ikis

Uno

Ahente sa kahangtoran,
Putli, walay utlanan.

Milungtad, nagpabilin
Lintunganay sa pamasin-basin.

Halandong tinubdan,
Balaang ilhanan.

Dagway sa katalagman,
Ang tibuok buhilaman.

Dili matugkad
Bung-aw nga mibukhad.

Dili masampit
Pangan nga gidapit.

Tanan higayon
Gibanlas sa baybayon.

Talisawop nga bituon
Way kahumanang kagabhion.

Tanan kamingaw
Usa lang ka panugnaw.

Sauna tipik ug kabahin
Karon dili na gani matawag nga salin.

Akong gisulayan og kapkap
Basin adunay mahikap.

O dakbayan sa kangitngit,
O biniyaan nga langit!

Diyotay nga pahit,
Ngipon nga mahait.

Tigbantay, tighipos
Sa takna sa pag-upos.

Tubig sa giuhaw,
Usa ka basong panghupaw.

Anghel o panuway,
Hatagi ko og lugway.

Isip timaan,
Isip timailhan.

Sa akong bukog ug panit,
Ikis ang ikulit.

Palihog ko sutaa
Ang akong pagkaana.

Palihog ko og susi
Sa akong bili.

Tinuod kong higala,
Lumulopyo sa tagohala.

Kauban, igsuon
Tigbuhat og lungon.

Tabyoga ang duyan
Sa buho nga pahulayan.

Hawan nga panimalay,
Awiti ko og laylay.


Dos

Iring-itom,
Akong nabagatan sa dalan,
Unsa ang mensahe nga imong giluom?

Samingbuak,
Lahilahi lagi ang akong panagway,
Sa mga bildo mong nangatagak?

Pangag nga hagdanan,
Ngano ang tanan butang
Aduna may kinutoban?

Ang hilom nga palibot nagpasabot,
Nagpasidaan,
Sa dili gayod mapugngan.

Ikis sa kahoy,
Tinglarag sa dahon.

Ikis sa panganod,
Nagdumili nga panahon.

Ikis sa mapa,
Lungon nga bulawanon.

Ikis sa pultahan,
Daotan nga tilimad-on.

Ikis sa mata,
Alimyon sa kamatayon.

Ang lamparilya
Nahutdan na og lana.

Wala nay maiwag nga kahayag
Ang mga aninipot sa garapa.

Kining ginhawa
Makalimtan lang
Sa usa ka pamilok.

Kining kinabuhia
Naghulat lang
Sa kataposang halok.


Tres

Ikaw ang ikis sa akong panumdoman.
Ang ikis sa akong galamhan.
Ang bala nga gikulitan
sa akong pangalan
nga nagpahipi sa nataran
aron banhigan ang akong kalibotan.

Ikaw ang ikis sa luna sa akong hunahuna.
Ang ikis sa kinahiladman
sa akong tawhanon nga simbahan.
Ang ikis sa haw-ang nga sam-ang
kon diin ako nagpiyong ug nagpamalandong

taliwala sa mga gumonhap
nga mikuyanap
sa akong pagkaanaa.

-CD BORDEN

Dakbayan sa Sugbo

ang manok nga walay balhibo

Si Nonoy nanaghoy
Samtang nagbugha og kahoy.
Si Inday nagkiay-kiay
Samtang nanghayhay.

Si Kuya mitugway
Sa kanding sa Talisay.
Si Dodong mitiyabaw
Kay adunay langaw ang sabaw.

Ug ang manok nga walay balhibo
Gigukod og sundang ni Lolo.

-CD BORDEN
Dakbayan sa Sugbo

TULUKIBON

Unsa man ka tinuod ang kamatuoran?

Sama ba kini ka tinuod sa sanggot nga mikulit og tingsi sa buwan?

Sama ba kini ka tinuod sa saging nga milamoy sa unggoy?

Sa bukog nga mitangag sa iro?

Sa tiguwang nga nagbisikleta sa panganod kaha?

O sa babaye nga gitaban sa tabanog?

Sama ba kini ka tinuod sa bata nga mikuhag bituon sa langit, gibutang sa lamparilya, ug gitayhop sa takna sa tingkatulog?

-CD BORDEN

Dakbayan sa Sugbu

MAHITUNGOD SA PAGBAWOG OG KUTSARA

Makabawog baya kog kutsara
gamit lang ang akong hunahuna.
Ayawg katawa. Wala ko nagbinuang.

Ang sekreto
mao ang paghunahuna
nga wala kay gihuptan nga kutsara.

Daghan ang nasagmuyo
kay dili sila makabuhat niini
bisan tuod ako na silang gitudloan unsaon.

Apan adunay pipila
nga nakakuha sa akong buot-pasabot
ug nalingaw sa maong talagsaon nga buluhaton.

Ang usa gani nila
nalabwan ang akong kamaohan
tungod sa pagbawog niyag tinidor.

Misulay mig pangutana niya kon unsay buhaton
apan igo ra man ming gikataw-an
ug wala gayod mitug-an.

-CD BORDEN
Dakbayan sa Sugbo

tahas

Mamimisi,
Buhati kog pisi ginama sa balas
Aron makakuhag balod gikan sa dagat.

Mananahi,
Tahii kog kapa nga sakto alang sa usa ka hari
Gamit lang kining duha ka tanod nga dagom.

Panday,
Tukori kog dakong palasyo
Nga sa akong paggawas niini tigulang na ko.

Kusinera,
Paghiwa og usa ka bakat nga bombay
Samtang maghilak og luha nga bulawan.

Kon dili ninyo mabuhat ang tahas,
Ibutang ang inyong ulo sa tadtaran
Alang sa akong matadero.

-CD BORDEN
Dakbayan sa Sugbo

antonio de padua

Ang yawa naghupot og ilimnong makahubog
Kilid sa labong nga dakit.
Ang anghel namaligya sa iyang dungog
Taliwala sa kangitngit.

“Sunod na lang,” akong gibalibaran ang iyang tanyag
Ug mibalik kog lakaw sa kahayag.

Ako ang pinili, ang kataposang santos nga dili.
Ako ang bugtong nahibalo
Apan akong nakalimtan kon unsa kadto . . .

Sa kilumkilom,
Ang tibuok dakbayan
Usa ka handomanan
Nga dili gayod nato mapanganlan.

Bisan sa kasikas
Akong madungog ang kahilom nga naghukas.

Sa kadalanan,
Daghang dagway ang akong nasugatan.
Tanan malipayon
Gawas sa usa nga nagbangotan.

Kinahanglan magdali, kinahanglan dili molingi.
Kay siya kansang nagsunod kanako,
Midagkot na sa iyang tabako,
Ug buot mokutlo sa akong kinabuhi.

--CD BORDEN

Dakbayan sa Sugbo

ginadili

kon mokaon kag santol,
ang imong papa mountol.

kon mokaon kag mangga,
ang imong mama mamunga.

kon mokaon kag tambis,
ang imong ate matuboag himbis.

kon mokaon kag saging,
ang imong kuya mokaging.

-CD BORDEN

Dakbayan sa Sugbo

pahimangno

ikaw kansang nanag-iyag daghang dagom
ug dunay didal sa tudlo,
ang imong kasingkasing
almahadon.

-CD BORDEN

Dakbayan sa Sugbo

BALAKISAW: HUDAS 3:16

Tawo-tawo sa kahumayan
ang ilang gilansang sa krus.


-CD BORDEN
Dakbayan sa Sugbo

panid #11

Adunay langaw nga mitugdon sa atngal sa usa ka babaye. Yuna ra! Wala man diay kini mitugpa lang kondili misupsop kini sa gatas sa atngal. Ang langaw mao diay ang iyang bugtong anak nga lalaki. Dihang nabusog na, milupad kini paingon sa iyang amahan kansa nangibot og ngipong-hingo gamit ang puting hilo.

-CD BORDEN

Dakbayan sa Sugbo

Unsaon Pag-ihaw og Baboy

Una,
Ang duha ka pares sa iyang mga tiil, higti.
Kon moiwik man gani, pasagdi.
Ayaw hinumdomi ang nahitabo sa sako
Dihang gibitay ka kaniadto.

Ikaduha,
Iyang liog gulgola.
Ang binaid nga kutsilyo
Sa imong amahan ang gamita.
Tutok lang sa imong buhaton.
Ayaw paghunahuna nga laing tawo
Ang imong dunggabon.

Ikatulo,
Lapwai kini og tubig-init
Sa dili pa kiskisan sa balhibo
Ang iyang panit.
Mora lang god nig kadtong higayon
Nga giupawan ang imong igsoon
Tungod sa iyang pagkabigaon.

Ikaupat,
Hinay-hinaya paghiwa ang iyang tiyan.
Human kuhaa ang iyang tinai
Ug ginhawaan.
Ayawg hilak, batang-himi!
Dili na kini ang baktin sauna nga imong binuhi.
Karon karne na lang kini nga imong tadtaron
Para ibaligya sa merkado unyang udto
Samtang ang uban lutoon sa imong inahan,
Ihaon sa lamesa sa panihapon,
Usa ka sa mokaon.


--CD Borden
Mabolo, Dakbayan sa Sugbo

Hudyaka

Ang tikbalang nanaghoy samtang nagbras sa iyang sapatos. Ang agta midagkot na pod og lain nga tabako. Ang duwende nangharana sa silingan nga uhong. Wala pa mibangon ang bampira nga nahinanok sa lungon. Ang santelmo miiwag sa kangitngit mao akong nakit-an ang katunga nga lawas ni misis sa nataran. Ang among masuso mihatag kanako og lantip nga pahiyom gikan sa iyang duyan. Ug ako, akong gipangbuhian ang mga sigbin sa ilang hawla aron makapanguling.

--CD BORDEN

Mabolo, Dakbayan sa Sugbo

Pamahaw

Namahaw ang managtiayong Kutsara ug Tinidor sa ilang paboritong pagkaon nga mao ang wala sa dihang nabuhian ni Tinidor ang iyang babaye . . .

Askang! maoy sulti ni Tinidor.

Hala, hala! miingon iyang asawa, Murag naa gyod kitay bwesita karon, pangga.

Kutsara pa gyod, nagkanayon iyang bana samtang gipunit ang babaye nga nahulog sa salog . . .

--CD BORDEN

Mabolo, Dakbayan sa Sugbo

panid #6

Luyo sa among balay adunay dakong kahoy nga mamunga og ulo sa tawo. Kon tinghinog na, inanay ra silang mangatagak sa yuta dayon among pamuniton ug ipangtaod sa among mga liog.

--CD BORDEN
Mabolo, Dakbayan sa Sugbo

sulayi

Sulayi lang og dagan
Di ba piloon nako imong agianan
Sulayi lang og tago
Di ba hiposon tika sa kahangtoran
Sulayi lang og sukol
Di ba imong kaugalingon ang imong makaaway
Sulayi lang og katulog
Di ba sudlon tika sa imong damgo
Sulayi lang og mata
Kana kon makamata pa ba ka

--CD BORDEN

Mabolo, Dakbayan sa Sugbo

nag-away

Buang! misyagit iyang inahan, Tigulang na ka, ayaw pag-ingon ana!

Apan gusto kong mobalik sa imong tiyan, mipasabot ang lalaki, Ug ang bugtong pamaagi mao ang pagpasok balik sa imong kinatawo.

Yabag! mitiyabaw iyang inahan, Bantay lang gyod ka kon moabot na imong amahan!

Apan wala na akong amahan, mihilak ang lalaki, Mibalik na og sulod sa tagoangkan ni Lola.

--CD Borden

Mabolo, Dakbayan sa Sugbo

tunglo

unta imong dugo mohubas
kon makakita ka kanako
imong dila imong matulon
kon makigtabi ka kanako

unta imong ilong mawagtangag buho
imong mata dili na mobuka
unta imong mga tiil magsalimuang
ang tuo motikang sa wala
ang wala motikang sa tuo

unta tuk-on ka sa imong mga kamot
kambrason ka sa imong mga kuko
paakon ka sa imong mga ngipon

unta imong kasingkasing mohunong sa pagpitik
ang imong ulo mapuno kanako kanako kanako
hangtod ang imong ulo mobuto

--CD BORDEN

Juan Seno, Mabolo, Cebu City

birat ka hain iroy

Diri ak makadto ira ak ginpirit
ha lugar nga diri ak maarang
masirom it ak pagkaturog
labi kon diri ak manigarilyo
tapos hutoyon dayon hit ubo
haim lungon nga ira ginlukdo
umuran hin sinsilyo
ambot hain may da anghel nga nabarian pako
an mga mata nagkita hain kamot nga imgin igbaw
nagkaway ha lumakat nga tuldok hit harayo

--CD BORDEN
Mactan, Dakbayan sa Lapulapu

Lige Daw Karon Sang

Ang baso mao ang butanganag pustiso
sa giango-ango nga Santo Papa
nga puyde sudlan og tubig bugnaw
para imnon sa gipang-uhaw
kansa nagpangita kon asa dapit ang eskina Lorega
ug tuod man nakakaplag og garapa sa lana
nga panghaplas daw sa mga wakwak
aron makalupad sa kilumkilom
human sila wala kapara og tartanilya
tungod sa manligis nga pison.

--CD BORDEN

Mactan, Dakbayan sa Lapulapu

Valentine's Day

(hinubad gikan sa usa ka Serbian Folklore)

Aduna kaniadtoy manag-uyab nga nagbinayloay og halok sa kasagbotan.
Nagtuo sila nga walay makakita kanila didto.
Apan nakit-an sila sa kasagbotan
Kansa misulti sa langgam
Kansa misulti sa tubig sa sapa
Kansa misulti sa bangka
Kansa misulti sa mamangka
Kansa misulti sa dumuduong
Kansa misumbong sa inahan sa babaye.

Sa kalagot sa babaye nga nahibaw-an iyang sekreto
Mitunglo siya og sumpa:

Kasagbotan, hinaot dili ka na molunhaw!
Langgam, hinaot mapusilan ka!
Mamamangka, hinaot mapiang imong mga tiil!
Dumuduong, hinaot mapareglahan ka!
Bangka, kaligo sa kalayo! Tubig sa sapa, hubas!

--CD BORDEN

Mactan, Dakbayan sa Lapulapu