Hapit na man diay Pasko, ingon pa sa tiguwang
Nga naminaw sa duha ka Jeepney rapper
Pwerte sab ang ngislit sa nag-rugby nga buang
Dihang gipakanaog sila sa Drayber.
Sa iyang balay, di pwede ang way sapi.
Dili biya tanang negosyo, makalugi.
Ug dili tanang puhonan, magamit sa negosyo.
Pananglitan, ang batan-on nga kanunay
Nagpanday og palasyo sa iyang mga damgo
Posibling matagakan og bitoon sa kalaay
Nga iyang ipabadlis sa aso sa kangitngit
Wa tay Snow! Wa tay Snow!, singgit
Sa usa ka banda. Na hala...usapa na!
Ah! Inyo man hinoon tang isu'd sa bulsa,
pu'ng pa ni Mike Rama nga nanghinawak
Nagpaso-paso sa habog niya nga lawak.
Sa siyudad sa malipayon, di pwede mohilak.
Brad, way kawat? Wa lagi part, diay balak.
Samtang nagpakapaka ang lantaka sa Sikatuna
Ang kamatuoran lumping nga kwarta gisyat sa lata.
Na hala, inyo na nang hamon ug keso de bola.
Sa kainit sa higayon, benditahan na nila ang lukay nga gipormag krus nga inig abot sa balay isuksok sa pultahan aron moabog sa mga maligno, wakwak, di- ingon-nato ug liti. Igkahuman, walay laing maukay kon dili ang mga hulagway sa kaban nga gilumotan samtang ang binignit ug biko sa kaha gitilaptilapan sa iring sungkaban ug ang mga tulumanon sa kiblat nga kahaponon nga gibituonan ni Nora Aunor aron mopasibya nga "Walang Himala!" ug posible sad nga makataghap og live show sa dalan diin si Kristo Bargayo mohunad na sad sa samad sa palad aron magpalansang alang sa tanang kalapasang giwagtang sa Mesiyas ug aron matuman na ang giatang-atangan sa tanan diin ang pagmuro sa Biyernes Santo makapaitom sa hilom nga Sabado. Inig ka ugma, kon di ka makakita sa imong itlog, kuhaa lang ang lukay nga imong gisuksok ug sa kainit sa pagkabanhaw mao kini ang idabdab ni Hudas nga sa makausa pa, nabuntagan sa dalan nagpaabot nga madakdakan sa tanang tampalasang nabug-atan sa kasal-anan.
Si Day Bayoleta adunay sunoy nga labihan ka bagsik nga wala nay mobisita hinuon niya. Gihigugma ni Bayoleta ang sunoy ug ang sunoy nahigugma ni Bayoleta, sama sa asawa. Diay pangas-a among gilaag si Day Bayoleta dihang nipatighulog siyas patag. Amo siyang gihimamat sa Turtle's Nest ug nagtagay mi tibuok gabii. Ang nga'n kuno sa sunoy si Baldomero, ug naghisgot siyang Baldomero tibuok gabii nga kon wa ka masayod, abi nimog iyang bana si Baldomero. Bisan ganig kahibaw nako, abi gihapon nakog iyang bana si Baldomero. "Gamika man tos Baldomero ganihang buntag." "Sweet kaayo siya gabii. As in." "Gwapohang Baldomero uy! Mura gyog si John Lloyd, di ko kahunong og tutok niya." Gwapa gihapon si Day Bayoleta ug makabuang gihapon ang gugma. Pagpanguli, nanamilit na mi sa usag-usa, ug sa kalit akong gituhak sa aping si Bayoleta, pero hinay ra, kay ako nasayod nga siya naminyo na og sunoy, ug ako kining girespetaran. Gilipay siya ni Baldomero sa mga paagi nga dili nako kaya. Puno sa bitoon ang langit, ang mga silop nanago sa kasagbotan, Hay, kanindot mabuhi, tingali, ug nangihi ko sa awto sa ngitngit sa akong pribadong kangitngit.
gihalokan ko ang imong mga mata, o yutang tabunon
ug gihapuhap ko ang aping ug hubon sa sayong kabuntagon
gisudlay ko ang dunghay sa kahangtoran mong buhok
ug padayong gisubay ang tiunay sa tinipigan mong bulok
padayon kong gihulma ang matag kurba sa imong lawas
gisabwag ko ang alimyon sa mga prosa mong rosas
ug giromansa ikaw sa kagabhiong ako nag-inusara
ug gipangga ko ikaw daw sama sa usa ka asawa
ikaw nga may kahayag nga milamdag sa ugma-damlag
ikaw nga naghatag og tukmang kaisog ug kaikag
nagbukal nga tubod kay ang sala sa unod, ikaw mobanwas
mohunad sa samad, napakyas nga saad ikaw mohugas
padayon gihapong akong nagpangita sa imong mga kasikas
giduaw ko ang kada sanga, kada suok ug eskina
kay ang siyudad buta, ug ang kamatuorang idlas.
marquis dk:
ang kamatuoran nga gikumkom diha sa kamot
nag-ugom sa katuyoan ug panginlabot
kay kini angayang isibya ug isulti
kay kini kagawasan sa liboan ka kalapati
gipatugpa, gibuhian ngadto sa langit
panyo nga puti diha taliwala sa kangitngit
bisan pag kini nagbaton ug gibug-aton
sa liboan ka kahingawa ug panamilit
gibuka ko ang akong baba sa pamasin
nga mapadayag ang bahandi sa kabilin
kay ang bugtong bulawan diha sa kaban
mga garay, batadila ug diwa sa batang dila
nga misuway ug tila sa panit nga pinulongan
pamatia mga gagmayng tingog nga gipalanog
kay ang kagawasan usa ka tabanog
kay ang kagawasan usa ka tabanog
kay ang kagawasan diay usa ka tabanog
p.d.ma:
siniloy*
sa kahoy:
huyuhoy.
ang awit
misampit
midapit
mitiyabaw
paminaw, paminaw
sa dunggan
sa dughan
sa duyan
ang yuta
tabunon, tabunon
tabunan
ang langyaw
nga langaw
ang dag-om
sa dagom
naghandom
kahilom
kahilom
kahilom
kahilom
kahilom
kahilom
marquis dk:
usa kini ka sugilanon sa paghigugma
sa dalaga nga dugay ko nang giamuma
miduaw sa dagang kining mga letra
sa pinulongan nga matawag kong akoa.
laylay sa mga balak ako siyang giharana
p.d.ma:
dungga ang huni sa mga salampati
dili na mapugngan bul-og sa akong pagbati
siya ang una ug ang kataposan
tipik ug kabahin sa akong salabotan
marquis dk:
ug nangatagak ang buwak sa akong galamhan
ang alom sa yutang pinulongan akong nakit-an
gikumkom ko ang gahom mo o sidlakang saloma
o ikaw ako gihigugma,
matahom nga dalaga.
--MARQUIS DE KINTOLIMBO
Dakbayan sa Sugbo
*siniloy (after diosdado alesna): verse lines consist of three syllable words accented on the second syllable, effecting a characteristic euphony that mesmerizes with its plaintive strain.
taliwala sa kurikuri sa butag bungol nga nag-agi-agi
didto sa carbon kalma nga miplastar sa debateryang ampli
ang alalay sa anawnser, mipahipi mikidhat
sa anawnser nga may giugom nga liboan ka
epeks sa sintisayser
dayon sa hinay miwakli sa minaomaong kardbord nga takoban
nga may drowing ni son goku ug sa namakyu nga san pedro
dayon sa hinay mipahiluna sa dangog nga ikog gikan sa kaban
piyong nga mihangad sa langit nga daw nanglimugmog
o nag-ugom og liturhiya
ang simod sa hangin miumod, nagkibotkibot daw ang simod
nagtigom og enerhiya
mipabuhagay og pipila ka pulong sa pangyamyam
nanawag sa katawhan, nag-awhag sa kulbahinam:
ania! moihap kog katulo, susiha ninyo!
bitin nga gikan pa sa bukirang bahin sa karagala
(nga sa wa pa kini mangluno nakit-an
nga nagtangag og himungaan nga gikan
nanglumlom sa iyang itlog)
ania! moihap kog katulo, ug duol kamo!
tapok-i ayaw kahadloki ang buhing korbata
(kay kining tang-ang halas nga mas mangtas pas ihas
dyutayng syomoy lupig pay sonoy gikamalo)
ania! moihap kog ikatulo, iandam na ang inyong mga lata
sudlanan sa lana nga haplas pampagana sa kama
ala una!
(tooogsh!)
alas dos!
(tooogsh! tooogsh!)
alas tres!
(tooogsh! toogsh! togsh!)
apan sa di pa nato ipagawas ang bitin aduna kami itunol nga sobre
kon mahimo ayaw usa kini susiha sa balay ra abrihi
adunay numero kami nga gilakip, kon motuo mog swerte hala pustai
gamayng hinabang lang kini ang among gipangayo tabang pinansyal
pang-abag sa nindot nga katuyoan ug maayong kabubut-ong pangmedikal
ania pod kami tambal sa hubaghubag ug ang kahibungan tawas tapol
pangwagtang sa ngil-ad nga baho panghinol sa gustong mosyapol
Sa tungang gabii imong makita ang mga bentana abli ug ang mga pultahan serado. Ang musika milugwa sa tanang lungag diin asa ang mga himatyonong kagaw ug ang kapitulo berso imong makita. Apan sa unahan, unahan pa gyod, adunay mga hilak nga hilabihan ka asul nga ang binuhat mamatay sa emosyon. Tanan asul nganhi. Ang mga kadalanan ug mga dagkong karsada ngiaw. Ang kagabhion gialirongan sa mga kabituonan ug ang awit sa katawhan misaka ngadto sa panganod samtang ang dagat mipalayo nagpangita sa bulan, kalipay nga grabe ang gibug-aton ug hilabihan ka gamayng panghigawad alang sa mga lumoyng kalag sa mga balod. Ang baybayon puno niadtong mga mata nga walay lawas nga masugatan nimo sa layong bungtod ug pagawpaw ug puwa sa dugo sa namulak nga kahayopan. Mga minatay sa hinigugmang mga adlaw, sirkus sa emosyon ug kabungog nga puwa, puwa, pero kung asa ang kasingkasing mipitik sama sa maanindot nga kampana nga gihimong luspad sa langyawng mga adlaw. Ang punoang pultahan mipaagas ug mga inalisngawng maraag sama sa mga uhong nga atong gihigugma, ang kahoy naa sa duol ug ang mga himsog nga kababayen-an nagdagan-dagan nga nangtapok sa mga nabanhaw ug pumapanawng dahon; sila ang mga langgam nga managlahilahi og kolor ug makaawit og mas maanindot pa sa hangin. Kwadrado kung asa ta gituok sa kahangtoran, apan sa pagpanaw atong nahibaw-an nga ang mangangayam anaa didto, kauban nianang mga iro, niadtong mga mata ug walay nakalimot nga magpakita niini ang giatayng simbahan nga mohapak sa imong ulo sama sa bato nabuak nga walay hilak.
Sa dihang ila kong gipili isip presidente sa kapilya, akong gipahabhab
ang akong parokya sa pinakalami nga sud-an sa kalibotan. Apan wa ko
magdahom nga usa diay kini ka dakong dag-om nga magsunodsunod
sa akong alimpulo. Una, ang duha ka ektaryang kamaisan ni anhing Tatay Nisyo
naugdaw sa usa ka gabii nga didto kos Sentro, nagbag-idbag-id kuyog
ang akong mga tawo-tawo sa kapilya. Sunod, ang among birhen nga
mohilak og dugo, gilungkab sa iyang hawla. Bag-ohay lang gani, ang
kamanghorang sipat ni Nang Sipin nga si Junjun gipahit ang katunga sa
nawong sa among samkon nga Rottweiler nga si Bruno. Tua, luoy intawon
kaayo - ang dagway na murag kontra ni Batman. Kinsa gud tawoy magtuo
nga dakong maldisyon diay ang akong pangambisyon nga mahiduol sa
gingharian sa akong amahan? Usa ka gabie niana samtang ako
naghinuktok sa pantawan ug nagpaabot nga sudlan sa gahom sa
espiritu santo, akong gipamalandongan ang kidnapper sa Crying Lady
ug ang dagway sa kontra ni Batman. Sa kalit lang, nibutho sa akong
atubangan ang istatuwa ni Mother Mary. Nagsul-ob kinig bilong dinurado,
guba ang dagway ug dugoon ang mga ngipon. “Iandam ang mga katawhan!
Adunay nagsingabot nga katalagman,” nagkanayon kini. “Sa adlawng Sabado,
kanus-a ang bulan usa ka patayng bato, duawon kamo sa dakong panghitabo
nga mokutlo sa liboan ka kinabuhi diris Baryo Kalbaryo." Sa kusina, adunay
nabuak. Mihaguros ang habagatnong huyuhoy nga nagpadahom sa
parat nga panan-awon:
Nagdilaab sa atbang nga isla
ang mga bombilya.
Ang dagat nihunas, way kisaw
way kanaas.
Wa na lang nako tugoti ang akong kaugalingon nga latoson sa lilo sa kahibulong
ug katingala. Dihadiha dayon, akong gisugo si Inday og pahipos sa hinayhay.
