Yamo

Uno

"Know thyself? If I knew myself I'd run away."
- Goethe

Aron mahuman,
Atong sugdan:

Ang suga palonga,
Ang mata piyonga.

Sa damgo hiposa
Ang awop nga musa.

Dakpa ang takulahaw
Sa dili pa kini mahanaw.

Inubanan sa tigmo,
Kinuyogan sa yamo.


Kon ngitngit ang palibot,
Wala pa kita makasabot.

Kon puno sa paghandom,
Ang kahilom modumdom.

Kon dili na mobalik,
Pangutan-a ang pilik-pilik.

Kon atong mabagatan,
Dali ra makalimtan.

Atong sugdan
Aron mahuman.


Tanan nagkalayo,
Tanan nagkaduol.

Usahay hait,
Usahay pod habol.

Karon nangaugdaw,
Taodtaod mag-umido.

Dili puydi puniton,
Apan puydi kuhaon.


Ang tubag anaa sa pangutana,
Ang pangutana anaa sa tubag.

Kon atong balihon
Nag-atubang lang gihapon.

Adunay miagik-ik, adunay naguol,
Adunay nasaag, adunay nakatuod,
Adunay natulog, adunay nagmata,
Adunay nakahibalo
nga silang tanan usa.


Ang kabugason sa kabuntagon
Atong gitayhop aron mapalong,

Sa kilumkilom atong gisulod
Ang mata sa dagom.

Karon nga atong natukob
Ang paon sa yamo:

Unsa atong nadunggan?
Unsa atong napalgan?
Ngano kita
misutoy man og dagan?



Dos

Kay wala lagi takob,
Unsaon man pag-abli?

Kay wala lagi kuptanan,
Unsaon man pagkupot?

Kay wala lagi bentana,
Unsaon man pagdungaw?

Kay wala lagi pultahan,
Unsaon man pagsulod?


Kon atong hinumdoman,
Dili nato mahinumdoman.

Kon atong mahinumdoman,
Dili pod nato mapanganlan.

Sa tumoy sa dila nagkumpayot,
Dili matagak
bisan unsaon pa og labnot.

Ang kahilom, ang kamingaw,
Ang yamo mopatigbabaw.



Tres

alang kang Erik Tuban

Dinhi dapit ang kamatuoran
naghukas. Misilaob sa atong
alimpatakan ug kaunoran
ang mibuthong kalayo sa dakong

daob nga nag-gumikan sa mingaw
ug hawan nga luna sa panumdoman.
Ang yamo nabuslot ug mihungaw
ang gihikaw nga tanghaga. Dayon

Miabot sa mga bituon ang
atong panghunahuna. Gasamog
ang tanan titik nga nangabuang
Ug sila sa atong utok midumog.

Unya ang pulong nahimong balak,
Human ang balak nahimong bulak.


-DR. MELVIN CORTEZ
Sunny Hills, Talamban, Dakbayan sa Sugbo

yutang tabunon

Marquis dK (feat. P.D.Ma & Indian Lennon) - Yutang Tabonon by M-D-K

indian lennon:

gihalokan ko ang imong mga mata, o yutang tabunon
ug gihapuhap ko ang aping ug hubon sa sayong kabuntagon
gisudlay ko ang dunghay sa kahangtoran mong buhok
ug padayong gisubay ang tiunay sa tinipigan mong bulok
padayon kong gihulma ang matag kurba sa imong lawas
gisabwag ko ang alimyon sa mga prosa mong rosas
ug giromansa ikaw sa kagabhiong ako nag-inusara
ug gipangga ko ikaw daw sama sa usa ka asawa
ikaw nga may kahayag nga milamdag sa ugma-damlag
ikaw nga naghatag og tukmang kaisog ug kaikag
nagbukal nga tubod kay ang sala sa unod, ikaw mobanwas
mohunad sa samad, napakyas nga saad ikaw mohugas
padayon gihapong akong nagpangita sa imong mga kasikas
giduaw ko ang kada sanga, kada suok ug eskina
kay ang siyudad buta, ug ang kamatuorang idlas.

marquis dk:

ang kamatuoran nga gikumkom diha sa kamot
nag-ugom sa katuyoan ug panginlabot
kay kini angayang isibya ug isulti
kay kini kagawasan sa liboan ka kalapati
gipatugpa, gibuhian ngadto sa langit
panyo nga puti diha taliwala sa kangitngit
bisan pag kini nagbaton ug gibug-aton
sa liboan ka kahingawa ug panamilit
gibuka ko ang akong baba sa pamasin
nga mapadayag ang bahandi sa kabilin
kay ang bugtong bulawan diha sa kaban
mga garay, batadila ug diwa sa batang dila
nga misuway ug tila sa panit nga pinulongan
pamatia mga gagmayng tingog nga gipalanog
kay ang kagawasan usa ka tabanog
kay ang kagawasan usa ka tabanog
kay ang kagawasan diay usa ka tabanog

p.d.ma:

siniloy*
sa kahoy:
huyuhoy.
ang awit
misampit
midapit
mitiyabaw
paminaw, paminaw
sa dunggan
sa dughan
sa duyan
ang yuta
tabunon, tabunon
tabunan
ang langyaw
nga langaw
ang dag-om
sa dagom
naghandom
kahilom
kahilom
kahilom
kahilom
kahilom
kahilom

marquis dk:

usa kini ka sugilanon sa paghigugma
sa dalaga nga dugay ko nang giamuma
miduaw sa dagang kining mga letra
sa pinulongan nga matawag kong akoa.
laylay sa mga balak ako siyang giharana

p.d.ma:

dungga ang huni sa mga salampati
dili na mapugngan bul-og sa akong pagbati
siya ang una ug ang kataposan
tipik ug kabahin sa akong salabotan

marquis dk:

ug nangatagak ang buwak sa akong galamhan
ang alom sa yutang pinulongan akong nakit-an
gikumkom ko ang gahom mo o sidlakang saloma
o ikaw ako gihigugma,

matahom nga dalaga.


--MARQUIS DE KINTOLIMBO

Dakbayan sa Sugbo

*siniloy (after diosdado alesna): verse lines consist of three syllable words accented on the second syllable, effecting a characteristic euphony that mesmerizes with its plaintive strain.

Pamahaw

Namahaw ang managtiayong Kutsara ug Tinidor sa ilang paboritong pagkaon nga mao ang wala sa dihang nabuhian ni Tinidor ang iyang babaye . . .

Askang! maoy sulti ni Tinidor.

Hala, hala! miingon iyang asawa, Murag naa gyod kitay bwesita karon, pangga.

Kutsara pa gyod, nagkanayon iyang bana samtang gipunit ang babaye nga nahulog sa salog . . .

--CD BORDEN

Mabolo, Dakbayan sa Sugbo