Ila

Dili ko gihapon itutho sa kawanangan
ang alom sa akong dila
bisan kini migimaw na taliwala sa iyang alaran.

Ako gihapon kining laylayon 

ug amumahan
uban sa taghoy sa akong alimpulo
ug sitsit sa akong tampihakan.

-JANN DAINVER MARAVILLA

Clarin, Misamis Occidental

higayon

(kang Dib)

sa makadaghan na nga higayon sama ini
ikaw ug ako magbarog, magtupad.
ako maminaw kanimo ug sekretong manghipos
ug manago sa imong mga pulong

matingala ka, kay usahay mas abtik
motubag akong kahilom sa imong asoy.

sa sunod nga higayon sama ini
nga ikaw ug ako magbarog, magtupad
unta kahibawo nang mohilom ang akong kahilom

ug sa atong panag-estorya
unta moabot ang higayon nga mahimo na nako
ang pagpalanog ning pinitik sa kasingkasing

kay sa sunod dili gani gihapon,
na, basig moupos ang mga higayon
ug hadlok ko nga ikaw ug ako magpabilin lang
sa susamang talan-awon;

magbarog nga magtupad,

-JESSREL GILBUENA

Dakbayan sa Sugbo

tugon: OA

" Mahal, kon unsay simbako mahitabo
human sa operasyon intawon ayaw
baya pasagdi atong inday ug undo,
ha ba ha?" Sumbalik sakgaw
sa asawa: "Hilom diha ka-OA nimo!
Walay mamatay sa tuli, uy ugok tonto!"


-NICK LOPEZ, MD
Kissimmee, Florida, USA

mga uhong sa agosto

...nahibulong kaayo ako sa talagsaong
pagpanubol sa mga duwendeng payong
katap ning mga bungdo sa mga sulom hulmigas
ug aliling---

...daw ihas nga mga tisas nga gipang-ugbok
sa mga ap-apong pisara sa tulonghaan
ning nangihing Kamot nga nagdibuho sa mga buntag
sa Agosto---

...ah tanghaga o gumonhap da king paghugpa
sa nagkulukabildong silay sa mga takna
tadlas o lagbas sa libo ka mapangutan-ong tiktak
sa gutling---

...ngano ngano ba ugod nga dinhi ning mga moto
naghula-hula man king mga inanong ugis
inigpangalibwag sa mga diyoling yamog sa banagbanag
sa Agosto?---

...sahi sa pagpanurok sa mga lunhawng pinugas
nga gisabod sa nanagtuktugaok nga mga uma
sa kinaiyahan sama sa mga bungag-singot niining
Iyang aping---

...kayha king nagtinabuylog nga Dakong Pangukit
nga nanampiling karon sa tamboanan ning mga mata
dili gayod masabtan ni matugkad ning nanagpayong
nga mga Uhong sa Agosto---


-MELQUIADES MAAMBONG ALLEGO, JR., MD
Palm Harbor, Florida, USA

TULUKIBON

Unsa man ka tinuod ang kamatuoran?

Sama ba kini ka tinuod sa sanggot nga mikulit og tingsi sa buwan?

Sama ba kini ka tinuod sa saging nga milamoy sa unggoy?

Sa bukog nga mitangag sa iro?

Sa tiguwang nga nagbisikleta sa panganod kaha?

O sa babaye nga gitaban sa tabanog?

Sama ba kini ka tinuod sa bata nga mikuhag bituon sa langit, gibutang sa lamparilya, ug gitayhop sa takna sa tingkatulog?

-CD BORDEN

Dakbayan sa Sugbu

lamano

Dili mapapas sa akong diwa
kadtong segundoha human ko mabatian
ang kahaom sa mga kordeso
sa atong mga kamot

samtang sa usag-usa
ato kini silang
gikaw-it.

-Jann Dainver L. Maravilla
Clarin, Misamis Occidental

ODA NGADTO NI ROGER VILLEGAS LACTAO*

ania king balakawit
atong idug-ab ug imnon

alang sa mga bituon

aron mataptapan kadtong
kanhing gigisi mong langit

sa leyendang kabatan-on


*Barkada ug kahindog nilang Resil Mojares, Junne
Canizares, Manuel Satorre, Ricardo Baladjay,
Teofy del Mar ug Ricardo Patalinhug.


-MELQUIADITO MAAMBONG ALLEGO, JR., MD
Palm Harbor, Florida, USA

KNIGHT ANG RUSTY ARMOR

Sa dili pa kita,

ikaw mapasaligon, tiunay, andam

manalipod niya.

Naningkamot ko

ako maimo, ikaw maako
sanglit ikaw lang ang gipitik 

sa akong kasingkasing.

Dili na ikaw

kadtong nakita nimo ko sauna

Imong gipasagdan nga masugamak ning gugma
Naghitak na sa kagul-anan ang akong mga mata
Kay ikaw, kaniya nagpabilin nga Knight
Ug kanako Rusty Armor ra

Sa pag-aninag ko sa matag kabuntagon
Nasuta ko nga ikaw nagmaluibon
Sayang ang akong katahom
Kung kanimo lang mahiagom
Wala ko maglangan nangita kug lain ADAN

Ug sa dihang ako nagmalampusun na
Ikaw nagsamok-samok na sa nakaglagan kong gugma?
Dili naman ikaw ang nanag-iya ning gugma
Kay ikaw expired na sama sa lata ug gitay-an na
Busa balik na kaniya bahalag mairo ka.


-GENROSE BABAG

Dakbayan sa Lapulapu

YUHOTPAMATI: MAUTGANON ANG UTNGA SA TUNGANG GABII SA PIKAS SUITE SA VENETIAN HOTEL

nag-alindasay dili ako makatulog. ang agik-ik ug taklatakla sa katre sa kasikbit kuwarto
nakapaliso sa turnilyo sa imahinasyon. nakapalaguto
nakapatuyhakaw sa bukog ug unod sa nag-alimbukad kahinam.

hayang bukhad na. ipabati nato kanila ang lehiro ekspertong paagi.
pagkakumpas tang mga artista tugob sa ritmo ug ritma. pagkatiliis sa gasulbong duwetorgasmo.
unya ang tibuok hotel maminaw magtukaw o dungan sa klimaks tanan mahigmata!

-MELQUIADITO MAAMBONG ALLEGO, MD
Palm Harbor, Florida, USA

PANID #2

Akong gipunit ang bato ug kini giablihan. Ang sulod niini kutsilyo. Akong gikuha ang kutsilyo ug kini giablihan. Ang sulod niini buwak. Akong gikutlo ang buwak ug kini giablihan. Ang sulod niini akong kasingkasing. Akong gikuptan ang akong kasingkasing ug kini giablihan. Wala–

Wala kini sulod.

-CD BORDEN

Dakbayan sa Sugbo

ANALOHIYA: ANG MGA MALINGIN

KALIBOTANG GALIYOK
KANHING KASING GATUYOK
KASINGKASING NANUKTOK
UTOK NAGAHINUKTOK
ULOK KO NAGAMUGTOK


-MELQUIADITO MAAMBONG ALLEGO, MD
Palm Harbor, Florida, USA

kiling-kiling

Hapit na man diay Pasko, ingon pa sa tiguwang
Nga naminaw sa duha ka Jeepney rapper
Pwerte sab ang ngislit sa nag-rugby nga buang
Dihang gipakanaog sila sa Drayber.
Sa iyang balay, di pwede ang way sapi.

Dili biya tanang negosyo, makalugi.
Ug dili tanang puhonan, magamit sa negosyo.
Pananglitan, ang batan-on nga kanunay
Nagpanday og palasyo sa iyang mga damgo
Posibling matagakan og bitoon sa kalaay
Nga iyang ipabadlis sa aso sa kangitngit

Wa tay Snow! Wa tay Snow!, singgit
Sa usa ka banda. Na hala...usapa na!
Ah! Inyo man hinoon tang isu'd sa bulsa,
pu'ng pa ni Mike Rama nga nanghinawak
Nagpaso-paso sa habog niya nga lawak.

Sa siyudad sa malipayon, di pwede mohilak.
Brad, way kawat? Wa lagi part, diay balak.
Samtang nagpakapaka ang lantaka sa Sikatuna
Ang kamatuoran lumping nga kwarta gisyat sa lata.
Na hala, inyo na nang hamon ug keso de bola.

Fuck you, Santa!

- Marquis de Kintolimbo
Moryomoryo, Sebu