Kon Aduna Lang Koy Sportivo

Kon aduna pa lang koy Sportivo
Dili na unta tamak-tamakan
Ang among pagkatawo
Niining among pinilanggang silingan.

Kon aduna pa lang koy Sportivo
Wala na untay mga hubog nga magsayaw-sayaw 

sa among agianan, with matching disco lights pa!
Kay moagi na man
Ang kotse sa adunahan.

Kon aduna pa lang koy Sportivo
Wala na untay payag-payag sa dalan nga matukod
Ug wala nay magpatokar
Og mga tingog nga madunggan sa pikas bungtod.

Kon aduna pa lang koy Sportivo
Dili na gayod ko maulaw
Kon ang mga klasmeyt ko moduaw
Niining among balay aron maglingaw-lingaw.

Kon aduna pa lang koy Sportivo
Wala na gayoy maglaray nga manok
Nga matag buntag motilaok
Ug magsaba-saba namong nahinanok.

Kon aduna pa lang koy Sportivo
Dili na unta ko masubo
Kon makauli na sa lawom nga kagabhion
Kay adunay banda nga mitokar, mibabag sa among agianan.

Apan, unsaon ta man
Wala man gayod koy Sportivo
Hangtod na lang kaha kini sa balak
Kining akong gamay nga damgo?

--ANGIE LEE

Pagsabungan, Dakbayan sa Mandaue

Uwan

Mibundak na ang uwan, akong higala.
Ang hangin, mihunghong sa akong dalunggan.
Ang mga baki, mihagikhik.
Ang mga atop nabalaka, mabasa na pod silag balik.

Mikusog na ang uwan, akong higala.
Ang danguyngoy sa hangin, makabungol na!
Apan, ang mga baki, nagpadayon gihapon sa ilang kalingawan,
Ug ang mga atop, nadawat na ang ilang kasinatian.

Kanus-a pa kaha mohunong ang uwan, akong higala?
Kanus-a pa kaha molinaw ang panganod nga akong gihangaran?
Kanus-a pa kaha mopakita kining bangaw nga akong gihuwat?
Kanus-a ko pa kaha madawat,
Nga ikaw ang hinungdan niini, akong higala?

Nasayod ko nga sa Iyang matuod nga panahon,
Mohunong ang uwan,
Malinaw ang kapanganoran,
Ug mopakita na gyod ang bangaw nga dugay ko nang gihuwat.

--ANGIE LEE

Pagsabungan, Dakbayan sa Mandaue

Ayawg Tugotig Kan-on Mo sa Buwaya

Ayaw tugoting kan-on sa mga buwaya
Ang inyong pagkatawo,
Ang inyong lawas ug kalag,
Samtang nabuhi mo niining nagtuyok nga kalibotan.

Ayaw tugoting mapailawom mo nila.
Kahibalo mo ngano?
Sakit ilang himbis, makahilak gayod mog dugo
Wala na lang mo masayod, hinay-hinay na diay nilang gikutkot
Sa ilang talinis nga himbis ang inyong kaunoran
Ang inyong liog hinay-hinay nang gituok
Ug ang inyong tiil gibitad padulong sa lubnganan.

Pagbantay mo, ayaw og kompiyansa
Bisan pa kon makit-an ninyong wala na sila galihok sa inyong atubangan
Wala moy gahom sa pagbasa sa ilang hunahuna
Pag-amping mo, kay basin sa sunod wala na moy ugma!

Ug kon dili malikayang hasmagon mo nila,
Ayawg kaulaw, pangayog tabang.
Kon ikaw ra usa,
Iampo na lang sa langit ang imong kaluwasan.

--ANGIE LEE

Pagsabungan, Dakbayan sa Mandaue

Naunsa na man ang atong world karon?

Akoy na-stress sa atong world karon
Kahibalo ba mo ngano?
Kuan man god, kanang, dili na ma-understand ang people sa atong surroundings
Mora silag mga pokemon, nang-evolve na to the highest level! Bongga! DMD!*

Kon ganahan mog panadaliang happiness
Well, daghan kaayo diha sa kilid-kilid, o!
Basta sakto lang ang imong bayad,
Well, i-ready na ang motel at simulan na ang saya!
(Basta ayaw lang pag-expect nga ikaw ra ang iyang gi-churva te,
FYI*, daghan mo! Bongga!)

Kon dili pod ka ganahag personal,
Well, just go online!
Mapa-wow jud ang imong eyes,
And take note, internet connection lang ang imong kinahanglan!
(Well, kon wala kay internet connection, adto lang sa internetan, naay piso per hour lang!)

Bongga na ang lovelife ngayon mga te
Dili lang in person,
Aduna na poy digital version!
Kung ganahan kang magka-someone para sa imong kaugalingon
Pwede mo siyang ingnan og 'I luv u', piso ra ang imong gastohon!

Ug kon makuha na nimo ang iyang 'yes'
Char! Jackpot! Congratulations! You now have someone for yourself!
Someone nga imong maka-'i luv u',
Someone nga imong maka-HHWW*...
Someone nga imong ipanghambog sa imong friends...
Ang masuya, ma-deadz!

You know mga te
Tungod sa ka-advanced sa atong technology
Ang mga people, wala na kailag abstinence
Mag-churva diri, mag-churva didto
Bisan pag sa sacred place adto maghimo! Ay Ginoo ko!

Oh well, according sa mga nadunggan kong story
Dili na daw importante ang virginity (Estoryahee!)
Ay dah, basta ra daw naay pleasure

Make love and live happily ever after!

Mao bitaw nang naay girls karon nga midako na ang tummy
Mora ba gyog ready na mahimong mommy!
Hay naku! Kaluoy tingali nilang mommy ug daddy
Naglisod na gani, aduna na poy buhionong lain! DMD!*

Pero saludo man pod ko nila mga te,
Kay wala gyod nila gipa-abort ang ilang precious baby
Whoa, bisan pag dili ready,
Sige na lang, take on the responsibility!

Mao ni ang reality
If we just make ourselves be bungol-bungol on this issue,
What would happen to the values of humanity?

--ANGIE LEE

Pagsabungan, Dakbayan sa Mandaue

-----
*DMD-di mada'
*FYI-for your info
*HHWW-holding hands while walking