4.16.2016

di ba nagkita ta kaniadto?





panagdungan sulagma hataas
kasinatian kalagnong pagkahimatikod
wadamhang panagkita balaanong tuyo
tinagoan ning kinabuhi mao ang pagkat-on
ug pagpakabuang sa kaugalingon pinaagi
sa pino ug hapsay nga pagsadsad mistikong
panaghibagat nirvana satori kosmikong kahimatngon


-melquiadito maambong allego, m.d.
pecatonica, Illinois, usa

(Hulagway gikan sa DeviantArt.)

4.02.2016

paghandom



Huyang na
Ang pagkupot sa dahon
Hapit na kini malarag
Sa nanglabay'ng panahon,

Buot man kining sapnayon,

Apan, hinay ning nibuhi
Ug daw handomanan
Nga labing handomon.


-JOHN PAUL ORACION
Dakbayan sa Sugbo


(Gradwado sa Cebu Normal University ug interesado sa pagsuwat og balak aron madunggan ang iyang tingog.)

(Hulagway gikan sa DeviantArt.)

kinsay ingon nga makililimos mi?



Bantog ba gisi among sapot
Buslot among tsinelas ug
Bulingot pa ang among dagway
Sa lubot sa kalderong
Gigabaan kay dili
manghatag ug sud-an

Bantog ba wa mi ligo
Di sama sa inyo nga naa pay
Ulan sa tubo ug buwa
Sa sabong ambot makatang-tang
Ba kaha sa kabaga sa buling
Nga nibara sa inyong konsensya

Bantog ba nga ang among paniudto
(Aw, pani-adlaw diay kun mukaon ra’g kas-a)
Kining bukog nga salin sa inyong iro
Gigrasaha’g nagpungasi nga mga laway
Sa mga dilang naningkamot
Pagkab-ot sa nahabiling langit

Bisa’g ing-ani among itsura
Wa mi nangayo’g bahin sa inyong gasa
Muluhod, mukamang, mutilap
Matumba pero mubarog, mupadayun
Dungan sa paghanduraw
Sa pagsubang sa sunod nga mga adlaw...


-SHEILA ROMULO
Dakbayan sa Sugbo


(Si Sheila Romulo bag-o ra nagkat-on pagsulat ug mga balak sa pinulungang Bisaya. Full-time instructor siya sa Rogationist Seminary College – Cebu ug nagtudlo sab isip usa ka part-time instructor sa University of San Jose – Recoletos ug Humanities, English, Literature ug uban pa. Sa pagkakaron, nagtiwas pa siya sa iyang Doctor of Education in English Language Teaching sa Cebu Normal University.)

(Hulagway gikan sa Metro Cebu.)

4.01.2016

nganong mopadayon ang balakista sa ikalimang tuig



sa kapin lima ka tuig
nga pagpatik og mga batan-ong balak
nahimong hingkod ang balakista
sa pagtuki sa nagkalain-laing bulok
sa balak nga ipadala sa mga batan-ong
nangandoyng mahimong magbabalak

ayawg igsapayan
nga usahay ang batan-ong balak
dili makabarog sa iyaha sanglit
gihimo kining iyang unang lakang
aron siya madasig sa pagpadayon og lakaw
aron makaabot unya
sa bangaw sa pamalak

sa mosunod nga mga semana, buwan, tuig
human karong ikalimang tuig
mapuno na unya kining balakista
og mas daghang mga balak
sa mga batan-ong magbabalak
nga kamao nang mogama
og hingkod nga mga balak

'buhi ang balak!'

-piero aldaya
dakbayan sa sugbo

11.10.2014

ang kinabuhi morag bubble gum


Dili gyod maikalimod
Nga ang kinabuhi morag bubble gum.
Ang katam-is imong masinati
Anyag ang imong mabati.
Kon dugay na
Iluwa na na
Kay wala nakay matiti niana
Nana sa baba na lang imo ana.

Letse! Gipapikit pa jud sa lamesa.

Pero ayaw kabalaka
Kay sa akong gipahimulong pa ganina
Ang kinabuhi morag bubble gum
Kay moabot ra angay nga panahon
Ang tawong may dako nga kadasig

Mohapit!

Mopunit!

Ug Mohungit!

Sa bubble gum
Nga gilukop sa imong nana
Nga gikan kaniadto sa imong
maanindot nga baba.


-Angelito G. Nambatac Jr.
Dakbayan sa Iligan