balakisaw: balaanong senyor sto nino

Panalangini kaming tanang pinili tunayng sumusunod
kansang mga kasingkasing nag-uylap og nag-alintabong
dagaang sa nag-alimpuyong pagbati alang Kanimo.
Mga lunodpatay deboto nga nagluhod ug nagdupa
samtang nangaliyupo ug nangaliya sa Imong kaluoy ug gugma.
Upod naghambin og hilomong pagdilaab sa pagtoo sa among
paghalad sa sagrado mong Tiilan.
Dinhi ning alampoanan milagrohi kami sa imong grasya.
Taliwala sa mga pahina ning pangilaba gidala ang limbatianong
kahumot ug katam-is sa parnaso sa kahitas-an.
Bendisyoni ang among mga kalag aron
mahalangit sa gingharian sa Labawng Makagagahom uban Kanimo.


-MELJUN BATHALAD DESQUITADO ALLEGO
Quezon City, Pilipinas

gipatay natong gabii

"magkagubot unya.
ayawg saba."
--Patya, Chai Fonacier

sukad atong gipahilom
kadtong gabhiona
gahunghong gihapon
ang imong tingog,

naningil og parehas.
ug igo lang bation ko ang paggimok
kon mahinumdom ko sa kahumok
nunot sa kahamis

sa imong tiil, tiyan, dughan.
halos nasiprahan na
sa akong kasingkasing
ang pagbagting

sa imong lawas,
samtang atong tingog
nagkayabag kay nahubog
sa mga takna sa paglingkawas.

sukad atong gipahilom
kadtong gabhiona,
nigimok ang kahilom
sa nabanhawng' tinguha

gikan sa lubnganan
sa panumdoman.

-OTENCIO B. MAUTGANAN JR.
Cagayan de Oro

wala

Wala nakoy mahimo
kon moabot man
gani kas kalibotan.
Apan dili tika pasagdan.
Kay ako man
ang imong sinugdanan.
Salig nako kay dili tika biyaan.

-SAMANTHA LAGAR

Lahug, Dakbayan sa Sugbo

balakisaw: pagkabun-og pagkagabok pagtinga sa nasod

Gikulata gitamparos ni urakan SANDY ang habagatan-silangan.
Ang Nuweba York ug New Jersey nagkuray sa kakamig
ug kangitngit. Walay elektrisidad. Kulang ang gasolina.

Tapos na ang eleksiyon. Ang mga itom ug latino solid miboto
ni Obama. Ang Texas ug pipilang 30 estados gustong mobulag
sa federal gobyerno. Legal na ang marihuana sa Colorado
ug Washington. Si Heneral David Petraeus niluwat
sa katungdanan kay nasakpan nga adunay kerida.
Ang kontrabandong snow inanay mihaklap miyuhot
daw tiil sa iring banbanon sa Idaho Utah Wyoming Montana ug Dakota.
Gitakigan nanggahi ug dili makalihok ang nabun-og naglibog
nangluno ug hapit-na-mabangkaruta nga Amerika.

Girakrakan ang SANDY Hook Elementary School
Gitamaktamakan sa 4 ka mangangabayo sa katalagman
Garigormortis patighulog sa fiscal cliff.


-MELQUIADITO MAAMBONG ALLEGO, MD
Palm Harbor, Florida, USA

gangnam style

gikutlo sa akong mga tudlo

ang pipila ka adlaw na lang mopilo

sa laing tuig kita moliko

aron sa laing pag-ugmad mohiko.

apil na ang lawas mopiko

kay sa pangedaron mokuyog ug gakuko

hinaot nga dili pa sab moluko

aron magamit kung adunay motapuko.

niining tuig sa laing pag-ila-id

andam pa gihapon bisan kuwang na sa baid

pero dawaton kung usahay motakilid

basta makasayaw sa gangnam style makaikid

sa gihapon hugot ang pag-ampo aron makapaniid

sa umaabot makalingkawas sa kapait

ug kanunay lig-on ug makadul-it

sa kalisud malupig ang giipit

makasiyagit ug kalami sa hagit

aron sa gitik mogawas ang kainit

ug molampos sa katagbawang gikuhit

mohagtik sa kasingkasing sa kalipay mipitik...

-JED OCHO

Opon, Dakbayan sa Lapulapu