layo ra sa tinai

Nagpunayg sakit ang buko-buko
Nagpamatuod nga edaran, daw lolo
Sa kinatibuk-ang lawas, sa pinakagamayng tudlo
Kahimtang nga ipahospital na apan kini

Layo ras tinai.

Ubo nga sa matag-unya gibati
Kagalkal imong masinati
Nagsakit na ang dughan sa kagahi

Layo ras tinai.

Nagbalik-balik nga hilanat
Maglisod na sa pagligwat
Pagkuha sa temperatura
Niabot nag kuwarenta
Nagkurog nas katugnaw
Mga mata, nagliraw-laraw
Ayaw hulata, kinabuhi mabugti

Layo ras tinai.

Halos mabuak ang ulo sa diyutayng taligsik
Imnag biogesic
Apan labad magsigeg balik-balik
Pagdaginot sa salapi
Permeng ipasulabi

Layo ras tinai.

Ang lawas intawon ampingi
Kinahanglan hatagan kinig bili
Mireklamo na si tinai
Ayaw siya pasumanginli
Kay bisan siya halayo lang
Sa kataposan ikaw unya magkabuang-buang.


-RANULFO L. VISAYA JR.
Mandaue City, Cebu

ang mga banhaang amang

Sa kan-anan sa Gaisano
Pagsugod hilom pa kaayo
Sa dihang panagkukabildohay mibuwelo
Miandar usab ang kasaba--
Sa mga amang nagpahaba.

Walay migawas nga mga pulong
Sa ilang mga baba
Apan pwerteng banhaa
Sa ubang tawo, kasaba nagpahilaba.

Morag mga langgam
Nga nanaglumbaanay sa paglamlam
Sa pag-ilog sa ilang mga pagkaon
Daw chicharon nagsaba sa kagumkom.

Morag nga Koryanong nangagi
Dili masabtan ang mga gipanulti
Nanagsinyas sa mga kamot
Inubanan sa mga sinyas, hala bulhot.

Lahi man sila, ayaw nag pagbagutbot
Nagkinahanglan nalang silag pagsabot
Sila atong mga igsoon
Nga gihikawan sa mga tingog bulawanon.

Apan maayo pa sila kay
Dili nila madungog ang mga
Pamalikas sa mga tampalasan
Ang mga sakit nga pulong
Ug pagbiay-biay sa uban.

Maayo pa sila, bulahan
Ang mga banhaang amang
O, sila ang mga gihikawan sa tingog
Apan dili angayang hiwakan sa pagsabot.


-RANULFO L. VISAYA JR.
Mandaue City, Cebu

ang hulagway sa pinintal ni propesor villacin

Dili hayag ang imong panagway
Walay baba, mata, dungan ug buhok
Morag wala usab kay sapot diay

Apan maklaro ko nga usa ka ka babaye
Babaye nga walay bukton ug kamot
Ug nganong nagkulang ka man?
Ug nganong ikaw usa ka katingalahan?

Kon kinsa ka, wala ko masayod
Ikaw mahimong usa ka dalaga gyod
Dalaga nga gusto mahibaloan
Ang naglimin nga misteryo
Mahimo usab ikaw nga inahan
Inahan nga sa dughan
Nag-amping sa iyang anak nga bulahan.

Kinsa ba gyod kaha ka?
Nagsakit na ang ulo daw mabuak, ibayaw
Sa paghuna-huna dili tiaw.

Aduna ka man tingali personalidad
Luyo sa imong misteryosong panagway
Palihog, pagpaila na…
Maluoy ka niining galamhang
Uhaw sa kamatuoran.

Kay kon ugaling
Kanako magmakuli sa pagpaila
Ug sa akong damgo magpabilin
Suknaon ko na lang
Si Propesor Villacin.

-RANULFO VISAYA JR.

Maguikay, Dakbayan sa Mandaue

walay kataposang utlanan

Hunong sa unahan
Wala nay kapaingnan
Mao na ang kataposan
Hayan wala ka nay paingnan
Kataposan.

Lingi og balik, balik sa agianan
Kay ugaling aduna pay laing kaagian
Wala pa mapupos ang tanan
Padayon sa paglakaw ning sigpit nga dalan.

Apan hunahunaa sa makadiyot
Kon sa unahan aduna bay babag
Kon mao ba hinuon kini ang dalan sa
Kalaotan.

Tan-awa sa pagbalik
Adunay pay paagi
Ug padayon
Kini usa lang ka lansis
Aron ikaw dili magpadayon.

Ang utlanan walay kataposan
Anaa lang kanimo
Kung ikaw magpadayon
Ug dili magpahaylo
Sa mga hagit sa kinabuhi.

Padayon sa bugno sa kinabuhi
Walay kataposan ang utlanan.

-RANULFO VISAYA, JR.

Maguikay, Dakbayan sa Mandaue