botelya

Gilabay ra tawon ko

Naglutaw-lutaw ibabaw sa

kadagatan,

Bisan asa mapunta

Wa kahibalo asa padulong

Lain-laing kamot ang mipunit:

Mapul-an ilabay ra pod,

Moinit ug mobagyo nagpakaisog

Naggunit sa kasakit ug kapait

sa mga naagian

Nag-inusara uban sa mga

basura:

Ang kanta sa balod nanawag nako

lAMI KAyo isyagit og kuhaa ko!

Pero di ko kahimo kay tungod

Usa ra ko...

--CATHLEA ANDO

Dakbayan sa Sugbo

gikan diri padu'ng there

uy, naka-notice ka ba sa mga na-happen
sa atong world karon? daghan nang changes,
di ba? seguro naay uban nato
nga wa makabantay nga layo na diay
ang atong na-reach sa panaw
ining gilaktan natong life...

kini bitawng balak sa mga bisaya
whom they call their kaugalingon as magbabalak,
nagbag-o namag costume ba.

sauna, pormal kaayo-- naka-long sleeves
ang mga word nga gigamit, gisuksok jud ilawom
sa karsones-itom ni juan-- nga daw
moadtog debut sa gipanguyaban
nga wa pa mosugot niya bisan
iya nang giharana niadtong usang semana.

karon, emo na kaayog dating
nga seems like padung sa usa ka party
sa iyang x-gf nga black and white ang theme
with full of drinks pa
nga makahubog sa buak nga heart.

unsaon, padayon man god og ka-develop
ang atong kinabuhi ug miuban
ang atong lumad nga pinulongan
sa journey padu'ng sa bangaw
inig human sa rain.

--PIERO ALDAYA

Lungsod sa Carcar, Sugbo

pati

lupad pati! lupad!
pagwara tamas ginhawa...

abta ang panganod,
hagki ang adlaw
karon lang ka kagawas
sa lungga mong gilubloban...

gibuhian ka sa tagtungod
papangitaon kag pagkaon...

ayaw sayangi ang panahon
kay dili lalim presohon...

--CATHLEA ANDO

Dakbayan sa Sugbo

kaagi sa usa ka iring sungkaban nga gilakdan sa bulan

naay minyak nga nag-agulo
ilawom sa kaldero nagpatulo
sa luha;

gikawras sa iring ang itom
nga kaldero talumtumon
sa agiw;

dihang dayag ang hayag
sa bulan pinakurat
nagpaila sa kakiat
nagpasalipod sa gapnod
ang kinhason nga tanod.

unya mihapa ang iring
nagkamuritsing sa iyang iniring
kay basin unya sakpan
sa kahayag sa bulan

ting ting ting puling
lagpot bilat iring ....
bagutbot sa bulan samtang
naglakad sa iring.

--VALDAPH

sa hilom

tingali panahon na
nga maglantugi
ta sa hilom.

busa di ta magsaba.

pagabantayan tang
kining lantay di
mobanha.

-- ADONIS DURADO

Muscat, Oman

Usa ka Tasang Gugma

Unsaon pagtempla sa usa ka tasang gugma
sama sa 3-in-1 nga coffee?
Una, pag-andam og usa ka tasa
sama kadako sa tagayan
og bahal sa imong lolo
Dayon buboi sa init nga gakos,
Sambongi og usa ka kutsara nga hawok
Ug timplahe sa tam-is nga pahiyom
Kutsaraa gihapon
Kusawa, kahuga sa stirrer
Ayaw sa dayon imna, paabota ang pila
ka gutlo, aron di ka mapaso
Hinay-hinaya og tungab ayaw kas-aha,
aron inanay ra sab nga mahubog
Ang dughan mong naghagtob-hagtob.

--GEE FAMILGAN

Argao, Sugbo

Valentine's Day

(hinubad gikan sa usa ka Serbian Folklore)

Aduna kaniadtoy manag-uyab nga nagbinayloay og halok sa kasagbotan.
Nagtuo sila nga walay makakita kanila didto.
Apan nakit-an sila sa kasagbotan
Kansa misulti sa langgam
Kansa misulti sa tubig sa sapa
Kansa misulti sa bangka
Kansa misulti sa mamangka
Kansa misulti sa dumuduong
Kansa misumbong sa inahan sa babaye.

Sa kalagot sa babaye nga nahibaw-an iyang sekreto
Mitunglo siya og sumpa:

Kasagbotan, hinaot dili ka na molunhaw!
Langgam, hinaot mapusilan ka!
Mamamangka, hinaot mapiang imong mga tiil!
Dumuduong, hinaot mapareglahan ka!
Bangka, kaligo sa kalayo! Tubig sa sapa, hubas!

--CD BORDEN

Mactan, Dakbayan sa Lapulapu

ekspayr

di ko na gustong
madunggan pa imong tingog
nga molanog sa samin kilid
sa laparon kong panagway,
kay nasayod ko,
bisan pa man ingon nila
ako buta-bungol kuno,
wa nay sonatang
moduyog pa nimo nga
makapugong pa nako
sa pagpangbukwas
sa mga hinayhay
karon gihumod nas
kagabhion-- diin
kansang mga tiil
nag-abot-- makapahinumdom
kanako sa
usa ka kalibotang
binuang...


--CINDERELLA
Mactan, Dakbayan sa Lapulapu

sa dihang nausab ang huros sa hangin

(alang sa kanhing higala)

samtang padayong nagtuyok
ang orasan sa tumoy ning dalan
padayon sab nga nangahulog
ang mga baso nga gibitay

ug nagpasad ang mga buak nga bildo
sa gilaktan mong dalan.

ang mga tiil nga walay tsinelas
angay nga magbantay
sa nangakupog nga bildo
nga naghuwat lamang og biktima

ug andam mosamad
sa mga lapalapa nga magtanga.

--PIERO ALDAYA

Lungsod sa Carcar, Sugbo

Kuan, Kanang, Kuan

"Ang kalibotan padulong nang mayabag," miingon ang tawo diri nako. Hubog siya. "Lagi," miingon ko dayon gawas sa imnanan. Ang kagabhion nagkurog sa kabugnaw. Hawan ang kalangitan. Malisyosong naghayag ang mga suga sa kadalanan. Ambot asa, wa nay iro nga namaghot. "Tulis ni! Way lihok," miingon ang pari samtang gitutokan ko niyas iyang mga tudlo nga gipormag pusil. Akong gisikaran iyang lagay ug natumba siya. Mipara kog jeepney ug milingkod sa tunga sa duha ka nag-away nga manag-uyab. "Wala ka mahibalo kon unsa ang gugma," giingnan sa batan-on ang akong wala nga dunggan. "Kahibalo ko," miingon ang dalaga sa akong tuo nga dunggan, "ug dili na ikaw." Nanaog ko sa sakyanan sa pinakaduol nga PUJ stop nga wala mibayad, naghupay, apan naglibog kon asa ko padulong. "Dad-a ko bisan asa," gisultian ko ang akong mga sapatos. Gidala ko nila sa Plaza Independencia. Didto nakahimamat kog matahom nga babaye kinsa mitanyag nga basahon akong palad ug iya pa jud kong chupaon. "Salamat, dili lang ko," maoy akong sulti niya. Human mipadayon ko sa paglakaw hangtod nakakita kog ungo nga migawas sa imburnal. Mitikig ko. Dili ko kalihok. Dili ko makatuo sa akong nakita. "Unsay ayo, bai?" miingon ang ungo nga nagkamang padulong nako. "Wala," gikuyawan ko nga mitubag. "OK," matod niya dayon mikamang palayo. Nanguros ko dayon naatol sab nga nakilatan ug natunga ang kahoy nga duol nako. "Yawa," miingon ko. "Kining kalibotana padulong na jud mayabag."

--CD BORDEN

Mabolo, Dakbayan sa Sugbo

PARIL

daplin sa nahubsang
kalibotan sa hunasan,
gitukod atong lagkaw
puno sa sugilanon,
ako--magpabiling ako,
ikaw--mosurutoy pagpanakop
sa mga nakaiskapo
mong pangandoy sulod
sa akong damgo.
taob na unya aykog
kalimti kay
sa imong kalamposan,
di baya ko kamao
molangoy.

--A.K.A.T.A.F
Mactan, Dakbayan sa Lapulapu

Himaya sa Pag-inusara

Kangitngit ang naghabol kanako,
ibabaw sa langkayng laya
kahilom ang nagpamata sa gaduka kong kahimatngon
ug ang matag huros sa makapakukong hangin maoy
nagpahamtong sa akong pagtukaw
ang mga bituon sigeg lili likod anang tipak sa mga panganod
samtang ako hapit nang gisingot sa pagpaninguha
mahangop ang kahimayaan nga gasa sa pag-inusara.
Ug sa higayon nga akong tuhod mobinhod,
akong mata mosulirap mosaksi sa
kahayag nga gidalit sa pagsubang sa bulan gikan
sa dag-om kong kahilayan

--IKOY ESCARAN

Dakbayan sa Sugbo

Kon Pananglit Imo Akong Yam-iran

Pananglitan di nako nimo tagdon
Pilion kong mahigugma sa yuta
Igasa ko nalang kaniya ang gugma
Ug mahimong tanom nga motubo sa kasakit
Nga bisbisan sa luha sa langit
Iyawat, mamunga kinig kalipay

Kay ako makat-on ra nga mohangad
Aron akong makawat ang kahayag
Ug sa mangitngit kong dughan, magadam-ag
Moginhawa sa kasingkasing nga mopukaw
Sa pagyam-id sa imong mga mata kanako
Ug ang akong kalag di na unya magabakho.

--THERESE MAE FAMILGAN

Dakbayan sa Sugbo

mapahimuslanon

human tilapi sa
panganod,
ang kanhing
inosenteng dagway sa yuta,
nagbilin kinig lama
nga bisan ang kanhing langit
nga mingyukbo niini
milikay-likay kaniya.

--GEE FAMILGAN
Argao, Sugbo