Mga Bika sa Buak nga Kaang

(ang mga bika nga nagpasad ning asoteya
mga tipaka sa napulpog
nga buhilaman sa mga bulak
Karon ang pagkahugpong kanhi
sa mga gamot sa miukiok nga pagpakabuhi
maoy mga tumpag sa buak nga bantayog
Nagpasad ug nagpasad
nga gitilapan sa nagkapal nga mga abog)

Ang tingusbawan nga giluyong sa hangin
ug nga sa kalinga sa pagpasibaya gipadpad
angayng itisok sa kaang
Ang pagpangandoy ang pagdamgo mao bay
pagpanglipang sa Bulaknong Handurawan?
Kon mapusgay man gani ang salamin
sa mga bituon hagoka ug salingkapaw da
ang pagpiyong sa mga nagdibuhong mata

(ug ang mesitera maoy umol sa mga kamot
sa Arte sa tawhanong kulit
alang sa mga matahom ug mahumot
Ah ang kaanyag usahay magtipig kalaksot
nga mogun-ob sa kastilyo sa kahimungaya
sa nagsapnay ug naghapa kaniya
Ang palad nga nag-amoma
kagiwan sa iyang pagka-maaghopon)

Ang hardin lakdan sa mga anino sa tuig
ug mao na lamay magtipun-og ang mga tipik
sa nanglabay nga kasaysayan
sa hudyaka sa mga senyoritang kabulakan
Ug ang Kaang--- (nga obra maestra kanhi
sa Kinaiyanhong pagsapnay sa
Buhilamanong Arte)--- mao na lamay
nagkatagkatag nga mga Bika!


-MELQUIADITO MAAMBONG ALLEGO, MD
ALBICALARIVI Poetry Group
BATHALAD 7
BEBODOFILAMIMUVE Poetry Ensemble
BATANLAK Nomads
Palm Harbor, Florida, USA

literotica: sa opisina

namahit ang kabugnaw sa aircon.
walay pending nga gimbuhaton.
giduka ang kahapunon.
nag-high heels na sab si Michelle ron.

paspas na-download and youporn.



-MAMBO BUSO
Junquera Street, Cebu City

naghidlaw kanimo

Sa kanunay na lang ba
ako maaplohar
sa matag kahig ug kunday
sa imong dila, nga ni bisan kas-a,
sulod sa akong ginhawaan
wa magpahamtang nako
og tumang pagkakaplag
sa diyamante sa imong kawayan
daw lang mag-amagan.

Diin ko man kini
pangalapon karon
nga dili man kini
sama sa mga gamot ug dahon
nga mohupay og mga balatian ug kagutom.

Sa unsa na lamang nga paagi ko
haployon kining ngabil ko
nga naghubaw sa kadag-om,
ug sa mga gititib
nagpaabot kong 

mga ngipon?


-JANN DAINVER MARAVILLA
Clarin, Misamis Occidental

gusto kang mamahimong desente kompleto molungtad dimalimtan nga magbabalak?

labing menos sinati o suhito ka sa pinulongan mas bintaha kon agalon ka sa mga
pulong hanas ug batid sa ilang kahulogan ug kagamitan (nuances) mait-on nga
maniniid maukiton mausisahon makatagik bisag unsang makatukbil sa balatian
bersatilyo balakero tabunok og handurawan (dili mabaw superpisyal taphaw nga
magbalakbalak) basasulatbasasulatbalak sulatbasasulatbasabalak amen


-melquiadito maambong allego, md
palm harbor, florida, usa

MAHITUNGOD SA PAGBAWOG OG KUTSARA

Makabawog baya kog kutsara
gamit lang ang akong hunahuna.
Ayawg katawa. Wala ko nagbinuang.

Ang sekreto
mao ang paghunahuna
nga wala kay gihuptan nga kutsara.

Daghan ang nasagmuyo
kay dili sila makabuhat niini
bisan tuod ako na silang gitudloan unsaon.

Apan adunay pipila
nga nakakuha sa akong buot-pasabot
ug nalingaw sa maong talagsaon nga buluhaton.

Ang usa gani nila
nalabwan ang akong kamaohan
tungod sa pagbawog niyag tinidor.

Misulay mig pangutana niya kon unsay buhaton
apan igo ra man ming gikataw-an
ug wala gayod mitug-an.

-CD BORDEN
Dakbayan sa Sugbo

BALAKISAW: CONTROVERSIAL WRONG DECISION

Klaro nga mananaog si Manny Pacquiao. Nakadaog sa 11 ka round
samtang si Tim Bradley usa ra.

(Nagpaabot ang tolo ka mga maghuhukom samtang si Pacman nitiwas
pagtan-aw sa kampiyonatong dula sa Boston Celtics ug Miami Heat.
Nidako ang ulo o prima donna na si Manny Pacquiao? Kinsa siyang
pahulaton ta? Ato kining pailhon kon kinsay adunay gahom)

The winner by split decision: Timothy Bradley!

-MELQUIADITO MAAMBONG ALLEGO, MD

#24

sigon sa iyang kasinatian
abtik pas liti kon
kini siya magawsan

(kaniya dakong lumba ang gugma)

mao tingali kanunay
siyang mabiyaan
ug sa langit makihatan


-MARCELITO NARVASA
Aloguinsan, Cebu

Buntagpangaliya

Salamat Ginoo/ Sa pag-uli Nimo/ Sa Espirito ko


-Melquiadito Maambong Allego, MD
Palm Harbor, Florida, USA

talan-awon sa ting-ulan

gibisbisan sa panganod ang kalibotan.
namulak og payong ang kadalanan.


--GRATIAN PAUL TIDOR

Dipolog