Bahin sa Balakista

BALAK BISAYA

Ang Balakista abotanan sa mga balak nga Binisaya gikan sa mga Bisayang magbabalak sa Sugbo ug Kabisay-an hangtod na sa Mindanao ug lakip na sa mga langyawng Bisdak nga padayong nahigugma sa pinulongang Binisaya. Kining atong Cebuano nga balayan, ang Balakista, usa sa pipila ka balayan nga modawat ug libreng mopatik og mga balak.

Matag karon og unya may ipatik kitang mga mananaog nga balak sa nagkalain-laing bangga o dili ba kaha namantala sa mga magasin ug mantalaan.

PASIDUNGOG

Ang Balakista, isip usa mga balayan sa internet nga momantala og mga balak gikan sa mga batan-on nga nangandoy nga mamahimong bangiitan nga mga magbabalak ug mga ilado na sa natad sa literaturang Bisaya ug Sugboanong pamalak, nakabaton usab og mga pasidungog ug pag-ila gikan sa nagkalain-laing komunidad.

Ang Balakista nominado sa Philippine Blog Awards 2011 sa kategoriya nga Culture and Arts (Visayas) ug Filipiniana (National) diin ang Balakista mao lamang ang bugtong Sugboanong balayan nga nalakip.

PAGPADALA OG BALAK

Ang pagpadala og balak sa Balakista bukas sa tanang magbabalak nga gustong mopadala sa ilang mugnang balak  nga Bisaya aron libreng ipatik dinhi ning atong Bisdak nga balayan. Ipadala lamang ang inyong balak isip message sa Facebook sa Balakista.

Lakipi ang balak og mubong saysay bahin sa imong kaugalingon ug asa ka nagpuyo. Kon may dugang pang impormasyon sa imong kaugalingon, ayaw pagduha-duha og apil. Kon estudyante pa ka, ayaw kalimti og lakip ang imong eskuylahan aron atong maapil ang imong tunghaan sa impormasyon bahin sa imong kaugalingon ug mabasa ubos sa mga balak.

SUHESTIYON SA BISDAK NGA KOMUNIDAD

Kon may suhestiyon ka alang sa Balakista o bisan unsang pangutana bahin sa atong balayan, ipadala lamang sa e-mail sama sa ibabaw o ipadala isip mensahe sa Facebook. Ang inyong mga ideya nga may kalambigitan sa balak, sa atong pagka Bisaya, ug sa Bisdak tang komunidad may purohan nga mahimong paagi aron mas daghan pa ang makabasa og bisaya nga balak sa umaabot pang panahon.