlasting nga tabunong dalag

(Pagkadugay ba nimo... pagkadugay...)

     Pula puti ug pink nga african daisy
     Puti ug dalag nga kalatsutsi
     Mahumot nga miraflor
     Dalag nga santan
     Puti nga kamya ug sampaka

( Kayha di ka mosimba... di mokalawat...)

     Puti pula ug salmon nga radyola
     Pula ug puti nga antuwanga
     Mahumot nga gumamela
     Dalag nga kampanilya
     Puti nga asusena pula nga korona espina

(Gipaabot ko ikaw Maria Thelma gipaabot...
Tugdon ning mga Domingong bulak sa Santo Rosario...)


-MELQUIADITO MAAMBONG ALLEGO, MD
Palm Harbor, Florida, USA

pagtuman sa order ni dr. ben jabel


Apo: Lolo nganong gakaang-kaang
         ka man maglakaw gakindang?

Lolo: Ingon man gyod akong doktor
         likayan ang mga itlog

Kay taas akong cholesterol!


-NICK LOPEZ, MD
Kissimmee, Florida, USA

pagpangga



Unta wala na lang malaya
ang lukay sa among nataran
wala untay langkay nga mapunit si papa

kay matag hagsa sa langkay gikan sa lubi
makahinumdom ko sa mga samad
sa akong sampot.


-JIN GARCIANO
Dakbayan sa Sugbo

#2


balay
puno'g bentana
walay nanambo

-GRATIAN PAUL TIDOR
Dakbayan sa Dipolog

mga diyosang hingpit pagkalalik lakip ni melanie iglesias


( *Siniloy )

          Kalulot!
          Kalulot!

 Bughawng kalimutaw
 Pasiplat galutaw

          Lamurok!
          Lamurok!

 Kandiisong aping
 Paghalok pag-amping
 Daw tambisong ngabil
 Kadanglog nagtabil

          Kabus-ok!
          Kabus-ok!

 Sa gatupad bungtod
 Dagaang mohangtod
 Kurba bugdong sampot
 Kaibog nagtapot
 Bugan nga mais-is
 Unlan sa katam-is

          Kahamis!
          Kahamis!

 Gipaday-as paa
 Lalim hapuhapa
 Ilakip bitiis
 Dugos mibilikis

          Supsopa!
          Supsopa!

 *SINILOY: Balakporma pinasiugdahan ni DIOS GARCES ALESNA
                 sa 1962.

 (Alang nilang Marilyn Monroe, Elizabeth Taylor, Angelina
  Jolie, Taylor Swift, Shamcey Supsup ug Melanie Iglesias nga giisip
   nga labing pinakamatahom nga babaye  sa kalibotan karon.)


 -MELQUIADITO MAAMBONG ALLEGO, JR., MD
  Palm Harbor, Florida, USA

balakisaw: paghigpit ug pagpig-ot sa sayberkagawasan


(alang sa RA 10175 o Cybercrime Prevention Act of 2012 nga magsugod nag implementar karong adlawa)

PAGHIGPIT UG PAGPIG-OT SA SAYBERKAGAWASAN ABER SULAYI KUNO DI BA
MAGKITANG KATAG

     Adunay mga mahilabtanon mapaniirong mga matang nanil-ip gatungtong
sa akong abaga ug bukobuko
samtang gisabonan ko ang mga paa ug dughan ning gilalik nga balak Mga
hanggawng peeping tom sa
kabugangang internet Mga detektib undercover agent private
investigator NBI sa sayberkawanangan
Hinungdang premature king gimugnang Magnum Opus unta Ang kagamhanan
hilabtanon sa gilalang nga
literaturang tagoangkan

     Poreso makig-andohay kita sa sayberkrimeng balaod Kitang mga magdadagang
dili mga hiniktan. Kita ang maniniid manunugid ang tagtipig sa talaadlawan
Mag-unsa ang kalibotan kon wala ta?


-MELQUIADITO MAAMBONG ALLEGO, MD
Palm Harbor, Florida, USA

matod sa pari


(sa wali niya
samtang nagtapad ta),

“Hakog kana siyang
lawom ang tingkoy.”

Pagkadali bang milupad
sa imong kamot, mibatog sa
unoron kong tangkugo.
Bisan sa akong pagsagang
gipugos mo pagtuslok
sa imong hintutudlo
ang tingkoy kong hapit na
mapanas ang yukom,
naabunohan sa kolesterol
nga akong natigom.

Pastilan! Ako dayoy imong nakita…
Nganong dili man ang gilawmon
sa imong tingkoy ang una
mong gisukod sa imo mismong tudlo?


-JON SAGUBAN
Dakbayan sa Iligan

balita: supak kita sa cybercrime law!


Ang BALAKISTA nagtuo nga posibleng mawagtangan og ugma ang atong gahom isip mga balakista sa atong panahon kon magpadayon ang Cybercrime Prevention Act of 2012.

Kon magpadayon kini, unsa na man lay porma ug unod sa mga balak sa atong panahon? Hingusganon kitang mosupak ining maong  balaod nga mowagtang sa atong katungod sa pagsibya ug pagsabwag sa atong opinyon, supak o uyon man kini sa gobyerno ug kang bisan kinsa. Ang atong balak salamin sa kamatuoran sa atong katilingban.

Ang atong tingog angay nga madunggan.

Kitang mga BALAKISTA angay nga magbangotan kon dili paminawon ang atong mga yangungo. Kita ang BALAKISTA sa atong panahon, kita ang MATA ug BABA sa unsay tinuod nga hulagway sa atong katilingban karon.

Karong adlawa, Oktubre 2, 2012, dunggon sa Korte Suprema ang mga petisyon labot sa Cybercrime Prevention Act of 2012. Kon dili paminawon sa Korte Suprema ang TRO nga gipangayo, seguradong mausab ang dagway sa internet sa atong nasod. Sugod ugma, magsugod ang Cyber Martial Law.

Kuyaw nga ugma damlag pugsanon nga pahilomon ang BALAKISTA. Maghuwat pa ba ta nga moabot kining maong panahon?

Isip pagprotesta, inyong mabantayan nga ITOM na ang BALAKISTA karon ug sa mga mosunod nga adlaw. Kon duna moy balak mahitungod ining maong balaod, ato kining ipatik dayon dinhi.

(Ipadala lang sa akongpanaw@gmail.com ug butangig ulohan nga BALAKISTA.)