Iya sa Panahon

TAPS*

Adlaw ing tapos
Nahanaw ang adlaw
Gikan sa mga linaw
Gikan sa mga bakilid
Gikan sa langit
Tanan maayohay
Luwasnong pahulay
Haduol ang Diyos

*Hubad sa TAPS ni Anonymous
(Confederate soldier-son of Union
Army Captain Robert Elli, Civil War
1862, Harrison's Landing, Virginia)


-MELQUIADITO MAAMBONG ALLEGO, MD
ALBICALARIVI Poetry Group
BATHALAD 7
BEBODOFILAMIMUVE Poetry Ensemble
NOMADS Batanlak
Palm Harbor, Florida, USA

Duyana Ko Sa Imong Pagdagayday

IMPRESYON HUMAN SA SANGKA: TIKAS O TAKTIKA?

Taliwala sa katulin ug kaaliwaros sa sinukliay sa mga kumo ug agunto
gitumban makadaghan ni Juan Manuel Marquez ang tiil ni Manny Pacquiao
nga daw wala makamatikod ni manumbaling niining sekretong labok
(stratehiya ni trainer Nacho?)

Klaro nga si Congressman Pacman ang kampiyon
Di na kinahanglan ang ikaupat nga kombate. Si Floyd Mayweather
ang sunod pakamangon sa nagbigoteng ring


-MELQUIADITO MAAMBONG ALLEGO, MD
Palm Harbor, Florida, USA

Sa Akong Pagluha

Lampaso

Pananglitan lang
                                        sa atong
pangandoy
                                        nga
nanghupaw
                                        nanghupaw nako
ug sigeng
                                        tambag nimo,
aron sa imong
                                        kaayohan.
Nga unta,
                                        nga unta lang
sinaw ang atong
                                        kahigdaan.


--RALPH OCANA
Dakbayan sa Sugbo

Sonata

tugoti ko
nga motokar
sa imong cello.

kalami
ihapuhap
sa imong instrumento.

tugoti ko
nga moromansa
sa mga kwerdas.

kalami
itukar
sa imong cello.

padunggon
ko ikaw
sa akong sonata.

ug dungan tang
manganta
og pinayabag.

--GRATIAN PAUL TIDOR

Musuan, Bukidnon

HORS D' OUEVRE

Introduksiyon o foreplay
dulotaop sa dila ug ngabil
Tigbukaskurtina sa Ester Hana konsiyerto
Painitilaw sa naghinamhinam bul-og
sa nagtilagak laway
Danggas prekursor sa gadeliryong hilanat
Ballerinang pasakalye aha pianissimo sonata
Lamasubak o salad sa kinaham menu
Gatilap pasiuna sa kinapungkayang palami
pagana inamorata amour propre


-MELQUIADITO MAAMBONG ALLEGO, MD
Palm Harbor, Florida, USA

BALAKISAW: SENOR SANTO NINO SONETO

Ikaw ang tuburang agianan
Sa kaayohan ning kinabuhi
Sa kalinaw maoy gigikanan
Sa mga milagrong nanagsuhi

Tabang palihog pagpas-an sa krus
Taliwala sa daghang pagsulay
Pagduhaduha, lubos pag-antus
Paminaw sa among mga laylay

Sa pagpuasang pag-inusara
Lig-ona king pailob ug gugma
Maaghopong palad mo bukhara
Tugtoga balaanong saloma

Batang Diyos, kami nagasangpit
Panalangini nga mahalangit!


--MELQUIADITO MAAMBONG ALLEGO, MD
Palm Harbor, Florida, USA

DELATAR NGA PAGMANEHO NGADTO SA LUNGSOD ARON PAGHULOG OG SULAT

(*Hubad sa "Driving To Town Late To Mail A Letter" ni ROBERT BLY)

Gabiing nag-snow ug tugnaw. Ang dako-dakong
Dalan way kisaw gitalikdan.
Ang gagimok nga snow mao ray bugtong naglihok.

Sa akong pagbukas sa ganghaan sa buson nabatyagan ko ang tigming puthaw.
Adunay pribasya nga gihigugma ko dinhi ning ga-snow nga kagabhion.
Nagmanehong palibot-libot, mag-usik-usik akog sobrang oras.


--MELQUIADITO MAAMBONG ALLEGO, MD
ALBICALARIVI Poetry Group
BATHALAD 7
BEBODOFILAMIMUVE Poetry Ensemble
BATANLAK Nomads
Palm Harbor, Florida, USA

SEBU

I
Maputli ang tanan karong gabhiona---
sa akong panghunahuna---
milabay ang mga tawo
nga nagbaktas padung sa simbahan
dinuyogan sa bagting sa kampana---
milabay ang mga sakyanan
nga dunay managlahing porma
ug sukod
nag miserbatos ilang irihis nga pito---
samtang ako milabay
sa managhinigugmaayng
nag-away pagawas
sa ilang relasyon
sa usa ka ngitngit nga eskinita
paingon sa balay
kon asa ang mga katigulangan
nagdulag baraha
hangtod sa kaadlawon---
samtang ako milabay
sa mga kahoy nga nagsalsa
sa huyuhoy sa kagabhion
milugpot, mikagot---
mga kiatang bata
miagik-ik, misutoy
sulod sa ngilit
sa eskina
mitago sa kaugalingon---
nagpahinumdom kanako
kon unsay angayang bation
sa usa ka bata . . . .

II
Duha ka ulitawo ang migawas sa barberohan
nga dunay managsamang buhok:
labong ug kulot---
basa sa pamada
daw nagsinaw---

III
samtang ang tigulang nga gisiog bistida
miablis basurahan
mihingos ug miubo---

IV

ang abohong iring milayat
migawas sa lata ug mipatim-aw
sa kalibotan
nanawag
gamit ang usa ka kahidungang lengguwahe---

V
samtang ang mga lalaki sa balay-bulakan
migunting sa tunok
gikan sa pula ug puting mga rosas
alang sa balaang panaghiusa
sa duha ka wala hiilhing tawo.

VI
Ang naglinya nga sulo
nga mao untay moiwag sa dalan
yamo---
patayng dagitabyanong kahoy---
ilang mga wayr
gipanglaslas intawon.

Ato na seguro ning
pamutlon uy!

VII
Gubaong mga balay

kahagsaon
naglinya
siradong mga bentana
beldo ug lipak, sirado!
tabon alang sa matang mahilabtanon---

Usa ka kabalayang
lawom sa pagpahulay.

VIII
Samtang ang baho apan
tam-is ug pamilyar nga alimyon
mihungaw
sa minaomao nga kanal---

IX
ug ang hugawng tubig
midagan paingon sa sapa . . . .

X
Bungbong nga tugob sa dibuho
lunhaw, pula---
imahe sa mga katingalahan . . . .

XI
Ang buwan anaa sa taas
lingin
puti susamas rosal
mitipon sa kaputli ug kahugaw---
way timbang---
gikan sa atong panlantaw---

XII
samtang ang mga bituon mikislap
aron makaamgo kita
nga dunay lahi, dunay dili matugkad
layo sa atong gabok nga pagsabot . . . .

XIII
Usa ka pundok sa langgam
miugtak sa kaputong
ngano dili makab-ot
ang lapad nga langit nga mihabol
sa kinatibuk-an.

XIV
Maglipay sa imong mga adlaw, higala!
sa dili pa sila manuktoks imong pultahan---
ug ila kang sininaan
pahigdaon
sa usa ka katre
angay sa usa ka hari
gidesinsyong dunay bentana
bisan tuods katinuorang
dili na ka makalantaw sa gawas.

XV
Paminaw:
kining maong awit alang kanimo, inagak.
Ako kining gitangtangan sa kakuti
aron akong maawait ang iyang kayano---
Aron ikaw maminaw!
Kay unsa may kapuslanan sa usa ka awit
kon puno kini sa kahanap?
Karon paminawa ko---
pagsadya ug pagsaulog!


-DR. MELVIN CORTEZ
Sunny Hills, Talamban, Dakbayan sa Sugbo

tingog nga gaunos sa sulod

Di na ko makadungog sa mga tingog
sa akong mga higala dinhi sa Burgos.

Di na ko makadungog ni Dodong
nga kanunay gaaghat kanakog laag.
Wala nang hagawhaw nilang Toto ug Imok
nga makatakod kanakog agak-ak.
Wa nang mga higayon nga magtigi mig
patag-asay og ihi (Kon itandi sa sulog
sa suba, dagayday ra among agas).

Di na ko makadungog sa mga tingog
nilang Yani ug Ai-ai nga nagtamudmod
nga di sila makakuyog dungan namo.
Sagad gabagutbot mi kay mora mig

gitanggong sa balay kon moulan.
Ug bisan tuod nga mora mig irog iring
sa paglalis, mosubang pod ang adlaw
nga kami makasinabtanay taman sa pagtuliyok
sa among utok, mora’g nalabyan og bagyo.

Apan sukad milabay si Sendong, wala nay
laing madunggan gawas sa mga danguyngoy
sa ilang ginikanan, ang mga uwang
sa mga sakyanan, ug nangabilin nga tingog
sa akong mga higala nga galanog duyog

sa sulog. Hangtod karon, padayon ang haguros
sa akong kasubo. Wa’y kataposan ang unos.

--OTENCIO B. MAUTGANAN JR.

Cagayan de Oro

Sa Ngalan sa Bagyo

(tubag–sumpay sa Sa Wala Pa Hinganli Ang Bagyo ni Erik Tuban)

Nalawos na ang takdol sa bulan. Ug kon tutokag maayo mapasilangan na ang agtang sa adlaw. Apan ang mga tiguwang sa among baryo nadayon gyog kuku ug wa na katuyhad gikan sa tibuok gabiing hinupo. Ang mga bata nga naglupa-langit atong gabii, nagtago–tago pagkabuntag ug wa na hingkit­i sa ilang hago. Samtang ang mga batan-on nga tigkalos ug tubig o tigbughag kahoy ug hilig manlumpayat da taghoy sa sanga sa akasya, karon, maoy gikatkatan sa mga sanga niini. Katong lantay nga nahimong lubnganan sa matag kuto nilang inday nahimong saksi sa pagtanday sa lapok ug sa ilang mga hanoyng paa. Dihay laya ug basa nga mga dahon o balili murag gipugas ug balik sa yuta. Busa kon imong sutaon, kini salog atong salag nagtungtong sa punoan kung asa gitugway katong kanding nga miipsot. Ug karon kinsa pay sutaon ni kapitan nga nagpuyo naman ang mga palahubog. Angay ba diay gihapon niyang supilon ang maoy sa ilang dangulngol?


--JESSREL GILBUENA
Sta. Fe, Isla sa Bantayan

*junrey balawing: amamaliw

23.5 pulgada ang sinukod gitas-on
diseotso na inano lang gihapon
nahitaligam-an pagkahimo
nabalingag paglalang
ang kayha nagdukang
tawo-Ginoo

*pilipinong bisaya, taga sindangan,
giisip maoy kinamub-ang tawo
sa tibuok kalibotan sigun sa
guinness book of world records.

-melquiadito maambong allego, md
palm harbor, florida, usa

Pakighinabi sa Aso

Pananglit bungol ang hangin sa imong kangitngit
ug ang kalit nga pagluom sa dag-om nga higayon
matuboag pako, ania ako
para mosugat kanimo.
Takos ug andam nga mamahimong
sirbato sa imong pagkakugang.
Ang ginhawang nagtuyok nga moalam-alam
Sa sinaw ug sandayong.

Ako kini, ang anghel ug ang demonyo.
Ang puting pak-an nga gilanlan
ug ang lagong sa kagabhion
nga nagpangitag lungag kasuksokan
konasa ang mga ngabil mopabadlis
sa dalus-os sa matang
gikabahong.

Sunda ako, amigo.


--BOBONG SANDAYONG
Lungag, Ermita, Cebu City

Luod

unsay kalainan
sa tawo ug sinina?

ang sinina
kon molubad
puti ang mokampat
apan kining kolora
dili kaniya

unya

ang tawo
kon molubad
grasa ang mosaliyab
kay kining kolora
iti sa kinaiya!

--RONIEL CABALE
Dakbayan sa Danao, Sugbo