11.10.2014

ang kinabuhi morag bubble gum


Dili gyod maikalimod
Nga ang kinabuhi morag bubble gum.
Ang katam-is imong masinati
Anyag ang imong mabati.
Kon dugay na
Iluwa na na
Kay wala nakay matiti niana
Nana sa baba na lang imo ana.

Letse! Gipapikit pa jud sa lamesa.

Pero ayaw kabalaka
Kay sa akong gipahimulong pa ganina
Ang kinabuhi morag bubble gum
Kay moabot ra angay nga panahon
Ang tawong may dako nga kadasig

Mohapit!

Mopunit!

Ug Mohungit!

Sa bubble gum
Nga gilukop sa imong nana
Nga gikan kaniadto sa imong
maanindot nga baba.


-Angelito G. Nambatac Jr.
Dakbayan sa Iligan

11.07.2014

duha ka sangpotanan sa epidemik ebola

Tinubdan: Dailymail.co.uk

(1) Y

kalit trankasong pamuypoy
galabad agtang tampihak
dugoon sunggong hilanat
mga lutahan nangapoy
hala pamuril na Zmapp
mga bunhok gasulirap


(2) X

Sa Intensive Care Unit:
Pulso: 0
Pinitik: 0
Presyon: 0
Ginhawa: 0
EKG: 0
Pandemik Panamilit:


-MELQUIADITO M. ALLEGO, MD
Sierra Leone, West Africa

11.05.2014

naay usa ka burikat nga...

Tinubdan: Girl in the Dark by Stefan Kuhn

naay usa ka burikat nga
nagsuroy-suroy usa ka gabii
iyang mga suso nakaplastar morag
mga cake sa goldilocks-- makapanilap
ang atngal nangidhat sa matag
kargador nga nanglabay,

ang panit kagiron,
asido ug baho sa sobrang pahumot
kay lagi wala'y kaligo;
ang kita
igo ra ipangape
ug ang matilok adto
padung ni manghod nga
nagskwelag
diker ug ni Nanay
nga
nag-ango-ango
apan usahay,
usahay adunay sobra para
pangpalit ug biste

sa usa ka eskina atbang sa may-hotel
adunay adunahan mamiste nga
amerikano namili, ang iyang mga mata
naglabay-labay sa matag burikat
nga naglinya:
-usa
-duha
"too white"

-tulo
-upat
"too tall"

-lima
-unom
"too flawless"
"too short"
"too this,too that"

ug sa ika-pito - "ahh, this is it"
mao kini siya si inday nga burikat giduol
sa Amerikano ug malipayong nisakay
sa taxi padulong sa bisan asa

samtang ako nagsaksi niini,
ako nakapanglingo-lingo ug
nagngisi kay lagi
bisan pa unsa ka baho ug kagiron,
mahalin pa diay.

Busa dodong,
trapohi nang mga
gilaw-gilaw namilit
sa mga sidsid
sa imong mata

pagbantay,
kay
dili tanang pakpak
sa snowbear
walay puros
ug
dili tanang maanyag
maayo.


-Athenea Barbara Perez

(Ang magbabalak nga si Athenea Barbara Perez, 20 anyos, tinun-an sa University of San Carlos School of Law and Governance. Gradwado siya sa Cebu Normal University sa kursong BA Psychology.)

11.04.2014

sa akong anak sa manila


Sus, maski dili pa ka mosulti,
Kabalo gyud ko unsa imong gibati karon.
Sagdi lang, Nak, kapyot lang.

Paminaw lang nako, Nak, kay anak man tika
Ug dumdoma ang mga adlaw kaniadto
Diin imong nakaya ang mga pagsulay.

Kahinumdom pa ka atong nagbitay ka sa kakaw?
Sus, ayha ko makaabot, pirti bya gyod nimong kapyot.
Hadlok man diay ka mabalian ug bukog!

Katong imong grado gakumbayot tungod sa atsa,
Abi nimog dili na makaya, pero pastilan,
Kaliwat gyud ta! Ayaw lang ug saba sa uban ha.

Kung usahay maguol ka dira, kapyot lang bisan kinsa
Pero, agoy, kabalo ka kung kinsay likayan ha --
Apil nang mga gairing-iring, ayaw gyud tawon padala.

Aw ug na-labsik gud ka dira, kapyot lang sa unlan --
Gaksa, hilaki, lawayi, patuluig sip-on kung pwede.
Inig ka ugma, mahuwasan ka ra lagi. Matay pa!

Pasensya na, Nak, kon sa imong pag-eskwela
Wala gyod koy matambag. Kabalo na ka --
Taman ra bya kog pananom ug kamote.

Taympa, morag daghan na kog natabi, Nak, ay.
Buhi pa ka dira? Aw, joke only, Nak. Bitaw, Nak,
Kung grabe gyod nang kasakit nga imong giagian dira,

Timan-i lang nga makaya ra ang tanan. Kung nakalimot ka,
Hala dumduma: sukad sa unang adlaw sa pagtalikod sa
Imong amahan, siyam ka bulan bya tawon kag kinapyot sa
a
kong
ti
yan.

-Adonis Enricuso


(Ang magbabalak nga si Adonis Enricuso usa ka magtutudlo sa University of San Carlos ug tinun-an sa MA Applied Linguistics sa samang unibersidad. Siya lumad nga taga Zamboanga del Sur.)

11.03.2014

tuway


Sa imong pagsawm sa himaya,
Kuyog sa mga lamas
Ug bukal sa tubig;
Ang imong hiwa nga daw dili mobuka,
Ug ang siwil nga daw gamayng dila,
Nagbasa, tubig nagluwa.

Ako magbuak, magtunga,
Sa uyok mong gasa –
Unod ug sabaw,
Sa akong dukot ug bahaw.


-M. A. Mapute

(Si M.A. Mapute lumad nga taga lungsod sa Heneral Santos. Migradwar sa kurso nga AB-English gikan sa Mindanao State University- GSC, nanimpalad sa paglangyaw sa Sugbo niadtung 2007 arun manginabuhi isip usa ka empleyado sa BPO industry. Human sa dul-an unom ka tuig sa BPO, mi-resign niadtong September 2013 ug migakos sa tawag sa pagtudlo. Sa pagka karon nagtrabaho isip part-time instructor sa College of Arts and Sciences, Cebu Technological University- Main Campus ug naninguha usab nga makasuwat na sa iyang thesis sa kurso nga Master of Arts in Literature sa Cebu Normal University. Siya karon molupyo sa Liloan, probinsiya sa Sugbo.)

1.08.2014

mga magdalena sa daram

babaye sa casa - balak bisaya - balakista

Sa linghod nga pangedaron
gibiyaan nila ang isla sa Daram;
nanimpalad sa yuta sa katagalogan
sa pangindahay nga ang kaharuhay matagamtam.

Napakyas ang mga maayong tinguha
nga mahaon sa kalisod ang pamilyang nag-ulaod;
nahaylo sa mga pasalig, napadpad sa mga casa.
Nagihay ang tanan, sa kaalaotan natumpawak, nasukamod.

Karon, balon ang mga pagmahay ug mga panghayhay,
balik sa pulong-diyot nga ilang namat-an.
Hukman man sila sa mga mata sa pagtamay
mga biktima lamang sila sa hakog nga katilingban.


(Kining maong balak sinuwat ni Jon Saguban. Ang magbabalak nagpuyo sa dakbayan sa Iligan.)

paglawig

bangka - balak bisaya - balakista

miabot ang takna nga siya palargahon
mobiya sa asawag anak, ginikanan ug igsoon;
panamilit nga puno sa kahingawa ug kamingaw,
apan agwanta lang ang tambal sa matag adlaw.

para nila, grasya na kaayo ang makasakay
aron sa ingon ang pamilya dili kaayo magkagidlay;
mao nga ilang giatubang ang mga hagit sa kabudlay,
para makatagamtam ang nahabilin panalagsa og kahayahay.

dili sayon ang gipili nila nga matang sa kinabuhi
paningkamot, unos ug balod
taliwala sa lawod nagpakabuhi;
giantos ang tanan para mahaw-as sa kawad-on,
ang buhing kadasig mao ang:
ampo, gugma
pagtuo ug paglaom


(Kining maong balak sinuwat ni Iris Odever. Pangandoy niya ang makasuwat og balak alang sa sunod nga henerasyon.)

1.01.2014

pagpamisita

patay nga rosas

(inspirado sa kumpisal
gimantala sa speak up, iskolar)


baby, pasar sa UPCAT
imong manghod!
giari gyod tika bisan dili domingo
kay kini imong pangandoy niya,
di ba? dapat ka dayon nga
makahibawo sa balita:
mosunod siya sa imong tunob.
duna na gyod unyay chemical engineer
sa inyong pamilya. gituyo ko gyod
og anhi kay lima ka tuig
kini nimong gihuwat.

hala, lawos na man ning rosas
sa imong ulohan. maygani
may ipuli na ko. pasayloa diay ko
wala ko kaari sa miaging domingo:
dili gyod diay sayon ang board exam, baby.

chocolate cake na lang akong dad-on
alang sa atong 7th anniversary
karong sabado, ha.
binlan tikag tunga.
baby, apilan sad nako og kandela
gikan sa basilica, ha.


(Kining maong balak sinulat ni Piero Aldaya. Ang magbabalak nagpuyo sa Dakbayan sa Carcar, Sugbo. Migradwar na siya sa kolehiyo sa UP Cebu ug karon nanimpalad unsaon pagpakabuhi sa medyo hasol nga kinabuhi.)

sulo

nagsiga ug nagdilaab nga sulo

Ako gaiwag
Nga nangaliyupo
Tumoy sa lapyahan
Sa mga ma abi-abihong
Mga balod
Diin gilaylay
King katibawon
Nga kabugtungon


(Kining maong balak sinuwat ni Jann Dainver Maravilla. Ang magbabalak nagpuyo sa Clarin, Misamis Occidental.)

saksak-sinagol: idya-idya aho-aho

patay na tawo

nothing per orem
is a virile man's
dreaded hotel dream


intawon mahirap
ang sariling sikap
walay hikap-hikap

puyde kayang maghikog
kon ni misis gidulog
king malambot nga ikog?


-OMMAR BATHALASAD ALLAH
Palm Harbor, Florida, USA

(Kining maong balak Binisaya sinuwat ni Ommar Bathalasad Allah ug ang magbabalak nagpuyo sa Palm Harbor, Florida, USA.)