Bentana

Sa bentana,
Gilantaw ko ang kalibotan:
Mga bulingit nga bata nagdula
sa gubot nga kadalanan,
Samtang ang pari mikanta
ug nagwali sa atong kaluwasan
Sakit ug wala pay sulod
ang ilang mga tiyan.
Gitahi nako ang gisi nga bestida
panagang sa bugnawng gabon
Nga inanayng miduot sa kabukogan
ug milakra og abohon
Dinhi sa akong kasingkasing.

Sa bentana,
Gilantaw nimo ang kalibotan:
Mga sulat para sa hinigugma
wala natiwas -- gikalimtan --
Susama sa planong kausaban
sa gobyerno,
Ang paghimo og langit
sa kalibotanhong impyerno.
Iisa ang kamot!
Ayaw na pagmug-ot!
Andama ang kaugalingon
sa katilingbanong ping-ot!
Dili na hapit kaginhawa, hala!
Pagawsa ang kasuko
sa huot nga hawla
Dinha sa imong kasingkasing.

Sa bentana,
Gilantaw nato ang kalibotan:
Wala na ang hudyaka,
upaw na ang kabukiran.
Wala na ang mga timawa,
gihurot sa demolisyon.
Patay na ang panaghiusa,
nahupas na ang rebolusyon.
Wala nay nahibiling tambal
para atong tomaron.
Milabay na ang kagahapon.
Wala nay ugma. Puro nalang karon.
Gilubong man nila ang atong pinulongan,
Kawton ra nato kini sa lubnganan
Dinhi sa atong kasingkasing.

--KOMANDER ROBOT

Jolo, Sulu

estudyante

sa buntag,

puti iyang uniporme

samtang nagtungha

sa unibersidad.

sa gabii,

puti iyang kutis

samtang nagsayaw

sa beerhouse.

(ug iyang puting uniporme

nagkiay-kiay

sa sonata sa elektrikpan

sulod sa bordinghaws.)

--PIERO ALDAYA

Lungsod sa Carcar, Sugbo

Lige Daw Karon Sang

Ang baso mao ang butanganag pustiso
sa giango-ango nga Santo Papa
nga puyde sudlan og tubig bugnaw
para imnon sa gipang-uhaw
kansa nagpangita kon asa dapit ang eskina Lorega
ug tuod man nakakaplag og garapa sa lana
nga panghaplas daw sa mga wakwak
aron makalupad sa kilumkilom
human sila wala kapara og tartanilya
tungod sa manligis nga pison.

--CD BORDEN

Mactan, Dakbayan sa Lapulapu

lami

gisugo
sa inahan
ang singko anyos
niyang anak
sa pagpalit og asin.

mipahiyom
ang tindera
samtang nagtunol
sa pinalit
sa bata.

"asa mang sukli, dong?"

mipahiyom
ang bata
sa paaging
matipigan
ang katam-is
sa iyang giugom.

--RAUL FIGUES

Oslob, Cebu

Uwan

Mibundak na ang uwan, akong higala.
Ang hangin, mihunghong sa akong dalunggan.
Ang mga baki, mihagikhik.
Ang mga atop nabalaka, mabasa na pod silag balik.

Mikusog na ang uwan, akong higala.
Ang danguyngoy sa hangin, makabungol na!
Apan, ang mga baki, nagpadayon gihapon sa ilang kalingawan,
Ug ang mga atop, nadawat na ang ilang kasinatian.

Kanus-a pa kaha mohunong ang uwan, akong higala?
Kanus-a pa kaha molinaw ang panganod nga akong gihangaran?
Kanus-a pa kaha mopakita kining bangaw nga akong gihuwat?
Kanus-a ko pa kaha madawat,
Nga ikaw ang hinungdan niini, akong higala?

Nasayod ko nga sa Iyang matuod nga panahon,
Mohunong ang uwan,
Malinaw ang kapanganoran,
Ug mopakita na gyod ang bangaw nga dugay ko nang gihuwat.

--ANGIE LEE

Pagsabungan, Dakbayan sa Mandaue

kataposang eskina sa langit

ayaw kabalaka
gisab-it ko
pako sa anghel

sa imong bukubuko 

biyahe ngadto
sa kataposang eskina
sa langit

subaya
kanang bituon
sa udtong tutok

nga iyang kahayag
bughaw ang bulok

kon maabot
ka na didto

sa kataposang eskina

sa langit

ayaw kalimti
mobalik
ka pa ning 

atong nahimutangan

sa imong pagpauli
subaya ang panaw
sa pikas dalan
ning uniberso

inig abot
nimo dinhi
naog sa imong

gisakyang panganod
huboon ta ang pako
sa imong bukubuko

ako na say sakay
ako na say may pako

huwata ko
sa akong pagbalik

ug iuli nato
ang gihuwaman 

tang pako sa anghel

sa tag-iyang

anghel

dayon
suwayan natog adto
ang kataposang eskina
sa langit

dungan natong lakton

ang kataposang eskina

sa langit

--PIERO ALDAYA

Lungsod sa Carcar, Sugbo

kinumo

matag tan-aw nako
sa mga away ni Pacquiao

maglain akong kabuhi
malipong ko

ug mangapilo
ang akong mga tudlo

ug pasagdan ko na lang
nga maugom niini
ang nahabilin nakong kusog.

--RAUL FIGUES
Oslob, Cebu

Ayawg Tugotig Kan-on Mo sa Buwaya

Ayaw tugoting kan-on sa mga buwaya
Ang inyong pagkatawo,
Ang inyong lawas ug kalag,
Samtang nabuhi mo niining nagtuyok nga kalibotan.

Ayaw tugoting mapailawom mo nila.
Kahibalo mo ngano?
Sakit ilang himbis, makahilak gayod mog dugo
Wala na lang mo masayod, hinay-hinay na diay nilang gikutkot
Sa ilang talinis nga himbis ang inyong kaunoran
Ang inyong liog hinay-hinay nang gituok
Ug ang inyong tiil gibitad padulong sa lubnganan.

Pagbantay mo, ayaw og kompiyansa
Bisan pa kon makit-an ninyong wala na sila galihok sa inyong atubangan
Wala moy gahom sa pagbasa sa ilang hunahuna
Pag-amping mo, kay basin sa sunod wala na moy ugma!

Ug kon dili malikayang hasmagon mo nila,
Ayawg kaulaw, pangayog tabang.
Kon ikaw ra usa,
Iampo na lang sa langit ang imong kaluwasan.

--ANGIE LEE

Pagsabungan, Dakbayan sa Mandaue

diary sa mga luha

Sa akong pag-abli way back, old memories,

nakaykay, samas salida nga flashback style,
akong na-discover akong self sa lain-laing
emotions nga akong na-share, every pages.
ug dili tanang adlaw sab gi-harvest
ang mga bunga niini kay ang ubang days
di maayo, daot. Maong if you wanna see

sa akong Diary tag-as ang lat-ang.
this day nagbugno mis akong ballpen,
kay gusto siyang mo-virginize sa last leaf
sa akong diary. Gusto ta ko iyagyag
ang tanang kayugot, kapungot karong adlawa.
As time passed by, wa ko maka-notice,
napuno na diay sa luha ang precious page,
mipadayon sa pag-agay ang akong tears,
ug natumog na pag-ayo ang papel,
then i slowly closed it.

--GEE FAMILGAN

Argao, Sugbo

negrang daot

Ayaw pagkabuang sa usa ka mamamarang
Mabali ang hangin
mohapak sa imong nawong...
Di ko ganahan magtan-aw sa usa
ka manlilimos na morag gitipos...
Hinumdomi palayo kaniya
makilatan ra na siya...
Gipahiagom nimo og unsa katam-is
ang akong kinabuhi..
Unsaon nako paglitok ang akong nabati...
Ikaw ang negra,
Negrang daot sa akong palibot...
Busa gwapa sa akong panan-aw kay libre man...
Ang kadako ngadto sa paa sa manok
dili ko mahilimtan,
ang walay kahutdan sa bugas...
Tungod niini nakahurot kog tulo kagantang...
Kabugnaw sa vanilla di madala sa kainit...
Maabot ra ang adlaw na imo kong paninglon
Buot ug di buot sa dughan
Mao ni siya gitawag og utang,
utang na nabahaw
Pero bisan pa man
daghang salamat
Salamat sa pakighimamat.

--CATHLEA ANDO

Dakbayan sa Sugbo

Naunsa na man ang atong world karon?

Akoy na-stress sa atong world karon
Kahibalo ba mo ngano?
Kuan man god, kanang, dili na ma-understand ang people sa atong surroundings
Mora silag mga pokemon, nang-evolve na to the highest level! Bongga! DMD!*

Kon ganahan mog panadaliang happiness
Well, daghan kaayo diha sa kilid-kilid, o!
Basta sakto lang ang imong bayad,
Well, i-ready na ang motel at simulan na ang saya!
(Basta ayaw lang pag-expect nga ikaw ra ang iyang gi-churva te,
FYI*, daghan mo! Bongga!)

Kon dili pod ka ganahag personal,
Well, just go online!
Mapa-wow jud ang imong eyes,
And take note, internet connection lang ang imong kinahanglan!
(Well, kon wala kay internet connection, adto lang sa internetan, naay piso per hour lang!)

Bongga na ang lovelife ngayon mga te
Dili lang in person,
Aduna na poy digital version!
Kung ganahan kang magka-someone para sa imong kaugalingon
Pwede mo siyang ingnan og 'I luv u', piso ra ang imong gastohon!

Ug kon makuha na nimo ang iyang 'yes'
Char! Jackpot! Congratulations! You now have someone for yourself!
Someone nga imong maka-'i luv u',
Someone nga imong maka-HHWW*...
Someone nga imong ipanghambog sa imong friends...
Ang masuya, ma-deadz!

You know mga te
Tungod sa ka-advanced sa atong technology
Ang mga people, wala na kailag abstinence
Mag-churva diri, mag-churva didto
Bisan pag sa sacred place adto maghimo! Ay Ginoo ko!

Oh well, according sa mga nadunggan kong story
Dili na daw importante ang virginity (Estoryahee!)
Ay dah, basta ra daw naay pleasure

Make love and live happily ever after!

Mao bitaw nang naay girls karon nga midako na ang tummy
Mora ba gyog ready na mahimong mommy!
Hay naku! Kaluoy tingali nilang mommy ug daddy
Naglisod na gani, aduna na poy buhionong lain! DMD!*

Pero saludo man pod ko nila mga te,
Kay wala gyod nila gipa-abort ang ilang precious baby
Whoa, bisan pag dili ready,
Sige na lang, take on the responsibility!

Mao ni ang reality
If we just make ourselves be bungol-bungol on this issue,
What would happen to the values of humanity?

--ANGIE LEE

Pagsabungan, Dakbayan sa Mandaue

-----
*DMD-di mada'
*FYI-for your info
*HHWW-holding hands while walking