#24

sigon sa iyang kasinatian
abtik pas liti kon
kini siya magawsan

(kaniya dakong lumba ang gugma)

mao tingali kanunay
siyang mabiyaan
ug sa langit makihatan


-MARCELITO NARVASA
Aloguinsan, Cebu

Domingo

(after Dr. Melvin Cortez)
Gaksa ko karong adlawa
kay gihidlaw kos imong singot.
Kay iya man ang tibuok semana,
gaksa lang ko karong adlawa.
Pasagdi siya nga matingala--
sa inalisbo sa tam-is nga singot.
Gaksa lang ko karong adlawa
kay gimingaw kos imong kahumot!

--MARCELITO NARVASA
Aloguinsan, Cebu

Ikaw ug Ako

Ang danghag makaipsot
 sa dughang way kamot.
-- Dr. Melvin Cortez,"Singsing: Bagting ug Kaliring"


I. Sa Kahayag

una miabot ang gugma sa way pagduha-duha
misunod pagdagan ang lubas tang katuyoan
bisan pa ang kalibotan wala ko gikauban
pagpangga ug amuma ikaw akong gisaloma

mga agiw nga napalid sa adlaw mihawid
ang kahayag nga ilad giukit ta sa palad
ug bitik sa saad ang mga titik sa panaad
kapalarang di masuhid sa hanging sinapid

padayon nga gipaligid tibugol kong pagsugid
saksi ang pagmanggad sa sinemana kong halad
ibabaw sa hilawng pagpasagad kita nangasamad
ug way sala ang paniid kay padayong gibag-id

ang hait nga katawa nga mipahit sa pangagda
sa kainit sa atong bugan nagmugnag balayan
ubos sa hinog nga bulan mipahiyom ang duyan
didto kitang duha naginukdanay sa ginhawa


II. Sa Kangitngit

human sa talikdanay dali kong gisubay
ang agiw ug talithi sa pikas nga kinabuhi
dali kong gilingi gilili sa saming liki
liboan ka dagway sa pikas nga kalipay

ang kahilom namaak sa kahilom nagsabak
ang kagahapong ngilo sa higdaanang bildo
way bili ang pagtuo sa kahingpitan kay luyo
sa hungaw nga bahakhak way dughang giagak

sa ngulngol nga lawak sa lumoy nga balak
sa mga panid sa libro sa tumoy sa akto
sa pahiyom sa kuwadro sa ungol sa kwarto
naminaw sa hilak usa ka magul-anong buwak

human sa talidhay gihipos ko sa inanay
padayong gipakli ang hinapos nga pagbati
nga di na mabakwi nga di ko na mauli
anino sa imong dagway hugot nga kalaay


--MARCELITO NARVASA

Aloquinsan, Cebu
2009

bulan

wa lang siguro nimo hikit-i, apan ako kadtong hilomon nga bulan nga miambit sa imong pagtikawtikaw, mitimbaya ug mitutok nga masinahon dihang imong hugtanon nga gipadayag ang timgas mong kaanyag sa kalibotan. ako kadtong malamdagong mipabadlis sa kahayag ug mihiwa sa imong pagpangaliya. wa lang ka masayod kay sa imong pagtando diri kanako, sa way pagpamilok, tuy-od mo nang gigasa ang imong himungaya ngadto sa baybayon. sa matag bag-id ug kiay sa takna, masinahon ako nga misaksi sa hinayhinay nga sinukliay sa kabubut-on. ang kada tikang sa tanyag giisip ko na nga kabahin sa imong kinatibuk-an. ug si kinsa man ako nga mokuwestyon sa kamas sa imong kabig? ako nga nagpahipi lamang ug nagpaabot nga gakson sa gahom sa pagdamgo? ug lurat nga naghuwat nga lilion sa lamat sa usa ka linalang? dugay ko nang gidawat ang kaangayan ug nakaamgo na ako sa kaakohan. igo na alang kanako ang higayon nga sa panagsa, lumsan mo ako sa kinawat nga katahom.

--MARCELITO NARVASA
Sibulan, Negros Oriental