11.04.2014

sa akong anak sa manila


Sus, maski dili pa ka mosulti,
Kabalo gyud ko unsa imong gibati karon.
Sagdi lang, Nak, kapyot lang.

Paminaw lang nako, Nak, kay anak man tika
Ug dumdoma ang mga adlaw kaniadto
Diin imong nakaya ang mga pagsulay.

Kahinumdom pa ka atong nagbitay ka sa kakaw?
Sus, ayha ko makaabot, pirti bya gyod nimong kapyot.
Hadlok man diay ka mabalian ug bukog!

Katong imong grado gakumbayot tungod sa atsa,
Abi nimog dili na makaya, pero pastilan,
Kaliwat gyud ta! Ayaw lang ug saba sa uban ha.

Kung usahay maguol ka dira, kapyot lang bisan kinsa
Pero, agoy, kabalo ka kung kinsay likayan ha --
Apil nang mga gairing-iring, ayaw gyud tawon padala.

Aw ug na-labsik gud ka dira, kapyot lang sa unlan --
Gaksa, hilaki, lawayi, patuluig sip-on kung pwede.
Inig ka ugma, mahuwasan ka ra lagi. Matay pa!

Pasensya na, Nak, kon sa imong pag-eskwela
Wala gyod koy matambag. Kabalo na ka --
Taman ra bya kog pananom ug kamote.

Taympa, morag daghan na kog natabi, Nak, ay.
Buhi pa ka dira? Aw, joke only, Nak. Bitaw, Nak,
Kung grabe gyod nang kasakit nga imong giagian dira,

Timan-i lang nga makaya ra ang tanan. Kung nakalimot ka,
Hala dumduma: sukad sa unang adlaw sa pagtalikod sa
Imong amahan, siyam ka bulan bya tawon kag kinapyot sa
a
kong
ti
yan.

-Adonis Enricuso


(Ang magbabalak nga si Adonis Enricuso usa ka magtutudlo sa University of San Carlos ug tinun-an sa MA Applied Linguistics sa samang unibersidad. Siya lumad nga taga Zamboanga del Sur.)