5.30.2012

tambilagaw vincit amour


ang pagdibuho sa gumonhap sa nagtikubo
nga pasunding sa tangerine nga kasadpan
maoy suliran sa dalag nga mga ahito
ang dagat dili makabaligya sa mga balod
kay namatog na ang gipugad nga lapyahan

karon pamatud-i kanako ang kaalingasa
sa mga bulak sa magbabalaklaurel nga hardin
nga gibuboan mo sa kanunay sa kanunay
ang mga amorsiko nanulpok sa mga sidsid
sa laagan nga mga panyolito sa nagkuwap
nga kahayag ning tumutunod nga kalibotan

ang mapanamilitong mga gutlo nagahukdong
sa beranda sa nanghupawng kahilom
mahimong pintalon mo na ang gitinang dagat
nga giipis gitagay ko ning kopita sa mga dagaw
inigpanambilagaw sa nanamilit naggakos tang duhiraw


-melquiadito maambong allego, md
palm harbor, florida, usa

5.28.2012

tahas


Mamimisi,
Buhati kog pisi ginama sa balas
Aron makakuhag balod gikan sa dagat.

Mananahi,
Tahii kog kapa nga sakto alang sa usa ka hari
Gamit lang kining duha ka tanod nga dagom.

Panday,
Tukori kog dakong palasyo
Nga sa akong paggawas niini tigulang na ko.

Kusinera,
Paghiwa og usa ka bakat nga bombay
Samtang maghilak og luha nga bulawan.

Kon dili ninyo mabuhat ang tahas,
Ibutang ang inyong ulo sa tadtaran
Alang sa akong matadero.

-CD BORDEN
Dakbayan sa Sugbo

5.25.2012

balakisaw: pasumbingay sa ayaayng mayo: linaw hapsay


Ang dagat giplantsa ni Cel Balorio
kunohay sa waykibo nga donsilyang Mayo
Human mananghid sa nanahid nga hutuhot
ang mga balod dungang nagmartsa
padulong sa nangabay nga baybayon
Ang nanapo nga layag inanay nanampiling
atubang sa bugsay nga gasandig nanghuyatid sa baroto
Ang kurotsay sa nagsakdapsakdap nga hangin hagawhaw na
Nagtighaya ang namukol namugdo nga pundo
Hinolhinola haplasi kini timonil maninindaw Cel Balorio


-MELQUIADITO MAAMBONG ALLEGO, MD
Putat, Tuburan, Sugbo, Pilipinas

5.23.2012

antonio de padua


Ang yawa naghupot og ilimnong makahubog
Kilid sa labong nga dakit.
Ang anghel namaligya sa iyang dungog
Taliwala sa kangitngit.

“Sunod na lang,” akong gibalibaran ang iyang tanyag
Ug mibalik kog lakaw sa kahayag.

Ako ang pinili, ang kataposang santos nga dili.
Ako ang bugtong nahibalo
Apan akong nakalimtan kon unsa kadto . . .

Sa kilumkilom,
Ang tibuok dakbayan
Usa ka handomanan
Nga dili gayod nato mapanganlan.

Bisan sa kasikas
Akong madungog ang kahilom nga naghukas.

Sa kadalanan,
Daghang dagway ang akong nasugatan.
Tanan malipayon
Gawas sa usa nga nagbangotan.

Kinahanglan magdali, kinahanglan dili molingi.
Kay siya kansang nagsunod kanako,
Midagkot na sa iyang tabako,
Ug buot mokutlo sa akong kinabuhi.

--CD BORDEN
Dakbayan sa Sugbo

5.16.2012

balakisaw: trece de mayo


(alang sa akong inahan emiliana maambong allego)

ang tagoangkan nimo mama
giduyan ko karong adlawa
gisapnay sa lukong sa bulak
sa epitapo mo king balak

-melquiadito maambong allego, md
santa lucia, asturias, sugbo pilipinas

5.15.2012

tahasmisyon: takda ug tukma


ang kahayag adunay tukmang kahulogan ug lunlon katahom
sa alampoanan sa buta nga kangitngit
ang gatakdol nga bulan usa ka bisitang dinapit
uban ang dukirok nga mga bituon
kada butang adunay iyang kaugalingong teritoryo
kapuslanan ug kapaingnan
kon wala ang parola kinsang mananagat unsang bapor
magpatuyang paglatagaw sa kapunawpunawan sa kadagatan?
matag linalang adunay giangkon gitakdang panahon
dapit ug gimbuhaton kansang waykinutobang pailob
magmugnag dihadihang dadangatan


-MELQUIADITO MAAMBONG ALLEGO, MD
Palm Harbor, Florida, USA

5.13.2012

ang mancao paglabay sa panahon


klaro pa gyod kaayo ang tanan, do.
kadtong bakasyon nga nangliki ang pilapilan.
ang mancao naproblema god adto kay hapit maughi ang tubod.
ug kita nagpunayg pasingot ilawom sa naglagiting nga adlaw.
dakpanay. tubig-tubig. siyatong. patintero. boylan.
magpuli-puli gyod tog siyagit papauli nato atong mga ginikanan.

apan hanap na nga mausab to bisan nagkatapok pa kita karon, do.
dili na nato mabalik ang baynte ka tuig nga milabay.
nanagsungkod, nanag-antiyohos na atong pagawg tingog nga mga ginikanan.
wala na ang tubod. wala na ang pilapilan.
habog na kaayo ang mipuling edipisyo nga de-aircon.
ug dili na ta sington kon magsuroy-suroy diha sa sulod.


-PIERO ALDAYA
Dakbayan sa Carcar, Sugbo

5.11.2012

sa akong pag-abli sa pultahan


nabuklas ang kangiob.
ang inyong mga mata morag hayag-lingin
nga bulan, nag-dan-ag sa akong pagtim-aw.

gidali-dali ninyog hipos
ang suliyaw sa mga agulo
giinat ang kunot sa habol
gipaundo ang lupyak sa unlan
ug gibistihan ang hukas nga higayon.

sa kahilom
sa akong pagpirok
ang lawak nahimong lubnganan sa
tubig nga gibadbad sa akong tutok.


-JESSREL GILBUENA
Sta. Fe, Isla sa Bantayan

5.09.2012

Talaadlawan


Ambot pipila na kaha ka mga karnerong titik
Ang akong gipataak sa lininyahan mong laguna
Dili na maihap kay maihap ba ugod
Ang nagkintong mga luha ug nagharab-harab
nga mga katawa nga akong gipanip-it
Sa mga sekretong lawak sa puti mong panganod
Sukad kaniadto hangtod karon kayha ugma damlag?
Ang matag adlaw liniminan ba sa gugma kasilag
Pagsalig pagduhaduha kahadlok kahiubos
kamingaw ug kahidlaw?
Ikaw ug ako ray nasayod
Kanimo ko ipahungaw ipahaba isumbong gayod
ang tanan:
Sumala gikabatbat ko na ang mga alingawngaw
Sa nagkaguliyang nga dagaw sa nagdibal kong pagbati
Gikatug-an ko na ang mga lintunganayng tinagoan
Sa tanlag sa akong mga utlanan
Ug karon misugod na pagtambol ug pagsinulog dinhi ning
Galamhan ang libo ka libong lumad nga mga tiil
sa kabalaka:
Pastilan kon wala na ako kinsa na man unya ang tigsulat
Sa Adlaw ug Gabii sa mailong-tuwapos mong kalibotan
akong Talaadlawan?


-MELQUIADITO MAAMBONG ALLEGO, MD
Palm Harbor, Florida, USA

5.07.2012

Ang Babayeng Nagbarog Daplin sa CPG Avenue


Di na kinahaglang ipabudlot
ang imong ngabil nga gipintalan
nimog teknikolor nga lipstik,
kun badlisag lapis imong kilay
ug bitayag aryos nga morag
pulseras sa ka dako
ang duha nimo ka dunggan.
Labi nang way ayo nga nusnosag
uling imong mata
ug magkilo-kilo ka atubang
sa gamayng samin samtang
nagpangidhat nimo
ang miaging habalhabal drayber.
Samot nang way nada
nga gihiklad ang liab
sa imong blaws aron masiplit
ang Avon nimong bra
ug gibunot nimog gigirik-girik
ang branyong Galaxy nga selpon
samtang nag-usap-usap
kag babulgam, nagngisi-ngisig
naglingi-lingi sa upaw
ug puyra gaba nimong uyab
nga Amerkanong gakangukango.


-Noel P. Tuazon
Bingag, Dauis, Bohol

5.05.2012

BALAKISAW: CHEN GUANGCHENG


(HAIKASYLUM)

SUNGLASS SAGOPA
PALAYO SA KANGITNGIT
AGAKA HANGPA


-MEL M. ALLEGO, MD
 Palm Harbor, Florida, USA

5.04.2012

ginadili


kon mokaon kag santol,
ang imong papa mountol.

kon mokaon kag mangga,
ang imong mama mamunga.

kon mokaon kag tambis,
ang imong ate matuboag himbis.

kon mokaon kag saging,
ang imong kuya mokaging.

-CD BORDEN
Dakbayan sa Sugbo