higayon

(kang Dib)

sa makadaghan na nga higayon sama ini
ikaw ug ako magbarog, magtupad.
ako maminaw kanimo ug sekretong manghipos
ug manago sa imong mga pulong

matingala ka, kay usahay mas abtik
motubag akong kahilom sa imong asoy.

sa sunod nga higayon sama ini
nga ikaw ug ako magbarog, magtupad
unta kahibawo nang mohilom ang akong kahilom

ug sa atong panag-estorya
unta moabot ang higayon nga mahimo na nako
ang pagpalanog ning pinitik sa kasingkasing

kay sa sunod dili gani gihapon,
na, basig moupos ang mga higayon
ug hadlok ko nga ikaw ug ako magpabilin lang
sa susamang talan-awon;

magbarog nga magtupad,

-JESSREL GILBUENA

Dakbayan sa Sugbo

sa akong pag-abli sa pultahan

nabuklas ang kangiob.
ang inyong mga mata morag hayag-lingin
nga bulan, nag-dan-ag sa akong pagtim-aw.

gidali-dali ninyog hipos
ang suliyaw sa mga agulo
giinat ang kunot sa habol
gipaundo ang lupyak sa unlan
ug gibistihan ang hukas nga higayon.

sa kahilom
sa akong pagpirok
ang lawak nahimong lubnganan sa
tubig nga gibadbad sa akong tutok.

-JESSREL GILBUENA
Sta. Fe, Isla sa Bantayan

Sa Ngalan sa Bagyo

(tubag–sumpay sa Sa Wala Pa Hinganli Ang Bagyo ni Erik Tuban)

Nalawos na ang takdol sa bulan. Ug kon tutokag maayo mapasilangan na ang agtang sa adlaw. Apan ang mga tiguwang sa among baryo nadayon gyog kuku ug wa na katuyhad gikan sa tibuok gabiing hinupo. Ang mga bata nga naglupa-langit atong gabii, nagtago–tago pagkabuntag ug wa na hingkit­i sa ilang hago. Samtang ang mga batan-on nga tigkalos ug tubig o tigbughag kahoy ug hilig manlumpayat da taghoy sa sanga sa akasya, karon, maoy gikatkatan sa mga sanga niini. Katong lantay nga nahimong lubnganan sa matag kuto nilang inday nahimong saksi sa pagtanday sa lapok ug sa ilang mga hanoyng paa. Dihay laya ug basa nga mga dahon o balili murag gipugas ug balik sa yuta. Busa kon imong sutaon, kini salog atong salag nagtungtong sa punoan kung asa gitugway katong kanding nga miipsot. Ug karon kinsa pay sutaon ni kapitan nga nagpuyo naman ang mga palahubog. Angay ba diay gihapon niyang supilon ang maoy sa ilang dangulngol?


--JESSREL GILBUENA
Sta. Fe, Isla sa Bantayan

pagkawhat

Luyo sa mga bungtod ug lasang
gihadot sa huyuhoy ang haganas sa imong ginhawa
ang dag-om sa panganod nagpaila sa kilumkilom sa imong mga mata
akong dughan milayat padulong sa langit ug nagmugnag dugdog

apan gilingi ko ang kasadpan,
ang bidlisiw sa adlaw nagdagkot sa paglaom nga ikaw ako pang maabtan

Busa akong gidali ug suong ang lasang ug gibaktas ang bungtod
buot kong bitaron ang kataposang panid sa
kahayag nga unta mopukaw sa gaduka mo nang
kahimatngon

apan ang adlaw sa dayon nang nanghipos
ug sa akong pag-abot

uhawi na ang tanan
ikaw nakigdug na sa kangitngit sa dayon nimong pagkatug

mas milagubo ang dugdog
mas miitom ang dag-om
ug sa akong mga mata mitubod ang ulan

--JESSREL GILBUENA

Sta. Fe, Isla sa Bantayan

pahinungod sa history teacher

imong baba naabot na sa Athens
gabatbat sa mga pulong nga gilubong
sa mga pantiyon sa kalimot

imong gikaykay ang menteryo sa kahilom
aron habwaon
ug banhawon
ang kalabira sa kagahapon

nga sa makausa gibilaran
sa mga Romanong nagbaraha

pwerti man ang imong libak ni Julius ug Alexander
wa ka mahadlok,
wa ka giungo o gidaman
di man pod sila maguol,
sila pay magpasalamat kay tungod nimo sila nasikat

imong baba nga nagbuwa-buwa
maoy nagtutho sa nag-ango-angong orasan
ug nagpabata sa tigulang nilang kasaysayan

--JESSREL GILBUENA
Santa Fe, Isla sa Bantayan

eklipsi

bahalag usahay
basta dili imposible
ang hawang kong adlaw tandayan sa landong sa imong bulan


--JESSREL GILBUENA
Santa Fe, Isla sa Bantayan