hikap sa kamingaw

"When I was young 

I never needed anyone 

And making love was just for fun 

Those days are gone" 

--Eric Carmen

Nagkalawom ang akong pagpanaw

sa dulom ining langub, galanog

ang imong pagsangpit kanako. 

Wala koy makita gawas sa nawong 

nimo nga napatik sa akong utok.

Buot tika abton taliwala sa wanang 

kaysa sa mag-inusara ta sa paglatagaw 

niining kalibotan nga napun-an sa kamingaw.
Inig abot sa kahayag, wala koy nahimasan
gawas sa gatulo sa kisame sa akong kahidlaw.

Nagkahugot ang akong kumo 

samtang ang salin sa imong pagsangpit, 

nasapawan sa suliyaw sa kamingaw.

-OTENCIO B. MAUTGANAN JR.
Cagayan de Oro

gipatay natong gabii

"magkagubot unya.
ayawg saba."
--Patya, Chai Fonacier

sukad atong gipahilom
kadtong gabhiona
gahunghong gihapon
ang imong tingog,

naningil og parehas.
ug igo lang bation ko ang paggimok
kon mahinumdom ko sa kahumok
nunot sa kahamis

sa imong tiil, tiyan, dughan.
halos nasiprahan na
sa akong kasingkasing
ang pagbagting

sa imong lawas,
samtang atong tingog
nagkayabag kay nahubog
sa mga takna sa paglingkawas.

sukad atong gipahilom
kadtong gabhiona,
nigimok ang kahilom
sa nabanhawng' tinguha

gikan sa lubnganan
sa panumdoman.

-OTENCIO B. MAUTGANAN JR.
Cagayan de Oro

Linog

Karong taknaa nangalumpag
ang lawak sa iyang hunahuna
kay giagihan kini og linog
gikan sa iyang dughan.

Gahapla ra siya sa kama
samtang nangahugno ang tanan
niyang nangakit-an, ug igo ra siya
nagkab-it sa bukton nga iyang

giabiabi ining mubo nga higayon.
Wala siyay mabuhat kondili mag-agwanta
taman sa kataposan nga takna
nga inig kalma sa kino

puniton niya ang mga tinumpag,
susama sa iyang bistida ug bugkos
nga gihalad sa mga minahal
nga maoy makahamong

kining matang sa katalagman.

-OTENCIO B. MAUTGANAN JR.
Cagayan de Oro

tingog nga gaunos sa sulod

Di na ko makadungog sa mga tingog
sa akong mga higala dinhi sa Burgos.

Di na ko makadungog ni Dodong
nga kanunay gaaghat kanakog laag.
Wala nang hagawhaw nilang Toto ug Imok
nga makatakod kanakog agak-ak.
Wa nang mga higayon nga magtigi mig
patag-asay og ihi (Kon itandi sa sulog
sa suba, dagayday ra among agas).

Di na ko makadungog sa mga tingog
nilang Yani ug Ai-ai nga nagtamudmod
nga di sila makakuyog dungan namo.
Sagad gabagutbot mi kay mora mig

gitanggong sa balay kon moulan.
Ug bisan tuod nga mora mig irog iring
sa paglalis, mosubang pod ang adlaw
nga kami makasinabtanay taman sa pagtuliyok
sa among utok, mora’g nalabyan og bagyo.

Apan sukad milabay si Sendong, wala nay
laing madunggan gawas sa mga danguyngoy
sa ilang ginikanan, ang mga uwang
sa mga sakyanan, ug nangabilin nga tingog
sa akong mga higala nga galanog duyog

sa sulog. Hangtod karon, padayon ang haguros
sa akong kasubo. Wa’y kataposan ang unos.

--OTENCIO B. MAUTGANAN JR.

Cagayan de Oro

Sayal

Matag Dominggo isul-ob niya
ang bistida nga ang palda mubo pa
kon itandi sa kagabhion.

Ang takon sa iyang estileto
daw kahait sa bolpen
nga gamiton niya sa tingklase.

Mga tawo-tawo niya danaw
sa dalang aspalto diin nasamin
ang arko sa bulan nga gakipat-kipat

ibabaw sa motel. Taliwa sa dulom
nikidhat ang mata sa itom nga Altis.
Ug gihipos niya ang kasingkasing

ilawom sa pitaka aron mabakante
ang mga kamot kansang hawid
labaw kahugot sa iyang blusang pula.

Samtang gakaduol ang sakyanan,
gahinam-hinam pod iyang pag-ampo
nga makasul-ob pod unta siya

usa ka adlaw puhon og bistida
nga pang-Dominggo nga dili
sama kanihit sa damgo.

--OTENCIO B. MAUTGANAN JR.

Dakbayan sa Cagayan de Oro

Mangga

Lisod dil-an
ang ginadili,
labi nang hubag
nga mangga nga naa
sa punoan ni Inday Eba. Nabuyod
akong panan-aw sa tumang kalunhaw
anang bambang bunga. Gidughit nako
ang mangga ug gisalo nako, aron di madaot
ang iyang kadasok. Gihinay gyod nakog panit
aron tibuok lang gihapon ang unod, ug gihiwa sa
kutsilyo gikan sa ibabaw padalus-os sa ubos, dayon
gidildil nako sa asin ug tuyo nga akong nakiriw sa su'd
sa iyang kusina. Gidimdim gyod nako ang lasa, ug
gasagol ang kaaslom ug kaparat sa akong dila.
Kada pisa nga hiniwa gikibkib ko ug gisupsup
puyra ang lubas kay pait. Kay morag bitin
kining makadiyot nga pista, mipiyong ko
aron tipigan ang kalami ning kalapasan.

--OTENCIO B. MAUTGANAN JR.

Apovel Subdivision, Cagayan de Oro City