Suporta sa Bisdak Komunidad

Ingon sila himatyon na kuno ang tradisyon sa Bisdak nga pamalak? Wala na kunoy mga batan-ong magbabalak nga gusto pang mosuwat og balak?

Sa moupat na ka tuig sa Balakista sa wanang sa internet, ang balayan nga mopatik og mga balak nga Binisaya alang sa Bisdak nga komunidad ubay-ubay nang mga magbabalak nga nahimamat ug ania ang mga gipangsulti nila bahin sa Balakista ug sa atong adbokasiya nga ipadayon ang kabilin sa atong katigulangan—ang pamalak.

Gilakip usab dinhi ang mga testimonya sa pagsuporta gikan sa nagkalain-laing tawo sa komunidad nga gustong manggilabot aron mapadayon pa ang tradisyon sa atong mga Bisayang apohan. Bisan kinsa ka pa man, mamahimo kaayo kang moapil sa atong adbokasiya. Ang Balakista usa lamang ka instrumento aron mapabilin ang tradisyon sa pamalak ug aron mas daghan pang balak ang mamugna sa mga batan-ong magbabalak.


Kon may gusto kang isulti, padala lamang og mensahe sa Facebook aron malakip nganhi ang imong testimonya. Bukas kini sa tanan!

Bira, ania na ang nagkadaiyang testimoniya sa pagsuporta:

****

"Giawhag ang tanan sa pagsulat og balak. Kadtong dili mosulat, pisot. Kon dili pisot, pyasot. Kon dili pyasot, kunot. Kon dili kunot, barot. Kon dili barot, sapirot. Kon dili sapirot, botbot. Kon dili botbot, tapot." 
- Ric Bastasa, Magbabalak Abogado ug MTC Judge sa Roxas, Zamboanga del Norte


****

"Ang pamalak, bahandi. Pungpong sa pulong. Pagpadayag. Pagpamilar sa panumduman. Pagbatyag sa di matugkad nga bukotbukot. In short, ang pamalak, gugma. Ania ang Balakista andam mohigugma. Abri sa tanan: tiguwang o bata (may trato o wala)." 

- Erik Tuban, batan-on nga higante na sa kapanulatang Bisdak ug umaabot nga Palanca awardee

***

"Mag-alalay kita sa Bisayang Dakong Parnaso 

Magdayong sa umaabot Nasudnong Pinulongan

Magtimbayayong pagduslit sa Dagang nga Moaso!" 
- Melquiadito Allego, Doktor sa Amerika ug sa Pamalak Bisdak

Walang komento :

Mag-post ng isang Komento

Unsay imong ikasulti ani?