2.28.2012

TILAW


Alang sa mga hugawan
Lami tilawan
Ang pakwan
Sa babayeng pak-an.

-DR. MELVIN CORTES
Sunny Hills, Talamban, Dakbayan sa Sugbo

2.26.2012

Lolo


Sama sa utan sa bodega
nalabyan ka sa gugma
nilang mamag papa
kay lagi guba ilang relo
ning mga orasa
apan Lo, kita may permi mag-istorya
sama jud ka sa akong antipara
daling mabuak
puyay ug kuwag matagak
apan ikay nahibaw
kun insakto bang sinaw
o sayop akong gitanaw.

Ikaw ang akong kaistorya
sa pamahaw, sa dihay
manan-aw tas bangaw
bisan dika kaayo ka klaro
mangatawa tang duha
morag nakakaon ug basiyong plato
ug wa ta katilaw sa atong gisula.

Karon kung mobiya ka Lo
di ko igkalimot ang gugma mo
kay sa atubangan sa akong antipara
ug dia ka
ikaw ang mipatiaw
nga wa milakaw.


--RALPH OCANA
Dakbayan sa Sugbo

2.24.2012

SA AKONG PAGDUAW BISAN PAG RESESYON


Peste karong panahona
kanang magpatubil ka na
mabuak si San Miguel
hayan ka magtiniil

Imbes asti spumante
mantinil mocha grande

Sa pagduaw ko sa Sugbo
nilang Cheeno Erik Piero
Kevin ug uban pang nomad
batanlak mialimbukad


-MELQUIADITO MAAMBONG ALLEGO, MD
Palm Harbor, Florida, USA

2.22.2012

PAGTUNOL SA SULO: DAAN NGADTO SA BAG-O


(1) DAAN
ALBICALARIVI POETRY GROUP
(Marso 21, 1964--- SWU Printing Press)

AL: ALlego; Mel; ALmagro, Urias
BI: BIrao, Romeo
CA: CAbungcal, Zosimo (P.S.K.)
LA: LAriosa, Ernesto
RI: Rigodon, Edfer
VI: VIllavito, Antonio

Sugod pito ka mga batan-ong kuyabog sa dagang
Nagsandugo sa ilang vers libre o rima perfecta
Tigpasiugda sa mga eksperilak pinulhoang
Pakimoderno sa natad sa Katitikang Bisaya

(2) BAG-O
BEBODOFILAMIMUVE Poetry Ensemble
(Pebrero 9, 2010--- Turtle's Nest)

BE: BEring, Jona
BO: BOnsocan, Romeo Nicolas
DO: DOrotan, Richel
FI: FIgues, Raul
LA: LAgunda, Kevin
MI: MIjares, Neile Genica
MU: MUnez, Glenn
VE: VElasquez, Cindy

Walong parnasong rebelde
Lantip dagang henerasyon
Masaarong literati
Sumusunod inspirasyon

-MELQUIADITO MAAMBONG ALLEGO, MD
Palm Harbor, Florida, USA

2.20.2012

makililimos


Kabos ug walay ikapanghambog,
Hari lang sa iyang pagkatulog.


-DR. MELVIN CORTEZ
Sunny Hills, Talamban, Dakbayan sa Sugbo

2.18.2012

ANG IKAUNOM GABII: BILAR


(Hubad sa "The Sixth Night: Waking" ni Muriel Rukeyser)

Kadtong unang lunhawng gabii sa ilang pagdamgo, nahinanok
ubos sa Kahoy.

Ang Bathala miingon, "Palihoka ang mga kahulogan",
ug mitunghang Balak.


-MELQUIADITO MAAMBONG ALLEGO, MD
Palm Harbor, Florida, USA

2.16.2012

ang bunga sa imong pag-ampo


(sa planta sa dakbayan sa naga)

ang aso nga miuban sa imong pag-ampo
nga maharuhay ang kinabuhi sa tawo
giyamyam sa imong awmon nga baba
milapos sa imong itom nga kasingkasing
hangtod diha sulod sa imong busloton nga baga
nanamilit sa imong ilong
ug migamag itom nga panganod
paspas nga mipandong
sa hapit-na-maupawng lasang
sa pusod sa bag-ong dakbayan.
nagsayaw-sayaw daw gikuyawan
nga may umaabot nga katalagman
ang gagmayng mga mananap
silang way laban nagkaguliyang
sa ilang nabulit-sa-abog nga pinuy-anan.
inubanan sa kusog, sunod-sunod niining panghupaw
kalit mingtulo ang inasidohang mga luha sa langit
ug gipanglamba ang dagkong mga punoan sa kahoy
nangabali lakip mga dagkong sanga
gipang-anod sa dakong bul-og sa baha,
ug nangakawot ang dagkong mga bato
gitakoban ang gagmayng mga pinuy-anan
nga duol sa pangpang ug bukirang balangay,
ug gipang-igo ang abogong atop sa balay
nagsawod sa itom nga tubig ang tagbalay
nabulingit ang batang nagngising naligo sa uwan,
ug ang mga troso sa ilegal nga mamumuo
gibanlas uban sa kusog nga bul-og sa baha
ug mihilam-os sa nagkamuritsing-sa-basura nga aping sa dagat.

--PIERO ALDAYA
Carcar, Sugbo

2.14.2012

balakisaw: NGADTO SA TANANG ASAWA UG UYAB GIKAN SA TANANG BANA UG UYAB: DEKLARASYON SA WAYKAMATAYONG GUGMA


(sukad sa Pebrero 14, 2012 hangtod sa kahangtoran)

KON WA MO UGALING

MAG-UNSA NA KAMI?

HAPPY VALENTINE' S DAY

KITAKITS PA DARLING


-MEL M. ALLEGO, MD
Palm Harbor, Florida, USA

balakisaw: kabit


Dili nako mahimong makuha ang imong gugma
kay aduna kanay laing gihigugma.

Apan karong gabhiona
nagdulog kita sa sama nga kama
isip usa.

O inday, dili lagi nako maangkon ang imong kalag,
Ang imong lawas lang ang akong nahisalag!

--MELVIN Y. CORTES
Dakbayan sa Sugbo

2.12.2012

ihap paingon sa sam-ang


uno. lubi gitumba.
dos. edipisyo gipaluhod.
tres. kalsada gitunga.
kwatro. sakyanan gipadaplin.
singko. taytayan giputol.
sais. luha gipaagas.
sais punto nuybe. negros gilubong.

--PIERO ALDAYA
Carcar, Sugbo

2.10.2012

BALAKISAW: PEBRERO 6, 2012 SA GUIHULNGAN UG LA LIBERTAD


adunay nagyugyog sa lubing layog sa kinailadmang
kahiladman sa singsing sa kalayo
nabuwasot ang nag-ambangol nga kahimatngon unya
nagdahili ang mga nagkayagawng
bagulbagol padulong sa mga nalubong sa sam-ang
adunay naunlod natak-om nga mga agulo
ang mga taytayan nangapiang nalukapa ngadto sa tubig
mintras ang baso gakurog sa lamisa
6.9 richter scale


-MELQUIADITO MAAMBONG ALLEGO, MD
Palm Harbor, Florida, USA

2.08.2012

bipolar


Sa bartolina perbersyong gatuwad dimapugngan
Sexting nangayabag nga kulbahinam kalingawan
Tinago-tago namidpid sa psyche irongbuang
Kinawat-kawat nom de plume ni Sigmund Freud ug Carl Jung

-MELQUIADITO MAAMBONG ALLEGO, MD
Palm Harbor, Florida, USA

2.06.2012

hubogabii


paghukas kay yarokon
ang nektar sa katahom
kaputli ug kahambon

darling gasapinday na
ang nagtandayng saluma
pasudla na king gugma


-melquiadito maambong allego, md
palm harbor, florida, usa

2.04.2012

Dada, Ma?


Dada, Ma?
A’ Dada, Ma?
Ngano byaan Dada, Ma?
-Abot lang atong imong amahan uy.
Yaw byai Dada, Ma!
-Ayda mabuhi ra ta bisan wa imong Papa.
Saba na ‘nak, sagdii tong imong amahang way klaro.
Yaw byai Dada, Ma ba.
Luoy ka Dada, Ma.
Ge na Ma.

Ug dayon mipanaw
ang sakyanan,
sa usa ka tibi sa bata.

--RALPH OCANA
Dakbayan sa Sugbo

2.02.2012

IUD/KONDON


Gilukong ginit gasalod sa bakukang tungog
taluto ug ubang lamoglamog sulod
sa kawit sa buntagong manananggot

Bahal ang/bahalang nadakinas dugos
sa danglog butay ni indayhilay paubos
sa nanglulhong medyas sa Hotel Bellagio

-MELQUIADITO MAAMBONG ALLEGO, MD
Palm Harbor, Florida, USA