tingog nga gaunos sa sulod

Di na ko makadungog sa mga tingog
sa akong mga higala dinhi sa Burgos.

Di na ko makadungog ni Dodong
nga kanunay gaaghat kanakog laag.
Wala nang hagawhaw nilang Toto ug Imok
nga makatakod kanakog agak-ak.
Wa nang mga higayon nga magtigi mig
patag-asay og ihi (Kon itandi sa sulog
sa suba, dagayday ra among agas).

Di na ko makadungog sa mga tingog
nilang Yani ug Ai-ai nga nagtamudmod
nga di sila makakuyog dungan namo.
Sagad gabagutbot mi kay mora mig

gitanggong sa balay kon moulan.
Ug bisan tuod nga mora mig irog iring
sa paglalis, mosubang pod ang adlaw
nga kami makasinabtanay taman sa pagtuliyok
sa among utok, mora’g nalabyan og bagyo.

Apan sukad milabay si Sendong, wala nay
laing madunggan gawas sa mga danguyngoy
sa ilang ginikanan, ang mga uwang
sa mga sakyanan, ug nangabilin nga tingog
sa akong mga higala nga galanog duyog

sa sulog. Hangtod karon, padayon ang haguros
sa akong kasubo. Wa’y kataposan ang unos.

--OTENCIO B. MAUTGANAN JR.

Cagayan de Oro

Sa Ngalan sa Bagyo

(tubag–sumpay sa Sa Wala Pa Hinganli Ang Bagyo ni Erik Tuban)

Nalawos na ang takdol sa bulan. Ug kon tutokag maayo mapasilangan na ang agtang sa adlaw. Apan ang mga tiguwang sa among baryo nadayon gyog kuku ug wa na katuyhad gikan sa tibuok gabiing hinupo. Ang mga bata nga naglupa-langit atong gabii, nagtago–tago pagkabuntag ug wa na hingkit­i sa ilang hago. Samtang ang mga batan-on nga tigkalos ug tubig o tigbughag kahoy ug hilig manlumpayat da taghoy sa sanga sa akasya, karon, maoy gikatkatan sa mga sanga niini. Katong lantay nga nahimong lubnganan sa matag kuto nilang inday nahimong saksi sa pagtanday sa lapok ug sa ilang mga hanoyng paa. Dihay laya ug basa nga mga dahon o balili murag gipugas ug balik sa yuta. Busa kon imong sutaon, kini salog atong salag nagtungtong sa punoan kung asa gitugway katong kanding nga miipsot. Ug karon kinsa pay sutaon ni kapitan nga nagpuyo naman ang mga palahubog. Angay ba diay gihapon niyang supilon ang maoy sa ilang dangulngol?


--JESSREL GILBUENA
Sta. Fe, Isla sa Bantayan

*junrey balawing: amamaliw

23.5 pulgada ang sinukod gitas-on
diseotso na inano lang gihapon
nahitaligam-an pagkahimo
nabalingag paglalang
ang kayha nagdukang
tawo-Ginoo

*pilipinong bisaya, taga sindangan,
giisip maoy kinamub-ang tawo
sa tibuok kalibotan sigun sa
guinness book of world records.

-melquiadito maambong allego, md
palm harbor, florida, usa

Pakighinabi sa Aso

Pananglit bungol ang hangin sa imong kangitngit
ug ang kalit nga pagluom sa dag-om nga higayon
matuboag pako, ania ako
para mosugat kanimo.
Takos ug andam nga mamahimong
sirbato sa imong pagkakugang.
Ang ginhawang nagtuyok nga moalam-alam
Sa sinaw ug sandayong.

Ako kini, ang anghel ug ang demonyo.
Ang puting pak-an nga gilanlan
ug ang lagong sa kagabhion
nga nagpangitag lungag kasuksokan
konasa ang mga ngabil mopabadlis
sa dalus-os sa matang
gikabahong.

Sunda ako, amigo.


--BOBONG SANDAYONG
Lungag, Ermita, Cebu City

Luod

unsay kalainan
sa tawo ug sinina?

ang sinina
kon molubad
puti ang mokampat
apan kining kolora
dili kaniya

unya

ang tawo
kon molubad
grasa ang mosaliyab
kay kining kolora
iti sa kinaiya!

--RONIEL CABALE
Dakbayan sa Danao, Sugbo