Pilosopiya de Rebolusyon

Sa talawan ug isog,
Hain ka modapig?

Ako, sa talawan.

Ngano?

Kay kon mahurot na
Ang iyang talaw

Ang kaisog maoy magpabilin
Ug mopatigbabaw!


KOMANDER ROBOT
Jolo, Sulu

BALAKISAW: Pasko sa Habagatan

Ang mga bungol, hangol,
tulisan, kawatan,
YAWA--
manghatag na sab og bahin sa ilang mga sala
sa tanang nagluhod ug wala nagkumo ang kamot.


--KOMANDER ROBOT
Jolo, Sulu

Ikaw Ang Rebolusyon

Walay hunong ang wali sa dalan

Sa mga walhon nga daw nagyawyaw.
Bisan gipagaw na ang tutunlan
Mao lang gihapon ang gisangyaw.

O kini ba gayod ang solusyon
Sa nagkadaiya nga gumonhap?
Usa ka mini nga rebolusyon
Sa mga bayani nga inihap?

Di kaha kini usa ka dula
Sa mga tawo nga hakob og gahom,
Nga gigamit lang ang Itom-Pula
Tungod sa kahangol nga gihilom?

Atong buhaton karon ang ugma.
Atong kanunayon ang sulagma.

--KOMANDER ROBOT

Jolo, Sulu

Malakanyang

Nagsugod na ang ikatulong hugna
sa kalibotanhong gubat
Imong madungog ang kamingaw
nga kalit nangagusbat

Ang batang gipanggutom
midakong hakob ug hangol
Sa gahom nga gihikaw
daghan hinuon ang nangaangol

Gibaid na og anam-anam
ang mga hinagiban
Naguhayguhay ang gabok nga panaptong
simbolo sa Pilipinas nga gisunggaban

Kining nasod sa mga sinyalan
salbahis ug kawatan
Dili na mabakwi mahait nga pulong
ilahang naluwatan

Usa ka milyong mata nagtan-aw
nagtago sa kangitngit
Usa ka milyong tingog
nagsiyagit apan yungit

Nagtanom kita sa yuta
og binhi sa kaligutgot
Gidaro, giani
ang miturok nga kalagot

Dahong laya,
prutas nga pait
Ibuka ang baba
sa bakak nga gihungit!

Pili lang undong:
Simbahan o Presohan?
Matod nila
"dakong binuang ang sayaw sa kadalanan"

Malipayon pa kaha ang takna
inigsubang sa adlaw?
Unya nganong nag-antos man
ang tigulang nga kabaw?

Kanus-a man gayod
makita ang kahayag?
Unya na ba
kon sunogon na nato ang payag?

--KOMANDER ROBOT
Jolo, Sulu

Bentana

Sa bentana,
Gilantaw ko ang kalibotan:
Mga bulingit nga bata nagdula
sa gubot nga kadalanan,
Samtang ang pari mikanta
ug nagwali sa atong kaluwasan
Sakit ug wala pay sulod
ang ilang mga tiyan.
Gitahi nako ang gisi nga bestida
panagang sa bugnawng gabon
Nga inanayng miduot sa kabukogan
ug milakra og abohon
Dinhi sa akong kasingkasing.

Sa bentana,
Gilantaw nimo ang kalibotan:
Mga sulat para sa hinigugma
wala natiwas -- gikalimtan --
Susama sa planong kausaban
sa gobyerno,
Ang paghimo og langit
sa kalibotanhong impyerno.
Iisa ang kamot!
Ayaw na pagmug-ot!
Andama ang kaugalingon
sa katilingbanong ping-ot!
Dili na hapit kaginhawa, hala!
Pagawsa ang kasuko
sa huot nga hawla
Dinha sa imong kasingkasing.

Sa bentana,
Gilantaw nato ang kalibotan:
Wala na ang hudyaka,
upaw na ang kabukiran.
Wala na ang mga timawa,
gihurot sa demolisyon.
Patay na ang panaghiusa,
nahupas na ang rebolusyon.
Wala nay nahibiling tambal
para atong tomaron.
Milabay na ang kagahapon.
Wala nay ugma. Puro nalang karon.
Gilubong man nila ang atong pinulongan,
Kawton ra nato kini sa lubnganan
Dinhi sa atong kasingkasing.

--KOMANDER ROBOT

Jolo, Sulu